“Thlarau Nih A Chuahtermi” Ziaza Nih Pathian Thang A Ṭhatter

“Nannih nih thei tampi nan tlai thawngin ka Pa sunparnak kha nan langhter.”—JOHAN 15:8.

1, 2. (a) Midang thazang pek awkah zei caanṭha dah kan ngeih? (b) Jehovah pekmi zei laksawng nih dah amah biaknak ah kan thil ti khawhnak a ṭhanchoter khawh?

THIL sining pahnih hi ruathmanh. Unaunu pakhat nih mino unaunu pakhat a lungre a theih kha a hmuh. Cucaah phungchim ah kalṭi ding a timhtuah. Innkhat an luh hnu, inn dang an kal lioah mino unaunu nih a lungretheihnak kha a chimh. Mah zan ah mino unaunu nih thlaraulei a ṭhawngmi unaunu dawtnak ruang ah Jehovah kha a thangṭhat; mahte kha a rak herhmi a si. A dang pakhat cu nuva tuah khat cu ram dang ah Pathian rian an ṭuannak in an tlunka a si. Hnianghrawmnak ah an hmuhtonnak kha lungtho tein an chim i mino unaupa nih dai tein a ngaih. Kum tlawmpal a rauh hnu ah mino unaupa cu ram dang ah missionary ṭuan aa tim i cuti ṭuan a duh cu mah nuva hna chimmi bia ruangah a si tiah a ruah.

² Mah kong nih mi pakhatkhat ruang ah na nunning aa thlenmi asiloah nangmah ruang ah mi pakhatkhat a nunning aa thlenmi kha na lung ah a chuahter men lai. Voi khatte bia i ruahnak nih mi nunnak a thlenter cu a caancaan te lawngah a si cu a hmaan ko. Asinain nifate mi thazang peknak caanṭha kan ngei. Unau pawl bawmh khawh deuh awk le Pathian rian tam deuh ṭuan khawh awkah na thil ti khawhnak a ṭhanchoter khomi thil pakhat a um. Mah cu khuaruah har a si ko lo maw? Jehovah nih a thiang thlarau kha laksawng in a kan pek. (Luka 11: 13) Kan nunnak ah Pathian thlarau rian a ṭuan tikah Pathian kan biaknak a ṭhanchotermi ziaza ṭha kan ngei kho lai. Zei tluk laksawng ṭha dah a si!—Galati 5:22, 23 rel.

3. (a) “Thlarau nih a chuahtermi” ziaza nih Pathian thang zeitindah a ṭhatter? (b) Zei biahalnak hna dah kan i ruah lai?

³ Thiang thlarau nih a chuahtermi ziaza hna nih thlarau Hrampi, Jehovah Pathian sining kha an langhter. (Kol. 3:9, 10) Khrihfa hna nih Pathian i zohchunh awk a herhnak bik kha Jesuh nih a zultu pawl sinah hitin a chim: “Nannih nih thei tampi nan tlai thawngin ka Pa sunparnak kha nan langhter.”a (Johan 15:8) “Thlarau nih a chuahtermi” ziaza kan ngeih tikah kan biachim le tuahsernak ah mah ziaza kha a lang lai i Pathian thang a ṭhatter lai. (Matt. 5:16) Thlarau nih a chuahtermi ziaza le Satan vawlei ziaza cu zeitindah aa dan? Thlarau nih a chuahtermi ziaza cu zeitindah ngeih khawh a si? Mah ngeih cu zeicah a har? Thlarau nih a chuahtermi ziaza lakah dawtnak, lawmhnak le daihnak pathum kong kan i ruah lioah mah biahalnak cu kan i ruah chih lai.

