Jehovah Le Jesuh Ruah Ning Kha I Zohchunh

1-2. (a) Jehovah kan dawtnak ah zeidah aa tel? (b) Jesuh nih a ruahnak dihlak in Jehovah a dawt kha zeitindah a langhter?

“JEHOVAH na Pathian cu na lungthin dihlak, na nunnak dihlak, na thazaang dihlak le na ruahnak dihlak in na dawt lai.” (Luka 10:27) Jehovah kha kan ngeihmi dihlak, kan sining dihlak in kan dawt tinak a si. Mah ah kan duhnak, kan intuarnak le kan thazaang aa tel leng ah kan ruah ning zong aa tel. Jehovah ruah ning kha tling tein kan hngalthiam kho bal lai lo ti cu a hmaan ko. Asinain Jesuh nih a Pa ruahnak kha tling tein aa zohchunh caah “Khrih lungthin” kong kha kan hlathlai ahcun Pathian ruahnak zong ṭha deuh in kan hngalhthiam khawh lai.—1 Kor. 2:16.

² Jesuh nih Jehovah kha a ruahnak dihlak in a dawt. A Pa nih tuahter a duhmi kha a hngalh i a har caan hmanh ah Pathian duhnak ning in a tuah zungzal. A Pa duhnak tuah awkah aa zuam peng i mah kha a nunnak ah hmasa bik ah a chiah.

3. Lamkaltu Peter nih Jesuh sinin zeidah a cawn, Khrihfa pawl kha zei tuah awkah dah tha a pek hna? (1 Peter 4:1)

³ Peter le a dang lamkaltu hna cu Jesuh he caan hmanṭi awk le a ruah ning in cawn awkah tinvo sung an hmu. Peter nih a pakhatnak cakuat a ṭial lioah Khrihfa pawl kha Khrih lungput ngeih awkah timhcia tein um u tiah tha a pek hna.a (1 Peter 4:1 rel.) A hrampi Baibal ah Peter nih “timhcia tein um u” tiah a ti tikah raldohnak caah hriamnam aa kenmi ralkap pawl ca i hman tawnmi biafang kha a hman. Cucaah Jesuh lungput le ruah ning kan i zohchunh ahcun Satan vawlei ah a karhmi sual duhnak lungput kha kan doh khawh lai.—2 Kor. 10:3-5; Efe. 6:12.

4. Hi capar ah zei kong dah kan i ruah hna lai?

⁴ Jesuh ruah ning cu zeidah a si, zeitindah kan i zohchunh khawh? Hi capar ah mah kong hi kan i ruah hna lai: (1) Lungthin khat tein um awkah zeitindah Jehovah ruah ning kan i zohchunh khawh? (2) Zeitindah aa toidormi kan si khawh? (3) Jehovah sin thlacamnak nih zeitindah thleidan khawhnak a kan ngeihter?

Jehovah Ruah Ning Kha I Zohchunh

5. Voikhat cu Peter nih zeitindah Jehovah ruah ning kha aa zohchunh lo?

⁵ Voikhat cu Peter nih Jehovah ruah ning kha aa zohchunh lo. Jesuh nih a zultu pawl kha Jerusalem khua ah ka kal lai i cuka ah biaknaklei hruaitu hna sinah chanh ka si lai, hrem ka si lai i thah ka si lai tiah a chimh hna. (Matt. 16:21) Israel mi nih an i ruahchanmi, biakammi Messiah Jesuh thah awkah Jehovah nih nawl a awnh lai ti kha Peter nih cohlan awkah aa harh men lai. (Matt. 16:16) Cucaah Peter nih Jesuh kha a dang tein a kalpi i “Bawipa, nangmahle nangmah i zaangfah ko. Hi bantuk thil cu zeitik hmanh ah na tong lai lo” tiah a ti. (Matt. 16:22) Peter nih Jehovah ruah ning aa zohchunh lo caah Jesuh he lungthin khat tein a um lo.

6. Jesuh nih a ruah ning cu Jehovah ruah ning he aa khat dih ti kha zeiti lam in dah a langhter?

⁶ Jesuh ruah ning cu vancung a Pa ruah ning he aa khat dih. Jesuh nih Peter kha “Satan, chuak tuah! Nang cu ka caah dawntu na si. Pathian ruah ning in si loin minung ruah ning in na ruah” tiah a ti. (Matt. 16:23) Peter nih a ṭhami lungput in a chimmi a si ko nain Jesuh nih a ngaihpiak duh lo. Jehovah nih Jesuh kha mahca ṭhatnak lawng kawl seh ti a duhpiak lo. Mah lioah Peter nih Pathian ruahnak i zohchunh cu a biapi tukmi a si ti kha a cawn. Kannih zong mah in kan cawn khawh ve.

