Ṭhen 14
Aho Nawlngeihnak Dah Na Ngaih Lai?
1, 2. Nawlngeihnak phun vialte hi harnak chuahtertu an si maw? Fianter tuah.
“NAWLNGEIHNAK” Cu minung tampi caah a nuam lo ngaimi biafang a si. Hi cu fawi tein hngalh khawh a si ko, zeicahtiah rianṭuannak ah siseh, innchungkhar ah siseh, cozah nih si hna seh, nawlngeihnak kha a ningcang loin an hman tawn. A si ning taktak tein, Baibal nih: “Minung nih minung cu a harnak caah a uk cang,” tiah a ti. (Phungchimtu 8:9) A si ko, minung tampi nih mi dang kha puarhrannak le mah ca ṭhatnak lam lawngin an uk cang hna.
2 Sihmanhsehlaw nawlngeihnak kip nih harnak an chuahter lo. Tahchunhnak ah, kan pum nih kanmah cungah nawl a ngei ti khawh a si. Kan pum nih thaw chuah awk, ei awk, din awk, le ih awkah “nawl a kan pek.” Hi cu hremnak a si maw? Si hlah. Hi halnak hna zulhnak cu kanmah ṭhatnak caah a si. Kan pum herhnak bangin zulhnak cu mah duhnak tel loin tuahmi sihmanhsehlaw, lungtho tein a nawl kan ngaih a herhmi nawlngeihnak phun dang tampi a um. Tahchunhnak cheukhat hi ruat hna hmanh.
CUNGNUNG BIK NAWLNGEITU
3. Zeicahdah Jehovah cu “Cungnung Bik Nawlngeitu” tiah a hmaan tein auh a si?
3 Baibal chungah Jehovah cu “Cungnung Bik Bawipa” tiah voi 300 leng a ti. Cungnung bikmi pakhat cu a sang bikmi nawlngeihnak a ngeitu a si. Zeinihdah Jehovah cu hi sining ngeihnak nawl a pek? Biathlam 4:11 nih a leh: “Jehovah kan Pathian, nangmah cu sunparnak le upatnak le lianhngannak kha hmuh awkah naa tlak, zeicahtiah zeizong vialte kha nangmah nih na ser hna i nangmah duhnak bangin annih cu ser an si i an nung.”
4. Jehovah nih a nawlngeihnak cu zeitin hman awk indah aa thim?
4 A kan Sertu a si bangin, Jehovah nih a nawlngeihnak kha a duh bangin hmannak nawl a ngei. Cucu ṭih a nung tukmi a lo ko lai, a hleice in Pathian cu “a hmual a fak tuk hringhranmi ṭhawnnak” a ngei ti kan ruah tikah a lo khun. Amah cu “A Lianngan Bikmi Pathian” tiah auh a si. Hi biafang cu Hebru holh ah huham a ngei tuk hringhranmi thazang a ngei timi sullam a ngei. (Isaiah 40:26; Genesis 17:1) Asinain Jehovah nih a ṭhawnnak cu mi ca i a ṭhami lam lawngin a langhter, zeitintiah a biapi bikmi a ziaza cu dawtnak a si.—1 Johan 4:16.
5. Zeicahdah Jehovah a nawlngeihnak ngaih cu a har lo?
5 Aa ngaichihlomi hna kha dantatnak an cungah ka tlunter lai tiah Jehovah nih ralrin a pe nain, amah cu a biapi bikin, “a hmaanmi Pathian, zumh awk tlak Pathian, a biakam le a dawt-velngeihnak kha amah a dawmi hna le a nawlbia a zulmi hna cungah a hmunhtermi,” in Moses nih a rak hngalh. (Deuteronomi 7:9) Ruat tuah hmanh! Universe i Cungnung Bik Nawlngeitu nih amah kha biak awkah hramhram in a kan hnek lo. Cunakin, a dawtnak ruangah amah sinah kannih cu hnuh kan si. (Rom 2:4; 5:8) Jehovah a nawlngeihnak tang i toidawrnak cu lawmhnak lam tu a si deuh lehlam, zeicahtiah amah nawlbia hna cu kanmah ṭhatnak bik caah a si zungzal—Salm 19:7, 8.
