Nunning le Rianṭuannak Tuahchunhnak Cauk caah Cherhchanmi
NOVEMBER 4-10
BAIBAL AH THUHMI RO HNA | 1 JOHAN 1-5
“Vawlei le A Chung Thilri hi Tlaihchan hna Hlah U”
(1 Joh. 2:15, 16) Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo. 16 Vawlei ta a simi thil paohpaoh—pumsa duhnak te hna, mi nih zoh an duhmi thil hna, mi nih porhlawtnak ah an hmanmi thil te hna hi Pa sinin a rami an si lo; vawlei in a rami lawngte an si dih.
Jesuh Tuah Piakmi I Zohchunh Awk Kha Tuah
13 Hi vawlei thil zeizong vialte hi a ṭha lomi an si dih lo tiah mi a cheu nih an ruah men lai. Cuti a si hmanhah hi vawlei le vawlei i lungthin a lami hna nih Jehovah kan biaknak khan fawite in kan lung a vaihter khawh. Hi vawlei nih hin zei ti hmanh in Pathian he a kan naihter kho lo. Cu a si caah, vawlei thil, mah thil cu a ṭhalomi a va si lo hmanhah, kan hun duh deuhdeuh a si ahcun, ṭihnungmi lam ah kan kal cang. (1 Timote 6:9, 10) Mahhlei ah, vawlei thil tamdeuh cu a hmaan tein an ṭha lo, a kan rawhter khawh. Zaang-ennak, thilri biapi chiahnak asilole nulepa lei ziaza ṭhatlonak a langhter khunmi baisikup asiloah TV kan zoh a si ahcun, kha thil kha cohlan khawhmi thil ah an hung cang kho i a kan tukforh khawh. An nuncan ṭhanchoter nak ca asilole rian karhchoter nak caanṭha caah a bik in a lung a chia khunmi he kan i komh ahcun, kha hna kha kanmah ca zongah a biapi bik cem an hung si kho.—Matthai 6:24; 1 Korin 15:33.
(1 Joh. 2:17) Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.
Zei Bantuk Mi Dah Na Si Awk A Si Ti Kha Ruat
18 Vawlei “chung thilri” dohnak ah a kan bawm khomi a dang pakhat cu Johan chimmi mah bia, i cinkennak hi a si: “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.” (1 Johan 2:17) Satan vawlei cu a hmun zungzal dingmi a lo nain nikhatkhat cu a lo te lai. Hi vawlei thil vialte cu a rauhhlan ah an lo dih cang lai ti i cinkennak nih Satan hlennak doh khawh awkah a kan bawmh lai.
Thlaraulei Lungvar Hna Kha Hlathlai
(1 Joh. 2:7, 8) Ka dawtle hna, nan sin i ka hun ṭialmi hi nawlbia thar a si lo; a hramthawkte i nan rak theih lengmangmi nawlbia hlun kha a si ko. Cu nawlbia hlun cu nan rak theih cangmi bia kha a si. 8 Asinain, nan sin i ka hun ṭialmi nawlbia hi a thar a si; zeitindah a thar a si tiah muihnak cu a lo cang i ceunak taktak cu a tlang cang. Cucu Khrih nih khan a langhter i nanmah zong nih nan langhter ve.
Jehovah Nawlbia Cu Bochan Awk A Tlak
14 Khrihfa Grik Baibal ah pakhat le pakhat i daw u timi nawlbia tampi a um. Jesuh nih a pahnihnak a ngan bikmi nawlbia cu “na innpa cu nangmah naa dawt bantukin na dawt lai” ti a si tiah a chim. (Matt. 22:39) Jesuh a nau a simi Jeim nih dawtnak kha “pennak upadi” tiah a auh. (Jeim 2:8) Cun lamkaltu Johan nih hitin a ṭial: “Ka dawtle hna, nan sin i ka hun ṭialmi hi nawlbia thar a si lo; a hramthawkte i nan rak theih lengmangmi nawlbia hlun kha a si ko . . . asinain nan sin i ka hun ṭialmi nawlbia hi a thar a si.” (1 Johan 2:7, 8) Johan nih “nawlbia hlun” a ti tikah zeidah a chimduhmi a si? Dawtnak ngeih ding timi nawlbia kha a chimduhmi a si. Mah nawlbia cu Jesuh nih hlanlio piin, ‘a hramthawk tein’ a rak chim cang caah “a hlun” a si. Asinain zultu pawl nih thil sining thar ah mah zawnruat lo dawtnak an langhter a hauh te lai caah mah nawlbia cu “a thar” zong a si. Tuchan zongah, vawlei mi tam deuh nih an ngeihmi mah zawnruahnak lungput ngeih lo awkah ralrin pek kan si caah kan i lawm. Kannih cu mah zawnruat lo dawtnak kan langhter.