Pathian Ngeihmi Dawtnak Ngei Ve

4. Jesuh nih a zultu pawl kha zei bantuk dawtnak ngeih awk dah a cawnpiak hna?

⁴ Thiang thlarau nih a chuahtermi dawtnak cu vawlei mi hna ngeihmi dawtnak he aa dang tuk. Zeitin in dah? Thlarau nih a chuahtermi dawtnak cu phunglam ṭha cungah hram aa bunh. Mah aa dannak kha Jesuh nih Tlang Cung Cawnpiaknak ah a fianter. (Matthai 5:43-48 rel.) Mi ṭhalo hmanh nih mi nih an pehtlaih hna ning in pehtlaih an hman ve kha Jesuh nih a hmuh. Cu bantuk “dawtnak” cu mah ca ṭhatnak hlawt taktak si lo in kan cung an ṭhat caah an cung ṭhat ve khi a si. ‘Vancung khua i a ummi kan Pa fa si’ kan duh ahcun anmah bantuk si lo a hau. Mi nih a kan pehtlaih ning in pehtlaih ve loin, Jehovah nih mi a hmuh hna ning le a pehtlaih hna ningin hmuh ve le pehtlaih ve a hau. Asinain Jesuh nih a chim bantuk in kan ral cu zeitindah kan dawt khawh hna lai?

5. A kan hremtu hna cungah zeitindah dawtnak langhter khawh a si?

⁵ Baibal chung tahchunhnak pakhat hi ruathmanh. Filipi khua ah Paul le Silas cu phung an chim lioah an tlaih hna, fakpi in an tuk hna, thonginn chungchin ah an chiah hna i an ke kha hreng in an khenh hna. Cu hnu ah thonginn bawi zong nih a hrem rih men hna lai. Lihnin ruang ah ruah loin an luat tikah mah bawi kha teirul an cham maw? An cham lo. Annih nih thonginn bawi cung ah lungtak in siaherhnak an ngeih caah aa that hnikmi bawi kha an khamh, mah nih a chungkhar dihlak zumtu si awk lam a hun. (Lam. 16:19-34) Tuchan unau tampi zong nih anmah ‘a hremtu hna kha Pathian thluachuah an halpiak ve hna.’—Rom 12:14.

6. Unau cungah mah zawnruat lo dawtnak zeitindah langhter khawh a si? (Cahmai 21 rinli kulh zoh.)

⁶ Zumtu khat kan dawt hnanak ahcun mah leng in aa tel. ‘Kan unau hna caah kan nunnak kha kan hloh’ awk a si. (1 Johan 3:16-18 rel.) Asinain voi tam deuh cu thil hme tete tu ah dawtnak langhter a hau. Tahchunhnak ah, kan bia le kan tuahsernak in unau pakhat a thin kan hunter ahcun kanmah nih remnak tuah hmasanak thawngin dawtnak langhter khawh a si. (Matt. 5:23, 24) Pakhatkhat nih kan lung a kan fahter ah tah? ‘Ngaihthiam’ ding timhcia kan si maw asiloah kan thin a hung peng dah? (Salm 86:5) Thiang thlarau nih a chuahtermi dawtnak ngan nih chambaunak tete i khuhpiak awk le “Bawipa nih a kan ngaihthiam” bantuk in lungtak in i ngaihthiam awk a kan bawmh.—Kol. 3:13, 14; 1 Pit. 4:8.

7, 8. (a) Pathian kan dawtnak le minung kan dawtnak hi zeitindah aa pehtlaih? (b) Jehovah kan dawtnak zeitindah nganter khawh a si? (A tanglei hmanthlak zoh.)

⁷ Unau cungah mah zawnruat lo dawtnak zeitindah ngeih khawh a si? Pathian kan dawtnak nganternak thawngin a si. (Efe. 5:1, 2; 1 Johan 4:9-11, 20, 21) Baibal relnak, ṭha tein ruahnak le thlacamnak ca caan peknak nih vancung kan Pa kan dawtnak a nganter chin. Pathian he i naih awkah caan cawk a hau.

⁸ Tahchunhnak ah, nikhat chung ah rikhiahmi caan lawng ah Baibal na rel kho, ṭha tein na ruat kho i Jehovah sin thla na cam kho hei ti u sih. Jehovah ca na hmanmi mah caante kha zeihmanh nih hna a hnawh nakhnga lo ṭha tein na tuah lai a si lo mei? Ahohmanh nih Pathian sin thlacam an kan dawn kho lo, tam deuh cu kan duh tik caan paoh ah Baibal kan rel kho. Asinain, Pathian ca caan pe kho lo tiangin nifa ṭuanmi rian lawng kha i buaipi awk a si lo. Jehovah naihnak caah nifate a si khawh chung caan na caw maw?