6. Eden dum chungah nawlngeihnak kong he aa tlaimi bia cu zeitindah a rak chuah i, a phichuak zeidah a si?
6 Hmasa bik kan nu le kan pa nih Pathian nawlngeitu ngan bik a sinak kha an rak al. Zeidah a ṭha i zeidah a chia ti kha anmah caah anmah tein biakhiah an rak duh. (Genesis 3:4-6) Cu ruangah annih cu an Paradis inn in ṭhawl an rak si. Khi can thawkin, Jehovah nih minung cu a tling lo nain ningcang tein a ummi bupi chungah an um khawh nak hnga nawlngeihnak inn kha saknak nawl a pek hna. Cu nawlngeihnak cheukhat hna cu zeidah an si i, zeitluk tiangin an nawl ngai hna seh ti dah Jehovah nih a kan duh?
“A SANG DEUHMI NAWLNGEITU HNA”
7. “A sang deuhmi nawlngeitu hna” cu ahotedah an si i, an umhmun cu Pathian nawlngeihnak he aa tlaiin zeitindah chim a si?
7 Lamkaltu Paul nih: “A sang deuhmi nawlngeitu hna kuttangah thlarau (soul) kip i dawr hna seh, zeicahtiah Pathian hnatlaknak loin zeibantuk nawlngeitu hmanh an um kho lo,” tiah a rak ṭial. Ahotedah a sang deuhmi nawlngeitu hna cu an si? A hmailei i a hun changmi cang hna i Paul a bia nih annih cu minung cozah nawlngeitu an si ti a langhter. (Rom 13:1-7; Titas 3:1) Minung cozah nawlngeitu hna kha Jehovah nih a chuahtermi hna cu an si lo, sihmanhsehlaw amah nawl peknak thawngin an ummi a si. Cucaah Paul nih: “Nawl a ngei liomi hna cu anmah i zohchihnak hmunah Pathian nih a chiahmi hna an si,” tiah a rak ṭial khawh. Mah nihcun vawlei nawlngeitu hna kong kha zeidah a langhter? Pathian nawlngeihnak nakin a niam deuh, a nauta deuh ti a langhter. (Johan 19:10, 11) Cuasicaah, minung nawlbia le Pathian nawlbia aa ralchan tikah, Krifa hna cu Baibal cawnpiakmi an chiaṭha thleidannak lungthin nih a hruai hna awk a si. “Minung nakin Pathian kha uktu bawi in a nawl an ngaih deuh lai.”—Lamkaltu 5:29.
8. A sang deuhmi nawlngeitu hna sinin zei ṭhathnemnak dah na hmuh i, an nawl na ngaihnak cu zeitindah na langhter khawh lai?
8 Asinain, caan tampi cu, cunglei cozah nawlngeitu hna cu, “kanmah ṭhatnak caah Pathian rianṭuantu” an si. (Rom 13:4) Zeibantuk lam indah? A si ko, a sang deuhmi nawlngeitu hna nih an kan tuahpiakmi ca peknak rian, palik le mei ralrinnak, thianhhlimhnak, le fimthiamnak ti bantuk pawl hi ruat hna hmanh. “Hi ruang ahhin ngunkhuai nan pekmi cu a si, zeitintiah annih cu zapi caah Pathian sal an si i a rian kha an ṭuan zungzal,” tiah Paul nih a ṭial. (Rom 13:6) Ngunkhuai asiloah a dang upadi he aa tlaimi ṭuanvo pawl he aa tlaiin, “a hmaan tein kan tuah awk a si.”—Hebru 13:18.
9, 10. (a) A sang deuhmi nawlngeitu hna cu Pathian khuakhannak he zeitindah an i tlak? (b) A sang deuhmi nawlngeitu hna ralchan cu zeicahdah a palh?