(1 Joh. 5:16, 17) Mi pakhatkhat nih, a unau pakhatkhat kha, thihnak tiang a phanmi a si lomi sualnak a tuah kha a hmuh ahcun, nunnak a petu ding Pathian sinah khan thla a campiak lai—cucu thihnak tiang a phanmi sualnak a tuah lomi hna caah khan a si. Sihmanhsehlaw thihnak tiang a phanmi sualnak a um i cu kong ahcun Pathian sinah thla nan cam lai ka ti lo. 17 Palh in tuahmi thil vialte hi sual an si ko, sihmanhsehlaw sualnak vialte hi thihnak a a phanmi sualnak an si lo.
it-1 862 ¶5
Ngaihthiamnak
Midang ca le Khrihfabu dihlak ca hmanhah Pathian ngaihthiamnak caah thlacam cu aa tlakmi a si. Moses nih Israel miphun caah cutin a rak tuah, Jehovah sinah an sualnak kha a phuan i ngaihthiam a rak hal caah Jehovah nih a ngaihthiam hna. (Nam. 14:19, 20) Solomon zong nih biakinn pekchanh lioah a miphun nih sualnak an tuah i an kir ṭhan tikah ngaihthiam dingin Jehovah sinah thla a cam. (1 Si. 8:30, 33-40, 46-52) Ezra nih Judah ram ah a kir ṭhanmi mi hna i an sualnak kha zapi hmaiah a phuan. Lungtak tein thla a cammi kha mi pawl nih an theih tikah Jehovah ngaihthiamnak hmuh awkah thil tuah dingin a forh hna. (Ezr. 9:13–10:4, 10-19, 44) Jeim nih thlaraulei a zawmi nih Khrihfa upa hna kha auh in thla camter awkah a kan forh, cutin tuahnak in “sualnak a tuahmi kha ngaihthiam a si lai” tiah a ti. (Jeim 5:14-16) Asinain thiang thlarau a ralchanh i ngaihthiam khawh lomi, hramhram in tuahmi “thihnak tiang a phanmi sualnak” a um. Khrihfa a simi nih cu bantuk sualnak a tuahmi hna caah thla campiak awk a si lo.—1 Joh. 5:16; Matt. 12:31; Heb. 10:26, 27; SUALNAK, I; THLARAU ah zoh.
Baibal Relnak
(1 Joh. 1:1–2:6) A hramthawk tein a rak um cangmi bia kong kha ca in kan in kuat hna: cucu kan hna in kan theihmi le kan mit in kan hmuhmi kha a si: a si, kan mit in kan rak hmuh i kan kut in kan rak tawngh. 2 Cu nunnak cu hmuh khawhmi i a hung can tikah kannih nih khan kan rak hmuh; cucaah cu kong cu kannih nih kan chim i Pa he a rak umṭimi zungzal nunnak, kannih sinah langhter a simi kong kha kan in chimh hna. 3 Kannih nih kan hmuhmi le kan theihmi cu nannih zong kha kan in chimh hna, zeicah ti ahcun Pa le a Fapa Jesuh Khrih he hawikomhnak kan ngeihmi chungah khan nan i tel khawh ve nakhnga kan duh. 4 Hi ca kan in kuat hna cu kan i lawmhnak kha a tlin nakhnga caah a si. 5 A Fapa sinin kan theih i nannih kan in thanhmi hna bia cu hihi a si: Pathian cu ceunak a si i a chungah muihnak zeihmanh a um lo. 6 Cucaah kannih nih amah he hawikomhnak kan ngei kan ti i muihnak chung i kan um ko ṭung ahcun, kan bia in siseh, kan tuahnak in siseh, lih kan chim a si. 7 Sihmanhsehlaw ceunak chung i a um bantukin kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thenh. 8 Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. 9 Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thenhpiak dih lai. 10 Asinain kan sual lo kan ti ahcun Pathian cu lihchim ah kan ser i a bia cu kan chungah a um lo. 2 Ka fale hna, hi ca kaan kuat hna cu sualnak kha nan tuah nakhnga lo caah a si; sihmanhsehlaw pakhatkhat nih sualnak nan tuah ahcun a dingmi Jesuh Khrih, Pa sin i bia a kan chimpiaktu kha kan ngei ko. 2 Cun kan sualnak ngaihthiam kan sinak zong cu Khrih thawng cun a si i kanmah sualnak lawng si loin mi vialte zong an sualnak kha ngaihthiam an si lai. 3 Pathian kha a nawl kan ngaih ahcun amah kha kan hngalh tiah fiang tein kan hngalh. 4 Pakhatkhat nih, “Amah cu ka hngalh hrimhrim,” tiah a ti i a nawl a ngaih ṭung lo ahcun, cu pa cu mi lihchim a si i a chungah biatak zeihmanh a um lo. 5 Sihmanhsehlaw a bia a ngaimi kha Pathian a dawtnak a tlingmi cu a si. Pathian chungah kan um ti fiang tein kan hngalhnak ding cu hihi a si: 6 Pathian chungah kan um, a timi paoh nih cun Jesuh Khrih bantukin kan um awk a si.