‘Thiang Thlarau sinin a Rami Lawmhnak’

9. Thiang thlarau nih zei thil ton buin dah lawmhnak a kan ngeihter khawh?

⁹ Thlarau nih a chuahtermi lawmhnak cu harnak ton bu zong in ngeih khawh a si. Lawmhnak cu vawlei chiatnak ah a nung khomi thingkung bantuk a si. Vawleicung pumpi Pathian salle tampi nih ‘temh innak tampi an huah nain thiang thlarau sinin a rami lawmhnak he bia kha an cohlan.’ (1 Thes. 1:6) Cheukhat cu harnak le ngaihchiatnak an tong. Asinain Jehovah nih a thlarau hmangin lawmhnak he ‘lungsau thinfual in inkhawh’ awkah a bawmh hna. (Kol. 1:11) Lawmhnak hrampi cu zeidah a si?

10. Lawmhnak hrampi cu zeidah a si?

¹⁰ Satan vawlei i a hmun lomi “rumnak” he i lo, loin Jehovah pekmi rumnak cu zungzal in man a ngei. (1 Tim. 6:17; Matt. 6:19, 20) Pathian nih zungzal nunnak a kan kamh caah kan lung aa lawm. Cun vawlei pumpi Khrihfa unau rual lakah kan i tel ca zong ah kan i lawm. A bik in, Pathian he pehtlaihnak ṭha kan ngeih caah kan i lawm. Ral kut in a zaam nain Jehovah thangṭhatnak hla hitin a sami David bantuk in kan ruah ve: “A fekmi na dawtnak cu nunnak nakin a ṭha deuh, cucaah cun nangmah cu kan thangṭhat lai. Ka nun chung paohpaoh cu kan lawmh lai.” (Salm 63:3, 4) Harnak kan ton hmanh ah Pathian kha lunglawm tein kan thangṭhat khawh.

11. Lunglawm tein Jehovah biak cu zeicah a biapit?

¹¹ Lamkaltu Paul nih Khrihfa hna kha hitin a forh hna: “Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh ṭhan rih ko lai.” (Fil. 4:4) Khrihfa hna nih Jehovah kha zeicah lunglawm tein an biak a herh? Zeicahtiah Satan nih Jehovah cungnung bik a sinak a zuamcawh caah a si. Ahohmanh nih Pathian kha lungtho tein an bia lai lo tiah Satan nih a ti. (Job 1:9-11) Jehovah kha lunglawm te si loin ka rian a si ti phun men in kan biak ahcun kan pekmi thangṭhat raithawinak cu tlam a tling lai lo. Cucaah salm caṭialtu forhfialnak bia hi zulh kan i zuam: “BAWIPA cu lunglawm tein bia u law lunglawmhnak hla he a hmai ah cun ra chuak u.” (Salm 100:2) Lunglawm te le lungtho tein Pathian biaknak nih a thang a ṭhatter.

12, 13. A chiatnak lei hmuhnak kha zeitindah hloh khawh a si?

¹² Aa pumpe cangmi Jehovah salle hmanh an lung a dongh caan le a ṭhatnak lei hmuhnak ngeih an i harh caan a um. (Fil. 2:25-30) Cu bantuk caan ah zeinihdah a kan bawmh khawh? Efesa 5:18, 19 nih hitin a chim: “Thlarau tu khan khat deuh u. Hla dawh le bia dawh in pakhat le pakhat i chawn u; Bawipa cu hla le aw dawh in nan lung taktak in thangṭhat u.” Mah ruahnak cheuhnak cu zeitindah zulh khawh a si?