9 A caancaan ahcun, a sang deuhmi nawlngeitu hna nih an nawlngeihnak kha a ningcang loin an hman tawn. Mah nihcun an nawl ngaihnak ding ṭuanvo in a kan luatter maw? Luatter hlah. Hi nawlngeitu hna i an tuahnak ṭhalo vialte kha Jehovah nih a hmuh ko. (Phungthlukbia 15:3) Minung uknak a zoh sawh konak nihhin an ṭhatlonak kha aa hmuhter duh lo tinak a si lo; kanmah zong cuticun tuahter a kan duh ve lo. A hmaan tein, Pathian nih a rauh hlanah “hi pennak vialte hi hrawk in a donghter dih hna lai i,” a dingmi amah cozah in a thlen cang lai. (Daniel 2:44) Sihmanhsehlaw cu uknak a hung um hlan tiang, a sang deuhmi nawlngeitu hna cu san a tlaimi timhnak pakhat kha an ṭuan.
10 “Nawlngeitu a ralchanmi cu Pathian khuakhannak a ralchanmi an si,” tiah Paul nih a fianter. (Rom 13:2) A sang deuhmi nawlngeitu hna cu daihnak le remnak kha a tawkfang chuahter awkah Pathian “khuakhannak” a si. Hihi a um lo ahcun tuaihmalnak le uk khawhlonak nih a khuh dih lai. Anmah ralchan cu Baibal he aa tlak lo lengah hruh zong a si. Tahchunhnak ah: Nangmah cu pum hlainak na hmuh i na hma kha hri in an in ṭhit i an peh tiah hei ruat hmanh. Cu an ṭhitnak hri hna cu na pum cheubang a si lo nain caan zeimawzat chung caah timhnak pakhat an tlin ter. A caan a zat hlanin phoihnak nih harnak a chuahter khawh. Cubantukin, minung cozah nawlngeihnak cu Pathian a hramthawk timhnak cheubang a si ve lo. Sihmanhsehlaw, aPennak nih vawlei kha tlamtling tein a uk dih hlan tiang, minung cozah nih minung bu hna kha hmunkhat ah an komh hna i, atu lio caan ca i Pathian duhnak he aa tlakmi rian kha an ṭuan. Cucaah kannih cu Pathian nawlbia le a nawlngeihnak kha biapi deuh in kan ruat ko nain, a sang deuhmi nawlngeitu hna uknak kha kan ngaih awk a si.
INNCHUNGKHAR CHUNG I NAWLNGEIHNAK
11. Lu sinak phung hrampi kha zeitindah na fianter lai?
11 Innchungkhar cu minung bu ah a hrampi unit a si. Cu chung ahcun nu le va hna nih ṭhatnak tampi a chuakmi hawikomhnak an hmuh i, fale kha upa an sinak ding caah zohkhenh le cawnpiak an si. (Phungthlukbia 5:15-21; Efesa 6:1-4) Cubantuk upat awk tlakmi khuakhannak cu innchung khar mi hna daite le rem tein an um ṭi khawhnak ding lam in tuah a si. Mah cu tlamtlinternak ca i Jehovah a lam cu lu sinak phunglam 1 Korin 11:3 i kan hmuhmi hi biafang hna hin a tawinak in a chim: “Pa kip lu cu Kri a si; nu lu cu pa a si; Kri lu cu Pathian a si.”
12, 13. Ahodah chungkhar lu a si i, Jesuh nih lu sinak a hmannak thawngin zeidah kan hngalh khawh?