NOVEMBER 11-17
BAIBAL AH THUHMI RO HNA | 2 JOHAN 1–JUDAS
“Biatak Chung Um Awkah Kan Doh A Hau”
(Judas 3) Ka dawtmi ka hawile hna, kan dihlak in kan i hrawmmi khamhnak kong kha ca in, in chim hna ning ti cu ka duh zungzalmi a si. Sihmanhsehlaw atu ah hin, Pathian nih voikhat ah za lak in a mi a pekmi hna zumhnak kha rak ṭanh u, tiah in chimh hna kha a herh hringhran in ka hngalh caah cu kong cu ca in kua loin kaan um kho hna lo.
‘Bawipa Thawngin Nan Thazaang Cu Ṭhawnter Chin Ko U’
8 Cathiang nih a hrampi Satan thil tining hna kha a langhter caah Satan timhnak kha kan hngalh. (2 Korin 2:11) Miding Job kha Satan nih a rak doh tikah sipuazi harnak hna, dawtmi pawl thihnak, innchungkhar dohnak, pumsalei sifah innak hna le hawikom sinin hram ngei lomi sualphawtnak hna kha a hman. Cu tikah Job cu a ngaih a chia i Pathian nih a ka hlawt tiin a rak ruah. (Job 10:1, 2) Nihin harnak hna hi dairek in Satan nih a chuahtermi a si theng lai lo nain, mah bantuk harnak kha Khrihfa tampi nih an ton cang, khakha Khuachia nih a hman khawh ko.
9 Thlaraulei ral cu hi donghnak caan ah hin a hung karh thluahmah. Thilri dawizulhnak nih thlaraulei kawltung a khuhmi vawlei ah kan nung. Phung nih a awnh lomi nupa sualnak kha ngaihchiat tertu si loin nuamhnak a hrampi a si tiin zapi theihternak [media] nih a thanh thluangthluan. Cun mi tamdeuh cu ‘Pathian nakin nuamhnak kha a duh deuhmi’ an hung si cang. (2 Timote 3:1-5) Kan “zumhnak caah fakpi in kan doh” lo ahcun mah ruahnak hna nih khan kan thlaraulei rualnak kha a hrawh khawh.—Judas 3, NW.
Thlaraulei Lungvar Hna Kha Hlathlai
(Judas 4) Zeicahtiah kan lakah hin Pathian zei i a rel lomi kha kan hngalh loin an lut i anmah ziaza ṭhalo thuhphenhnak caah khan Pathian vel kong kha a hmaan lo ningin an chim i kan Uktu le kan Bawipa a simi Jesuh Khrih kha an hlawt. Hi bantuk mi hna cu sualphawt an si lai ti kha Cathiang nih hlanpi in a rak chimchung cang.
(Judas 12) Annih cu hawikomhnak rawl nan dumṭi tik i rawl lak i hnawm a ummi bantuk khi an si, ningzah zeihmanh hngal loin an ei i an ding. Anmah zawn lawng an i ruat. Ruah a chungah a um lomi khuadawm, thli nih a choih lengmangmi bantuk khi an si. Fur caan hmanh i thei a tlai lomi thingkung bantuk an si; a hram bongh i a thi taktakmi thingkung bantuk an si.
it-2 279
Hawikomhnak Rawl
Baibal nih hawikomhnak rawl a ti tikah atu le atu tuahmi kha a chim duhmi a si lo. (Judas 12) Mah cu Jesuh Khrih le lamkaltu pawl nih tuah awkah nawl pekmi zong a si lo i tuah hrimhrim dingmi asiloah zungzal in tuahmi zong a si lo. Pumsalei a rummi Khrihfa hna nih a si a fakmi zumtukhat unau pawl dangh awkah an sawmmi hna rawl danghnak kha a si tiah mi cheukhat nih an chim. Pa a ngei lomi, nuhmei, mirum le khua awng a tong lomi ti bantuk thlaraulei unau pawl hmunkhat ah hlunghlai ngaiin an eiṭimi kha a si.