¹³ A chiatnak lei hmuhnak kan ngeih ahcun Jehovah sinah thlacam in thangṭhat awk a tlakmi thil ṭha tein ruah kan i zuam awk a si. (Filipi 4:6-9 rel.) Cheukhat nih Pennak hla music chuah in din tein zulhnak nih an lung a ṭhawnter ṭhan le a ṭhatnak lei hmuhnak ngeih awk a bawmh hna kha an hmuh. Hneksaknak fak a tonmi ruang ah a lung a dong lengmangmi unaupa nih hitin a chim: “Lungtak in hmaan te’n thla ka cam lengah Pennak hla fung tlawmpal cinken khawh kaa zuam. Jehovah thangṭhatnak hla awchuah in le lungchung in ka sakmi nih ka lung a daihter. Cun mah lioah Jehovah kha Naih timi cauk an chuah i a hmai kum chungah a dihlak in voihnih ka rel. Mah nih ka lung a daihter. Jehovah nih kaa zuamnak thluachuah a pek ti kha ka hngalh.”

“Daihnak Hri khan Fek tein i Ṭem u”

14. Daihnak a um kha zeinihdah a langhter?

¹⁴ Ramkomh civui ah a rami, ramkip i a ummi unau hna cu pakhat le pakhat hawikomhnak ah an i nuam. Mah nih tuchan Pathian miphun pawl cu an lung aa rual ti a langhter, lungrualnak cu daihnak a um a langhtertu a si. Mi nih pakhat le pakhat an i ral lai tiah an ruah hna nain annih cu ‘pum khat sinak, thlarau nih a pekmi hna ngeih peng awk a funtu hna daihnak hri in fek tein an i ṭem’ kha an hmuh hna tikah an khuaruah a har. (Efe. 4:3) Mah lungrual tein a ummi hna an hlawtmi ziaza ruah tikah khuaruahhar chinchin a si.

15, 16. (a) Piter cu zei bantuk minung dah a rak si, mah cu a caah zeitindah zuamcawhnak a si? (b) Jehovah nih Piter kha a lungput thlen awkah zeitindah a bawmh?

¹⁵ Miphun aa khat lomi lungrual tein um cu a fawi lo. Lungrual tein zeitin um khawh a si ti hngalh awkah kum zabu pakhatnak i lamkaltu Piter kong i ruah u sih. Cuarpartan lomi Jentail mi hna cung a lungput kha hi a bia in kan hngalh khawh: “Judah mi cu Jentail mi he i len i kai awk le i komh i hawi awk kha an biaknak phung nih a awnh hna lo ti cu nannih nih fiang tein nan hngalh. Sihmanhsehlaw mi zeihmanh kha a thur le a thianglo i ka ruah hna nakhnga lo Pathian nih a ka hmuhsak cang.” (Lam. 10:24-29; 11:1-3) Nawlbia nih kan phun hawi Judah mi lawng dawt ding a kan fial tiah mah lio mi tampi nih an ruah bantuk in Piter zong nih a ruah ve men lai. Jentail mi kha ral bantuk in huat ding tiah a ruah men lai.b

¹⁶ Piter cu Kornelias inn a luh lioah siarem lo in a um lai khi ruathmanh. Hlan ah Jentail mi a nautatmi pa cu Jentail mi hna he ‘daihnak hri khan fek tein aa ṭem’ kho lai maw? (Efe. 4:3) Mah hlan deuh ah Pathian thlarau nih Piter kha a lungput i remh awk le miphun thleidannak ngeih ti lo awk a bawmh. Jehovah nih miphun thleidannak a ngeih lo kha langhnak in fiang tein a hngalhter. (Lam. 10:10-15) Cucaah Piter nih Kornelias sinah hitin a chim khawh: “Atu cu Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan ko hna.” (Lam. 10:34, 35) Piter hmuhning cu aa thleng i ‘zumhnak i unau’ a simi hna he lungrual tein a um cang.—1 Pit. 2:17.

17. Pathian miphun an lung aa rual cu zeicah cinken awktlak a si?

¹⁷ Piter hmuhtonnak nih tuchan Pathian miphun lakah a ummi cinken awktlak thlennak kha hngalh awk a kan bawmh. (Isaiah 2:3, 4 rel.) “Phun kip, ram kip, holh kip, hrin kip chung in a rami” nuai tampi cu “a ṭhami thil le Pathian nih a lawmhmi thil le a tlingmi thil” tuah khawh awkah an lungput kha an i remh. (Biat. 7:9; Rom 12:2) An lak i tam deuh cu Satan vawlei i huatnak, ralnak le lung i khah lonak an rak ngei. Asinain, Baibal hlathlainak le thiang thlarau bawmhnak in “daihnak a chuahtermi thil” kha hngalh an i zuam. (Rom 14:19) Mah thawngin a chuakmi lungrualnak nih Pathian thang a ṭhatter.