7. Peter nih Jehovah ruah ning aa zohchunh kha zeitindah a langhter? (Hmanthlak zoh.)

⁷ A hnuah Peter nih Jehovah ruah ning i zohchunh a duh kha a langhter. Cuarpar aa tan lomi Jentail mi hna cu Pathian miphun in cohlan an si cang lai. Khrihfa biaknak ah a lut hmasa bikmi Jentail mi Kornelias sinah phungchim ding in Peter cu rian pek a si. Judah mi nih Jentail mi kha pehtlaih an duh hna lo caah Peter zong a lungput a thlen khawh nakhnga bawmh a herh ko lai. Peter nih Pathian duhnak a hun hngalh tikah a lungput kha a thlen. Cucaah Jehovah nih a thlah tikah “al lo tein” a kal. (Lam. 10:28, 29) Peter nih Kornelias le a innchungkhar kha a cawnpiak hna i an dihlak in tipil an ing.—Lam. 10:21-23, 34, 35, 44-48.

8. Jehovah ruah ning kan i zohchunh ti kha zeitindah kan langhter khawh? (1 Peter 3:8)

⁸ Kum tampi a rauh hnuah Peter nih Khrihfa unau pawl kha “lungthin khat tein um” awkah tha a pek hna. (1 Peter 3:8 rel.) Baibal ah a langhtermi Jehovah ruahnak kan i zohchunhnak thawng in a miphun cu lungthin khat tein kan um kho. Tahchunhnak ah, Jesuh nih a zultu pawl kha Pennak hmasa bik ah chiah awkah a forh hna. (Matt. 6:33) Cucaah na Khrihfabu i thawngthanhtu pakhat nih caantling rian phunkhat kha ṭuan ding in bia a khiah men lai. Amahle amah i zaangfah in a fawi deuhmi rian i thim awkah ruahnak kan cheuh awk a si lo. Mah canah cutin aa zuammi cu a ṭhami a si tiah tha kan pek awk a si i kan bawmh awk a si.

Aa Toidormi Si

9-10. Jesuh nih zeitindah toidornak taktak a langhter?

⁹ A thih lai zan ah Jesuh nih Peter le a dang lamkaltu pawl kha toidornak he aa tlaiin a biapi tukmi kong a cawnpiak hna. Mah zan ah an eiṭi dingmi zanriah timhtuah awkah Jesuh nih Peter le Johan kha a thlah hna. Rawl ei hlanah khual pawl an ke ṭawlpiak awkah a herhmi khengpi le ṭaval zong an timhtuah a hau men lai. Asinain aho nih dah toidor tein an ke cu a ṭawlpiak hna lai?

¹⁰ I cungcang loin Jesuh nih toidornak taktak a langhter. Sal nih a tuah dingmi a tuah tikah lamkaltu pawl cu an khuaruahhar tuk. Jesuh nih a angki leng kha a phoih. Ṭaval kha a tai ah aa menh, khengpi chung ah ti a thlet i an ke kha a ṭawlpiak hna. (Joh. 13:4, 5) Amah a rawitu ding Judas i telin lamkaltu 12 an ke a ṭawlpiak hna tikah sau nawn a rau men lai. Asinain Jesuh nih toidor tein an ke a ṭawlpiak dih hna. Cun Jesuh nih hitin a ti: “Zeicah nan ke kaan ṭawl hna ti hi nan hngalthiam maw? ‘Saya’ le ‘Bawipa’ tiah nan ka auh, cutin ka si taktak caah nan ka auhmi cu a hmaan ko. Bawipa le Saya a simi keimah hmanh nih nan ke kaan ṭawlpiak hna ahcun nannih zong pakhat le pakhat nan ke nan i ṭawlpiak ve awk a si.”—Joh. 13:12-14.

11. Peter nih toidornak ngeih awkah a cawn ti kha zeitindah a langhter? (1 Peter 5:5) (Hmanthlak zong zoh.)

¹¹ Peter nih Jesuh toidornak in tampi a cawn. Jesuh van a kai hnuah Peter nih a chuahka in a ke a beimi pa kha khuaruahhar lam in a damter. (Lam. 1:8, 9; 3:2, 6-8) Mi tampi cu mah khuaruahhar thil zoh awkah an ra. (Lam. 3:11) Peter chan ah mi nih minthannak kha biapi tuk ah an chiah. Asinain mi nih lungthin an pek lai kha Peter nih a duh lo. Cucaah amahle amah si loin Jehovah le Jesuh tu kha a thangṭhat hna. Hitin a ti: “Jesuh min in le a min kan zumhnak thawng in nan hngalhmi le nan hmuh balmi mah pa hi a hun ṭhawn ṭhanmi a si.” (Lam. 3:12-16) A hnuah Peter nih toidornak ngeih a biapitnak kong he aa tlaiin Khrihfa hna sinah cakuat a rak ṭial. Mah cakuat ah a hmanmi bia nih a tai ah ṭaval i menh in lamkaltu pawl ke a ṭawltu Jesuh kong kha a kan hngalhter ṭhan.—1 Peter 5:5 le a tanglei fianternak rel.