it-2 816
Hnawm
A dang Greek biafang spi·lasʹ, nih lung asiloah ti chung i a ummi lungpang kha a langhter. Mah cu Judas nih ziknawh ei a hmangmi, Khrihfabu chungin lam a pialmi mi cheukhat kha langhternak caah a hmanmi a si. A lang lomi lung cu tilawng caah ṭihnung a si bantukin cu bantuk mi hna cu Khrihfabu caah ṭihnung taktak an si. Cu bantuk mi hna kha Judas nih hitin a ti hna: “Annih cu hawikomhnak rawl nan dumṭi tik i rawl lak i hnawm a ummi bantuk khi an si” tiah a ti.—Jud. 12.
(Judas 14, 15) Cun Adam thawk in vun rel i paruknak a simi Enok nih khan hi hna kong cu hlanpi ah hitin a rak chim, 15 “Zohhmanh, mi vialte kha an bia ceih awk le Pathian zei i a rel lomi misual vialte kha Pathian zeirel loin an um ruang i an tuahmi sualnak vialte le Pathian kha zeirel loin an thangchiatnak vialte ruang i sualphawt awkah Bawipa cu a vancungmi mithiang rel cawk lo hna he an ra lai,” a ti.
“Pathian Lung Kha A Ton”
Enok nih zei kong dah a rak chimchung? “Zohhmanh, mi vialte kha an bia ceih awk le Pathian zei i a rel lomi misual vialte kha Pathian zeirel loin an um ruang i an tuahmi sualnak vialte le Pathian kha zeirel loin an thangchiatnak vialte ruang i sualphawt awkah, Bawipa cu a vancungmi mithiang rel cawk lo hna he an ra lai” timi a si. (Judas 14, 15) Enok nih mah chimchungbia ningin a tling hrimhrim lai tiah a zumh. A caah cun mah chimchungbia ningin Pathian nih a tuah cang bantuk hmanh khi a si. Cucaah a tling hrimhrim lai ti a hngalh caah a tling cangmi bantukin a rak chimnak a si.—Isaiah 46:10.
“Pathian Lung Kha A Ton”
Enok zumhnak nih kan vawlei sining kha Pathian bantukin ka hmu ve maw ti i hal awkah a kan forh. Ralṭha tein a rak thanhmi biaceihnak kong cu amah chan ah siseh, tuchan ah siseh pehtlaihnak a ngei. Enok nih a rak thanh bantukin Noah chan i Pathian zei ah a rel lomi vialte cu Jehovah nih buanchukcho in a hrawh hna. Mah cu a ra laimi, a ngan deuhmi hrawhnak hmelchunhnak a si. (Matthai 24:38, 39; 2 Peter 2:4-6) Tuchan zongah Pathian zei ah a rel lomi vialte biaceih awkah Jehovah cu a thiangmi a vancungmi hna he timhcia a si cang. Cucaah kan dihlak in Enok ralrin peknak kha i cinken in midang sinah kan chim ve awk a si. Mah tikah kan chungkhar le kan hawile cu kanmah leiah ṭan lo zongin an um kho men. A caan ahcun keimah lawng a si timi ruahnak kan ngei kho men. Asinain Jehovah nih Enok kha zeitikhmanh ah a kaltak lo bantukin tuchan i zumhfekmi a salle zong a kaltak bal hna lai lo.