18, 19. (a) Khrihfabu daihnak le lungrualnak kha pakhat cio nih zeitindah karhter khawh a si? (b) A hnu capar ah zei kong dah kan i ruah lai?

¹⁸ Pathian miphun lakah a ummi daihnak le lungrualnak kha pakhat cio nih zeitindah karhter khawh a si? Khrihfabu tampi ah ramdang in a rami unau an um. Cheukhat cu kan nunphung aa dangmi le kan holh ṭha tein a thiam lomi an si men lai. Anmah he theihhngalh kan i zuam maw? Baibal nih cutin tuah awk tha a kan pek. Judah mi le Jentail mi unau pawl umnak Rom Khrihfabu kha Paul nih hitin a ti: “Khrih nih an cohlan hna bangin, Pathian nih sunparnak a hmuh nakhnga pakhat le pakhat i cohlang cio u.” (Rom 15:7) Nan Khrihfabu ah ṭha deuh in hngalh naa zuam awk a simi pakhatkhat an um maw?

¹⁹ Kan nunnak ah thiang thlarau rian a ṭuan nakhnga zeidah tuah khawh rih a si? A hnu capar ah thiang thlarau nih a chuahtermi a taangmi ziaza kong kan i ruah lioah mah biahalnak a phi cu kan hngalh te lai.

[A Tanglei Fianternaks]

Zeitindah Na Leh Lai?

• Unau cungah mah zawnruat lo dawtnak zeitindah langhter khawh a si?

• Lunglawm tein Pathian biak cu zeicah a biapit?

• Khrihfabu ah daihnak le lungrualnak zeitindah karhter khawh a si?

[Cahmai 2nak i hmanthlak1]

“Annih cu a Hmaanmi Khrihfa An Si”

Between Resistance and Martyrdom—Jehovah’s Witnesses in the Third Reich timi cauk ah Neuengamme (Nunkama) hremnak thonginn ah a tlami Judah mipa pakhat nih Jehovah Tehte pawl he an i ton hmasa biknak kong a chimmi kha hitin aa ṭial:

“Kannih Judah mi cu Dachau (Dakha) thonginn in Neuengamme hremnak thonginn kan phanh tikah cuka um Judah mi nih an ngeihmi pek an kan duh lo caah an thuh dih. . . . Thong kan tlak hlan ahcun pakhat le pakhat kan rak i bawm hna. Asinain thonginn ahcun kan thi lai maw kan nung lai dah ti lio caan a si caah mi cu midang ca ruat loin mah himnak ca lawng an ruat. Asinain Baibal Siangngakchia pawl tuahmi hi ruathmanh. Mah lio ah annih cu fakpi in rian an ṭuan, tipep an remh. Khuasik lakah annih cu chun nitlak tikhal tluk a kikmi ti lakah dir in rian an ṭuan. Zeitindah an inkhawh ti kha ahohmanh nih kan hngal lo. Annih nih Jehovah nih thazang a kan pek tiah an ti. Kanmah bantuk in an paw a ṭam caah annih zong rawl an herh tuk ve. Asinain zeidah an tuah? Ei awk kha anmahle an vo cio an lak, a cheu kha anmah ca ah an chiah i a cheu kha Dachau in atu naite a phanmi zumtu khat pawl an pek hna. An conglawmh hna i an hnamh hna. Rawl an ei hlan ah thla an cam. An zapi in an hmuhmi ah an lung a tling i an i nuam. Kan paw a khim ko tiah an ti. Cucaah annih cu a hmaanmi Khrihfa an si tiah ka ruah.”

[Cahmai 19nak i hmanthlak]

Jehovah naihnak caah nifate ṭuanmi rian chung in a caan na caw maw?