12 Pa cu innchungkhar lu a si. Asinain amah cungah lupakhat—Jesuh Kri—a um. Paul nih: “Vale hna, Kri nih krifabu kha a dawt i a caah a nunnak a pek bantukuin nan nupile kha daw chin lengmang ko hna u,” tiah a rak ṭial. (Efesa 5:25) Jesuh nih krifabu kha a tuah zungzal bantukin pa pakhat nih a nupi kha a tuah ve a si ahcun Kri uknak tangah aa dornak alanghter a si. (1 Johan 2:6) Nawlngeihnak nganpi Jesuh cungah pek a si cang, sihmanhsehlaw a si khawh chungin lungnemnak, dawtnak, le aa tlak ning tein a hman. (Matthai 20:25-28) Minung in a rak um lio ah a nawlngeihnak umhmun kha a ningcang loin a rak hmang bal lo. Amah cu nemnak le toidawrnak thinlung a rak ngei i, a hnu zultu pawl kha “sal” tiah au loin “hawi” tiah a rak auh hna. “Dinhnak kha kan pek hna lai,” tiah bia a rak kam hna i, cucu a rak tuah taktak..—Matthai 11:28, 29; Johan 15:15.
13 Jesuh zohchunh awk a sinak nih Krifa lu sinak cu puarhrannak in uknak a si lo ti kha vale cu a cawnpiak hna. Cunakin, upat awk tlakmi le mah ṭhatnak hlawt in dawtnak tu a si. Mah nihcun mahle innchung kha kut le ke in a si zongah, hmurka in asi zongah a ningcang loin tuah awk a si hrimhrim lo ti a fianter. (Efesa 4:29, 31, 32; 5:28, 29; Kolose 3:19) Krifa pa pakhat nih a nupi kha a ningcang loin a tuah ahcun, rian ṭha dang a tuahmi vialte cu nan ngeilo ah a cang dih lai i, a thlacamnak zong dontu a ngei lai.—1 Korin 13:1-3; 1 Piter 3:7.
14, 15. Zeitindah Pathian hngalhnak nih nupi pakhat cu a va tangah i dor awkah a bawmh?
14 Pa pakhat nih Kri nunning aa zohchunh ahcun, a nupi caah Efesa 5:22, 23 bia hi zulh awkah a fawi deuh lai: “Nupi hna cu Bawipa tang i nan i dor bantukin nan vale tangah i dor ko u, zeicahtiah Kri cu krufabu lu a si bangin pa pakhat cu a nupi lu a si ve.” Pa pakhat cu Kri tangah aa dor awk a si bangin nupi pakhat zong nih a va tangah aa dor ve awk a si. Baibal zong nih thil a ti khomi nupile cu Pathian he aa tlaimi fimnak le rianṭuan an teimaknak ruangah hmaizah awk le thangṭhat awk an si tiah a fianter.—Phungthlukbia 31:10-31.
15 Krifa nupi pakhat i a va uknak a ngaihnak cu ri ngeilomi a si lo. A sullam cu thil pakhatkhat kong i minung nawlngaihnak cu Pathian nawlbia buarnak a si ahcun, minung nakin Pathian nawl cu ngaih deuh awk a si tinak a si. Asinain, nupi pakhat i a fekmi dirhmun cu “daihnak lenemnak thinlung” he a si awk a si. Pathian hngalhnak nih amah cu nupi ṭha deuh ah a canter cang ti kha a langhter awk a si. (1 Piter 3:1-4) A zumlomi nupi a ngeimi Krifa pa pakhat zong cubantuk cu a si ve awk a si. Baibal phunglam a zulhnak nih a ṭha deuhmi va ah a canter ve awk a si.
16. Seinomi hna nih Jesuh a rak chiahtakmi zohchunh awk kha zeitindah an i cawn khawh lai?
16 Efesa 6:1 nih fale an rian kha hitin a chim: “Fale hna, Bawipa duhnak he aa tlakin, nan nu le nan pa bia kha ngai ko u, zetintiah hi cu a dingmi a si.” Krifa fale nih Jesuh a nunning, a ṭhan lio i a nu le a pa nawlngai in a rak ummi kha an i zohchunh i an zulh ve. Nawlngaimi ngakchia pakhat in “Amah cu fimnak in siseh pum in siseh a rak ṭhang i Pathian le minung hmai ah mithmai ṭha a hmu.”—Luka 2:51, 52.