Baibal Relnak
(2 Joh. 1-13) Khrihfa Upa nih ka dawtmi Bawinu le a fale hna kha ca kaan kuat hna. Keimah lawnglawng hi aan dawtu hna ka si lo, biatak kha a hngalmi vialte nih cun an in dawt hna, 2 zeicahtiah biatak cu kan chungah a hmun i kan sinah a um zungzal lai. 3 Pa Pathian le a Fapa Jesuh Khrih nih velngeihnak le zaangfahnak le daihnak cu an kan pek lai i biatak le dawtnak in kan ta an si zungzal lai. 4 Kan Pa nih a kan fial bantukin na fale cheukhat cu biatak in an nung ti kha ka theih tikah ka lung aa lawm tuk hringhran. 5 Cucaah cun ka dawtmi Bawinu, pakhat le pakhat i daw hna u sih tiah kaan fial. Hihi nawlbia thar kaan kuatmi a si lo, a hramthawk tein kan rak ngeih cangmi nawlbia kha a si ko. 6 Atu i ka chimmi dawtnak a sullam cu Pathian nawl zul in kan nun awk a si ti hi a si ko. Cu nawlbia cu, a hramthawk tein nan dihlak in nan rak theihmi kha, i daw niakmak tein kan um dih awk a si, tihi a si. 7 Hlengtu tampi, Jesuh Khrih cu minung in a ra lo pei, a titu hna kha vawleicung ah an i chok tung ko. Cu bantuk mi cu mi hlengtu kha an si i Khrih ral kha an si. 8 Cucaah nan ṭuan lengmang hnawhchanmi kha nan sungh sual nakhnga lo le nan laksawng kha tling tein nan hmuh nakhnga, ralring tein um ko u. 9 Khrih cawnpiaknak chungah um peng loin kar hlei a lammi nih cun Pathian kha an ngei lo. Cawnpiaknak chungah khan a um pengmi nih cun Pa he, Fapa he an ngeih hna. 10 Ahohmanh nan sin i an rat tikah hi cawnpiaknak hi an rak i ratpi lo ahcun, tlun-inn rak awnh hna hlah u; “Na cungah daihnak um ko seh,” ti zongah rak ti hna hlah u. 11 Zeicahtiah cu bantukin a cungah daihnak um seh, ti a duhpiaktu kha a thil ṭhalo tuahmi ah khan aa tel vemi ah a cang. 12 Chimh awk tampi kan ngei ko hna, sihmanhsehlaw ca le cahang in si loin a tlawntu in ka ra in tlawn hna lai i kan i lawmhnak kha a tlinnak lai kan pum in bia kan i ruah lai. 13 Na dawtmi na unaunu fale hna nih daihnak an in kuat.
NOVEMBER 18-24
BAIBAL AH THUHMI RO HNA | BIATHLAM 1-3
“Na Tuahmi Kha Ka Hngalh”
(Biat. 1:20) Ka orhlei kut i na hmuhmi arfi pasarih hna le sui mei vannak pasarih hna an sullam biathli cu hihi a si: arfi pasarih hi Khrihfabu pasarih hna i an vancungmi kha an si i mei vannak pasarih hna hi Khrihfabu pasarih hna kha an si,” tiah a ti.
Zei Bantuk Lungput Dah Na Langhter?
8 Jesuh nih “a orhlei kut in arfi pasarih aa put” ti kha kan i cinken ahcun cu bantuk lungput kha kan hrial khawh lai. “Arfi” nih chiti thuhmi Khrihfa upa pawl kha a bik in a aiawh hna nain Khrihfabu i a ummi Khrihfa upa dihlak zong a aiawh ve hna. Jesuh nih a kut cung i “arfi” kha a duhning paoh in lam a hruai khawh. (Biat. 1:16, 20) Khrihfabu Lu a simi Jesuh nih Khrihfa upa lak i a cangmi kha ṭha tein a hngalh. “A mit cu mei bantukin a alh” i zeipaoh a hmuh dih. Cucaah Khrihfa upa cu remh a herhnak a um ahcun Jesuh nih aa tlakmi caan ah aa tlakmi lam in a remh lai. (Biat. 1:14) Jesuh nih zeihmanh a tuah lo chung cu “a orhlei kut” i a ummi Khrihfa upa kha kan upat hna awk a si. Paul nih hitin a ṭial: “Nan hruaitu pawl kha an bia ngai hna u law an nawl zul hna u. An rian ṭuan ningcang kha Pathian hmai ah chim an duhte lai caah, i din lo in nannih kha an in zohkhenh hna. An nawl nan ngaih hna ahcun an rian kha lunglawm tein an ṭuan lai, nan ngaih hna lo ahcun ngaihchia in an um lai i cucu nan caah a ṭhahnem lai lo.”—Heb. 13:17.
(Biat. 2:1, 2) “Efesa khua i a ummi Khrihfabu vancungmi sinah hiti hin va ṭial tuah: ‘A orhlei kut in arfi pasarih aa put i sui mei vannak pasarih hna lakah aa chawkmi bia cu hihi a si: 2 Na tuahmi kha ka hngalh ko; zeitluk in dah naa zuam le zeitluk in dah lungsau in na um kha ka hngalh. Miṭhalo na inkhawh hna lo kha ka hngalh i lamkaltu an si na loin lamkaltu kan si aa timi hna na hneksak hna le mi lip an si na hliah khawh kha ka hngalh.