12. Peter bantuk in toidornak ngeih awkah zeitindah kan i zuam peng khawh?

¹² Peter kha i zohchunh in toidornak ngeih ding in kan i zuam. Toidornak taktak ngeih awkah bia hmaan chim lawng in a za lo ti kha i cinken. Hika ah toidornak caah Peter hmanmi bia nih kanmahle kanmah kan i hmuh ning le midang kan hmuh hna ning zong aa tel ti kha a langhter. Midang kan bawmhmi hna cu mi mithmai ṭha hmuh kan duh caah si loin Jehovah le kan minunghawi kan dawt hna caah a si. Mi nih an kan hmuh lo hmanh ah Jehovah le unau pawl kha nuam tein rian kan ṭuanpiak hna ahcun kan i toidor taktak ti kan langhtermi a si.—Matt. 6:1-4.

“Thleidan Khawhnak” Ngei

13. “Thleidan khawhnak” timi ah zeidah aa tel ti kha fianter.

¹³ “Thleidan khawhnak” timi ah zeidah aa tel? (1 Pet. 4:7) Thleidan khawhnak a ngeimi Khrihfa pakhat nih Jehovah ruahnak i zohchunh in biakhiahnak tuah awkah aa zuam. Cu bantuk mi nih Jehovah he kan i pehtlaihnak nakin a biapi deuhmi zeihmanh a um lo ti kha a hngalh. Amahle amah aa hmuh ning cu a tlarimi a si i zeizong vialte ka hngal lo ti kha a cohlan. Mah leng ah toidornak he Jehovah sinah atu le atu thla a camnak thawng in Pathian aa bochan kha a langhter.

14. Peter nih Jehovah aa bochan lo kha zeitindah a langhter?

¹⁴ A thih lai zan ah Jesuh nih a zultu pawl kha “Tuzan ah ka ton dingmi thil ruang ah nan ka zamtak lai” tiah ralrin a pek hna. Mah tikah Peter nih “Midang vialte nih an in hlawt hmanh ah kei cu zeitik hmanh ah kaan hlaw bal lai lo” tiah a leh. Mah zan ah Jesuh nih a zultu pawl kha “Ralring tein hngak u law thlacam zungzal u” tiah a forh hna. (Matt. 26:31, 33, 41) Peter nih tuan deuh tein mah ruahnak cheuhnak kha rak zul seh law Jesuh he an i hawikomhnak kong kha midang theihter awkah ralṭhatnak a ngei ko hnga. Asinain Peter nih a Bawipa kha a hlawt i a hnuah fakpi in aa ngaichih.—Matt. 26:69-75.

15. A thih lai zan ah Jesuh nih zeitindah thleidan khawhnak a langhter?

¹⁵ Jesuh nih Jehovah kha aa bochan zungzal. Jesuh cu mitling a si ko nain atu le atu thla a cam. Mah nih Jehovah duhnak ning in nun awkah ralṭhatnak a ngeihter. (Matt. 26:39, 42, 44; Joh. 18:4, 5) A thih lai zan ah Jesuh nih atu le atu thla a cammi kha Peter nih a philh bal lai lo ti cu a fiang ko.

16. Peter nih thleidan khawhnak a ngeih kha zeitindah a langhter? (1 Peter 4:7)

¹⁶ A hnuah Peter nih Jehovah kha aa bochan chinchin i thla a cam peng. Jesuh nih a thawhṭhan hnuah Peter le a dang lamkaltu hna kha phungchim rian nan liim khawh nakhnga thiang thlarau nan hmuh lai tiah bia a kamh hna. Asinain mah caan a phanh hlan tiang Jerusalem khua in rak ka hngak u tiah a fial hna. (Luka 24:49; Lam. 1:4, 5) Jesuh a hngah lioah Peter nih zeidah a tuah? Peter le a dang Khrihfa hna cu “thla an camṭi tawn.” (Lam. 1:13, 14) Peter nih a pakhatnak cakuat a ṭial lioah Khrihfa pawl kha thleidan khawhnak ngeih awk le thlacamnak in Jehovah i bochan peng awkah a forh hna. (1 Peter 4:7 rel.) Peter nih Jehovah i bochan awkah a cawn i a hnuah Khrihfabu tungpi a hung si.—Gal. 2:9.

17. I chuahpimi zei bantuk thiamnak kan ngeih hmanh ah zeidah kan tuah peng a herh? (Hmanthlak zong zoh.)

¹⁷ Thleidan khawhnak ngeih awkah Jehovah kha thlacamnak in atu le atu kan fuhpanh a hau. I chuahpimi zei bantuk thiamnak kan ngeih hmanh ah Jehovah sinah thlacam peng a hau ti kha kan hngalh. Jehovah nih kan caah a ṭha bikmi a hngalh ti kha kan zumh. Cucaah a biapimi biakhiahnak kan tuah hlanah a sinah lamhruainak kan hal.

18. Zeitindah Jehovah ruah ning kha ṭha deuh in kan i zohchunh khawh?

¹⁸ Jehovah nih a sining aa zohchunh khomi in a kan ser caah kan i lawm tuk. (Gen. 1:26) Jehovah kha tling tein kan i zohchunh kho lo ti cu a hmaan ko. (Isa. 55:9) Asinain Peter bantuk in Jehovah ruah ning kha ṭha deuh in i zohchunh awkah kan i zuam kho. Pathian ruah ning i zohchunh awk, aa toidormi si awk le thleidan khawhnak ngeih awkah i zuam peng hna u sih.