17. Nu le pa nih nawlngeihnak an hmanning lam nih an fale cungah zei hmual dah a ngeih?
17 Nu le pa hna nih an ṭuanvo an ṭuanning nih an nawlngeihnak kha an fale nih an ngaih lai le ngaih lai lo cungah tampi rian a ṭuan. (Phungthlukbia 22:6) Cucaah nu le pa hna nih anmah le anmah kha ṭha tein hitin biahalnak an i tuah awk a si: ‘Ka nawlngeihnak kha dawtnak in maw asiloah puarhrannak in dah ka hman?’ ‘A thlahthlam tukmi maw ka si?’ Pathian a upatmi nupa pakhat cu dawtnak le zawnruahnak a ngei lai nain Pathian upatnak phunglam i tlaihnak ahcun a fek i a fiangmi a si lai. Aa tlak ning tein, Paul nih: “Pale hna, nan fale kha an thin hung seh tiin tuah hna hlah u, sihmanhsehlaw Jehovah cawnpiaknak le thinlunglei phunglam ning tein ṭhanter hna u,” tiah a rak ṭial.—Efesa 6:4; Kolose 3:21.
18. Nu le pa nih cawnpiaknak cu zeitindah tuah awk a si?
18 Nu le pa hna nih an cawnpiak ningcang kha ṭha tein an i hlathlai awk a si. An fale nih kan nawl kan ngai hna sehlaw lawmhnak chuahter hna seh ti an duh a si ahcun cutin an i hlathlai khun awk a si. (Phungthlukbia 23:24, 25) Baibal chungah cawnpiak chimhhrinhnak timi cu a biapi bikin lamhruainak phun a si. (Phungthlukbia 4:1; 8:33) Cucu thin hunnak le puarhrannak he si loin dawtnak le nemnak he aa sengtlaimi a si. Cucaah Krifa nu le pa hna cu an fale an chimhhrinh tik hna ah fimnak le sumnak he an tuah a herh—Phungthlukbia 1:7.
KRIFABU CHUNG I NAWLNGEIHNAK
19. Krifabu chungah ningcang ṭha kha Pathian nih zeitindah a rak pek?
19 Jehovah cu ningcang tein a ummi Pathian a si caah, a miphun pawl caah nawlngeihnak he a khat i a ningcang tein a ummi lamhruainak a pek hna lai ti cu aa tlakmite a si. Cu he aa tlakin, Krifabu Lu ah Jesuh kha rian a pek cang. (1 Korin 14:33, 40; Efesa 1:20-23) Mit hmuh loin Kri lamhruainak tangah, krifabu kip ah rian pekmi krifa upa pawl nih, tuurun kha duhnak taktak, lungthote le dawtnak in, an zohkhenh khawh nak hna hnga khuakhannak pakhat kha Pathian nih nawl a pek. (1 Piter 5:2, 3) Bu rianṭuantu hna nih krifa upakha lam a phunphun in an bawmh hna i krifabu chungah a man a sung ngaimi rian hna kha an ṭuan ve.—Filipi 1:1.
20. Zeicahdah rian pekmi Krifa upa hna tangah kan i dawr awk a si i, zeicahdah mah cu a ṭhathnem?
20 Krifa upa pawl kong he aa tlaiin Paul nih hitin a ṭial: “Nan lak i lamhuraitu pawl kha an bia ngai hna u law an nawl zul hna u, zeicahtiah an rian ṭuan ningcang kha Pathian hmai ah chim an duh te lai caah nannih kha ṭha tein an in zohkhenh hna; cutikah an rian kha lunglawm tein an ṭuan lai i nan caah rawhralnak a si hnga dingmi ngaihchia in an ṭuan lai lo.” (Hebru 13:17) Fim ngaiin, Pathian nih Krifa zohkhenhtu hna kha krifabu chung mi thlaraulei an herhnak zohkhenhnak rian kha a pek hna. Hi upa hna cu biaknak lamhruaitu bu an si lo. Annih cu Pathian rianṭuantu le sal an si i, kan Bawipa Jesuh Kri nih a rak tuah bantukin an hawile a bia vemi hna herhmi kha an ṭuanpiak hna. (Johan 10:14, 15) Baibal ningin thiamnak a ngeimi upa hna cu kan ṭhanchonak le kan thlaraulei ṭhanchonak a kan duhpiakmi an si ti hngalhnak nih anmah he rian ṭuan ṭi in an nawl ngaih awkah thazang a kan pek.—1 Korin 16:16.