Jehovah Nih Khamhnak Kan Hmuh Nakhnga A Kan Huhphenh
11 Biathlam a ngan 2 le 3 i ṭialmi langhnak nih Siangpahrang Jesuh Khrih nih Asia Minor i a ummi Khrihfabu pasarih ah a cangmi thil a hngalh ti kha a langhter. Khrihfabu pasarih sining kha a huap in si loin a dikthliar in a hngalh. Cun Jesuh nih mi cheukhat kong a chimmi zong a um i Khrihfabu pakhat cio kha aa tlak ningin a thangṭhat hna asiloah an herh ning in ruahnak a cheuh hna. Mah langhnak cu kan caah zei sullam dah a ngeih? Khrihfabu pasarih nih 1914 hnu i a nungmi chiti thuhmi kha a aiawh hna. Khrih cawnpiaknak cu a bik in chiti thuhmi hna caah a si ko nain tuchan Khrihfabu dihlak zong mah in ṭhatnak hmuh khawh a si. Cucaah Jehovah nih tuchan a miphun lamhruai awkah a Fapa a hman tiah kan ti khawh. Mah lamhruainak in zeitindah ṭhatnak kan hmuh khawh lai?
w01 1/15 20-21 ¶20
Jehovah A Bupi He Ruang Tein Kalṭi
20 Jehovah i a ṭhangchomi a bupi he ruang tein kalṭi khawh awkah Pathian pekmi Jesuh Khrih cu Khrihfabu ah lu a sinak kha kan cohlan a hau. (Efe. 5:22, 23) Cun Isaiah 55:4 i a chimmi hi cinken awk ṭha a si, hitin a ti: “Amah cu miphun tampi hruaitu le uktu ah ka ser i amah thawngin ka lianhngannak kha ka langhter.” Lamhruainak kong he aa tlaiin Jesuh nih fiang tein a hngalh. Cun a tu pawl kha ṭha tein a hngalh hna i an tuahsernak zong kha a hngalh. Asia Minor ah a ummi Khrihfabu pa sarih kha a hlathlai tikah fiang tein hitin voi nga a chim: “Na tuahmi kha ka hngalh ko.” (Biat. 2:2, 19; 3:1, 8, 15) Jesuh nih a Pa Jehovah bantukin kan herhmi kha a hngalh. Jesuh nih thlacamning a cawnpiak hna hlanah, hitin a rak ti: “zeicahtiah nan Pa nih cun nan hal hlan in nan herhmi cu a hngalh cia ko.”—Matt. 6:8-13.
Thlaraulei Lungvar Hna Kha Hlathlai
(Biat. 1:7) Zohhmanh u, khuadawm sinah khin a ra lio! Mikip nih an hmuh lai, a rak chuntu hna zong nih khan an hmuh lai. Cun vawleicung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen.
Pathian Pennak nih a Ral pawl a Tei hna
10 Biaceihnak kong thanhnak. Mah hnuah Pathian Pennak a ralchanhmi hna nih ṭih a nung deuhmi thil kha an hmuh lai. Jesuh nih “mi Fapa cu a lang lai i khuadawm chung khin lianhngannak le sunparnak he a ra lai” tiah a ti. (Mar. 13:26) Mah kokek sining a lonhmi langhnak nih Jesuh cu biaceihnak kong thanh awkah a ra cang ti kha a langhter lai. Donghnak caan kong he aa tlaimi mah chimchungbia ah Jesuh nih mah caan i a thanh dingmi biaceihnak kong kha a dikthliar in a chim. Mah kong kha tuu le meheh bianabia ah kan hmuh. (Matthai 25:31-33, 46 rel.) Pathian Pennak zumhfek tein a ṭanpimi hna cu “tuu” in biaceih an si lai. Annih nih ‘kan luatnak caan a nai cang’ ti kha an hngalh caah ‘cunglei kha an zoh lai.’ (Luka 21:28) Asinain Pennak a ralchanhmi hna cu “meheh” in biaceih an si lai. Annih nih zungzal in hrawh kan si lai ti kha an hngalh caah “an ṭap lai.”—Matt. 24:30; Biat. 1:7.
(Biat. 2:7) “Hna nan ngeih ahcun, thlarau nih khrihfabu hna sinah a chimmi bia cu ngai ko u! Teitu a simi cu Pathian Dum chung i a khomi nunnak thingkung theitlai einak nawl kha ka pek hna lai,” a ti.
w09 1/15 31 ¶1
Biathlam Cauk Chungin Hrilhfiah—I
2:7 NW—“Pathian paradis” cu zeidah a si? Hi bia hi chiti thuhmi Khrihfa sinah a chimmi bia a si caah hika i paradis cu Pathian a umnak van ram paradis kha a sawh duhmi a si lai. Zumhawktlak chiti thuhmi pawl cu “nunnak thingkung” theitlai einak nawl an hmu lai. A thi kho lomi nunnak an hmuh lai.—1 Kor. 15:53.
Baibal Relnak
(Biat. 1:1-11) Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si. Cu thil hna cu Khrih nih a sal Johan kha a hngalhter i cu hngalhtertu ahcun a vancungmi kha a thlah i 2 Johan nih cun a hmuhmi thil vialte cu a chim dih. Pathian sinin hmuhmi bia le Jesuh Khrih nih a phuanmi biatak Johan nih a chim chinmi cu hihi a si. 3 Hi cauk a relmi le profet bia a ngai i hi cauk chung i aa ṭialmi a zulmi cu lunglawmmi an si. Zeicahtiah hi thil vialte a tlin lai caan cu a naite cang. 4 Asia peng chung i a ummi Khrihfabu pasarih kha Johan nih bia kaan cah hna: Atu i a um liomi le a rak um cangmi le a um lai ding a simi Pathian le a bawiṭhutdan hmai i a ummi thlarau pasarih le Jesuh Khrih nih vel le daihnak in pe ko hna seh. 5 Jesuh Khrih cu zumh awk a tlakmi tehte, hrin hmasabik mi Fapa, thihnak in thawhter a simi a si i vawleicung siangpahrang hna uktu zong a si fawn. Kannih cu a kan dawt i a thihnak thawngin kan sualnak chung khan a kan chuah i 6 a Pathian le a Pa rian kha tlangbawi bantukin a ṭuantu dingah siangpahrang phun ah a kanser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen. 7 Zohhmanh u, khuadawm sinah khin a ra lio! Mikip nih an hmuh lai, a rak chuntu hna zong nih khan an hmuh lai. Cun vawleicung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen. 8 BAWIPA Pathian nih, “Kei cu Alfa le Omega ka si,” a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si. 9 Kei cu nan unau Johan kha ka si, Jesuh ah kan i pehtlaihnak thawngin hremnak nan innak ah ka ing ve, nan umnak a Pennak chungah khan ka um ve i temhinnak nan inmi kha ka ing ve. Pathian bia ka chim ca le Jesuh nih a phuanmi biatak ka phuan ruangah, Patmos timi tikulh ah khan an ka chiah. 10 Zarhpi Ni ah Thlarau nih a ka tlak i ka hnulei in aw thangpi pakhat kha ka theih, cu aw cu muko aw thawng bantuk a si. 11 A ka thawh i, “Na hmuhmi kha ṭial law na ṭialnak cauk cu Khrihfabu pasarih kha kua hna: cu Khrihfabu hna cu Efesa le Samarna khua le Pergamum khua le Thiatira khua le Sardis khua le Filadelfia khua le Laodisia khua i a ummi kha an si,” tiah a ti.
NOVEMBER 25–DECEMBER 1
BAIBAL AH THUHMI RO HNA | BIATHLAM 4-6
“Rang Aa Citmi Pali”
(Biat. 6:2) Ka hun zoh i rang raang pakhat ka hmuh. A cung i aa citmi nih cun likuk pakhat aa put i amah cu bawiluchin pakhat an pek. Teitu nih tei awkah aa thawh bantukin aa thawh.
Rang Aa Citmi Pali—Ahote Dah An Si?
Rang raang aa citmi cu ahodah a si? A phi cu Biathlam Baibal cauk chungah hmuh khawh a si, mah ah vancung i rang aa citmi cu “Pathian Bia” a si tiah a langhter. (Biathlam 19:11-13) Bia timi min cu Jesuh Khrih nih a ngeihmi min a si, zeicahtiah anih cu Pathian aiawh in bia a chimtu a si. (Johan 1:1, 14) Mah lengah anih cu “siangpahrang vialte Siangpahrang le bawi vialte Bawi” tiah auh a si i “Zumhawktlak le A hmaanmi” ti zongin auh a si. (Biathlam 19:16) Jesuh cu ral a domi siangpahrang pakhat in nawl a ngei ko nain a nawlngeihnak kha ningcang loin a hmang lo. Asinain biahalnak cheukhat a chuak.
Rang Aa Citmi Pali—Ahote Dah An Si?
Zeitik in dah rang cu an hun i cit? A pakhatnak rang aa citmi Jesuh nih bawiluchin a hmuhle cangka a hun i cit ti kha i cinken. (Biathlam 6:2) Jesuh cu zeitik in dah vancung ah Siangpahrang a si? A thih hnu i vancung a kai cangka in a si lo. Caan caankhat chung a hngah ti kha Baibal nih a langhter. (Hebru 10:12, 13) Zei can dah a hngah lai i zeitik in dah vancung ah uktu a ṭuan lai ti hngalhthiam awkah a zultu pawl kha a bawmh hna. A uknak aa thawk tikah vawleicung thil sining hna cu an chia chin lai tiah a ti. Raldohnak, mangṭam le zawtnak hna a um lai. (Matthai 24:3, 7; Luka 21:10, 11) 1914 i Vawleicung Ralpi Inak aa thawk hnu tlawmpal ah minung cu Baibal nih “ni hmanung bik” tiah a auhmi harnak caan chungah an lut ti cu a fiang.—2 Timote 3:1-5.