21. Rian pekmi upa hna nih krifa unau hna thlaraulei in bawmh awkah zeitindah an i zuam?
21 A caancaan ah, tuu cu lam an pial kho asiloah harnak a pe khomi vawlei thil hna ruangah harnak an phan kho. Tuukhal Ngan lamhruainak tangah, upa hna nih tuukhal bawmtu in anmah zohkhenhnak tang i a ummi hna an herhnak ahkhan i hliphlau ngaiin pumpak pakhat cio kha ralring tein an zohkhenh hna. (1 Piter 5:4) Krifabu chungummi kha an leng hna i tha peknak bia an chimh hna. Pathian miphun hna an daihnak kha hrawh awkah Rulhreu nih aa zuam ti kha an hngalh caah upa hna cu zeibantuk harnak kong an ceih tik paoh ah cunglei in a rami fimnak kha an hman. (Jeim 3:17, 18) Jesuh theng nih thla a rak cammi lungrualnak le zumhnak i khahnak caah fakpi in rian an ṭuan.—Johan 17:20-22; 1 Korin 1:10.
22. Palhnak kong he aa tlaiin upa hna nih zei bawmhnak dah an pek hna?
22 Krifa pakhat cu sualnak pakhatkhat a tuah ruangah harnak a phanh asiloah a lung a dongh ahcun zeidah a tuah lai? Hnangamnak a pemi Baibal ruahnak cheuhnak le amah ca i upa pawl nih lung tak tein thlacamnak nih thlaraulei ngandamnak hmuh ṭhan awkah a bawmh khawh. (Jeim 5:13-15) Thiangthlarau thawngin rian pekmi hi mi hna cu palhnak lam a zulmi hna asiloah krifabu thlaraulei le ziazalei thiannak caah ṭihnung a chuahtertu hna kha chimhhrinhnak le an palhnak hmuhsak in remh ṭhan khawhnak nawl an ngei. (Lamkaltu 20:28; Titas 1:9; 2:15) Krifabu thianter awk caah, pumpak pakhat kip nih palhnak nganpi kha an phuan a herh. (Levitikas 5:1) Sualnak nganpi a tuahmi Krifa pakhat nih Baibal ningin chimhhrinhnak le remhnak kha a cohlan i, ngaihchihnak taktak kha a langhter ahcun, amah cu bawmh a si ko lai. Asinain, Pathian nawlbia kha a buar chin lengmang i aa ngaichih lomi hna cu chuah an si lai.—1 Korin 5:9-13.
23. Krifabu ṭhatnak caah Krifa zohkhenhtu hna nih zeidah an bawmh?
23 Siangpahrang a simi Jesuh Kri kut tangah, thlaraulei in patling a simi pa pawl kha Pathian miphun hna hnangamnak, kilvennak, le dinhnak pek awkah rian pek an si lai tiah Baibal nih a rak chimchung cang. (Isaiah 32:1, 2) Annih cu thlaraulei ṭhanchonak karhter awkah thawngṭha chimtu hna, tuukhal hna le saya hna in lamhruainak an tuah lai. (Efesa 4:11, 12, 16) Krifa zohkhenhtu hna nih a caancaan ah an hawile a zum vemi hna kha an cimhhrinh, an mawhchiat i, an forh hna nain, Baibal cherhchan in upa pawl i a ngan a dammi cawnpiaknak hmannak nih mi vialte kha nunnak lam ah hmunh khawh awkin a bawmh hna.—Phungthlukbia 3:11, 12; 6:23; Titas 2:1.
NAWLNGEIHNAK HE AA TLAIMI JEHOVAH HMUHNING KHA COHLANG U
24. Kannih cu zei kong ahdah ni fate hneksak del kan si?
24 Hmasa bik mipa le minu cu nawlngeihnak ngaihnak he aa tlaiin hneksak an rak si. Kanmah zong cubantuk hneksaknak cu nifate kan tong ve ti cu khuarruahhar awk a si lo. Satan Rulhreu nih minung chungah ralchan duhnak thinlung kha a karhter cang. (Efesa 2:2) Mah tein i uknak lam tu hi mi dang tang i nawlngaihnak nakin a sang deuh le duhnung deuh in langhter a si cang.
25. Vawlei a ralchan duhnak thinlung alnak le Pathian nih a hmanmi le nawl a pekmi nawlngeihnak ngaihnak a ṭhathnemnak cu zeidah an si?
25 Sihmanhsehlaw hi vawlei ralchan duhnak thinlung kha kan hlawt hrimhrim awk a si. Cutin na tuahnak thawngin, Pathian upatnak in nawlngaihnak nih laksawng tampi a chuahter ti na hngalh lai. Tahchunhnak ah, vawlei nawlngeitu hna cung i harnak tuah aa zuammi hna an ton tawn mi lungretheihnak le awlokchawnnak kha kan hrial khawh. Innchungkhar tampi i a cang tawnmi lung i khahlonak kha kan ṭhumh khawh deuh lai. Zumhnak aa khatmi kan Krifa unau hna he dawtnak le remnak he hawikomh nak a ṭhathnemnak kha kan hmuh khawh lai. Zei dang vialte nakin, Pathian upatnak in nawlngaihnak nih Cungnung Bik Nawlngeitu Jehovah he a ṭhami pehtlaihnak a chuahter lai.
NA HNGALHNAK KHA I HNEKSAK TUAH
Jehovah nih a nawlngeihnak kha zeitindah a hman?
“A sang deuhmi nawlngeitu hna” cu ahotedah an si i, zeitindah anmah kut tangmi in kan nun khawh lai?
Lu sinak phunglam nih innchungkhar mi pakhat cio cungah zei ṭuanvo dah a chiah?
Krifabu chungah nawlngaihnak kha zeitindah kan langhter lai?
[Box on page 134]
NAWLNGAIMI, HRAWK HMANGLOMI
Jehovah hngaltu hna nih mipi sin i phung an chimnak thawngin Pathian Pennak kha a hmaanmi daihnak le himnak caah minung ruahchan awk pakhat lawnglawng a ummi a si tiah an langhter. Sihmanhsehlaw Pathian Pennak kong lungtho tein a thanhtu hna cu an umnak ram cozah hna kha hrawh awkah duhnak a ngeimi an si hrimhrim lo. Cu he ralkah in Hngaltu hna cu upat awk atlak bikmi le upadi a zul bikmi ramchungmi lakah an i tel ve. “Biaknak bu vialte hi Jehovah Hngaltu bantuk si dih hna sehlaw lainawnnak, inn baohnak, ziaza rawhralnak, thongtla, atom bom, tihi an um lai lo. Innka zong chun he zan he hrenh a herh lai lo,” tiah Afrika i ram pakhat in bawi pakhat nih a rak ti.
Hi kong hi an hngalh caah, ram tampi i bawi tampi nih Hngaltu pawl an phungchimmak rian kha hnahnawhnak pek loin ṭuannak nawl an pek hna. Ram dang ah nawlngeitu hna nih Jehovah Hngaltu pawl cu ṭhatnak a tuahtu an si ti an hun hngalh tik ahcun, an khamnak hna le an thlauhnak hna kha an hrawh ṭhan. A sang deuhmi nawlngeitu hna an bia ngaihnak kongah lamkaltu Paul nih a ṭial bantuk hin a si ko: “Ṭhatnak kha tuah u law, an sinin thangṭhatnak kha nan hmuh lai.”—Rom 13:1, 3.