(Biat. 6:4-6) Rang dang pakhat a hung chuak i rang sen a si. A cung i aa citmi cu, vawleicung i ral thawhternak ṭhawnnak kha an pek, cucu zeicahdah a si tiah, mi kha pakhat le pakhat i that hna seh, ti caah a si; amah cu vainam nganpi an pek. 5 Cun tuufa nih cun cakhenh pathumnak kha a phoih; cun saram nung pathumnak nih, “Ra,” a ti kha ka theih. Ka hun zoh i rang nak pakhat ka hmuh. A cung i aa citmi nih cun cuai thlainak pakhat aa put. 6 Saram nung pali hna lakin a chuakmi aw a lomi aw pakhat ka theih i cu aw nih cun, “Nikhat ni hlawh caah changvut cu khiat khat, barli cu khiat thum. Sihmanhsehlaw oliv chiti le mitsurhang cu hrawk hna hlah,” a ti
Rang Aa Citmi Pali—Ahote Dah An Si?
Rang sen aa citmi nih raltuknak kha a aiawh. Miphun tlawmpal sin lawngah si loin vawleicung dihlak i daihnak kha a lak tiah a ti. 1914 ah minung tuanbia lakah a voikhatnak vawleicung pumpi raltuknak a um. Mah hnuah a hmasa nakin rawhnak a tam deuhmi vawlei ralpi pahnihnak nih a hun zulh. 1914 thawkin raltuknak le ralchanhnak ruangah a thimi hi nuai 100 leng an si cang tiah cheukhat nih an ti. Cun hliamnak a tongmi zong an tampi.
Rang Aa Citmi Pali—Ahote Dah An Si?
“Ka hun zoh i rang nak pakhat ka hmuh. A cung i aa citmi nih cun cuaithlainak pakhat aa put. Saram nung pali hna lakin a chuakmi aw a lomi aw pakhat ka theih i cu aw nih cun, ‘Nikhat ni hlawh caah changvut cu khiat khat, barli cu khiat thum. Sihmanhsehlaw oliv chiti le mitsurhang cu hrawk hna hlah,’ a ti.”—Biathlam 6:5, 6.
Rang nak aa citmi nih mangṭam kha a aiawh. Changvut khiat khat (1.08 L) ah ngun tangka phar khat a si, mah cu kumzabu pakhatnak lio i nikhat ni hlawh a si caah rawl a har tukmi kha a langhter. (Matthai 20:2) Ngun tangka phar khat nih changvut a chia phun barli kha khiat thum (3.24 L) a cawk khawh. Innchungkhar a tammi nih cun zeitindah an ei khim lai? Mah lio caan ah nifate a bik in ei-dinmi oliv chiti le wine hna kha semrel awkah ralrin pek an si.
(Biat. 6:8) Ka hun zoh i rang rau diapduap pakhat ka hmuh. A cung i aa citmi cu a min ah Thihnak a si i Hell nih a hnulei in a zulh. Vawleicung cheuli cheukhat uknak nawl kha pek an si i ral in siseh, mangṭam in siseh, rai in siseh, sahrang in siseh, mi thah khawhnak nawl kha pek an si.
wp17.2 5 ¶8-10
Rang Aa Citmi Pali—Ahote Dah An Si?
A palinak rang aa citmi nih zawtnak le a dang ruangah a chuakmi thihnak kha a aiawh. 1914 hnu tlawmpal ah Spain raifanh nih mi nuai tampi kha a thah hna. Mah zawtnak nih mi nuai 500 hrawng kha a chawnh hna i pathum ah pakhat lawng an nung.
Asinain Spain raifanh cu a thawknak lawng a si rih. Thiamsang pawl nih kumzabu 20 chungah mi nuai tampi cu raise zawtnak ruangah an thi tiah an ti. Tuchan ah siilei fimthiamnak cu a ṭhangcho ko nain mi nuai tampi cu AIDS, malaria le TB zawtnak ruangah an thi.
Raldohnak, mangṭam le zawtnak hna ruang i a phichuak cu thihnak a si. Thlan nih zei bantuk ruahchannak hmanh pe loin, ngol hngal loin a pumh ko hna.
Thlaraulei Lungvar Hna Kha Hlathlai
(Biat. 4:4) Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan raang aa aih i sui luchin aa chinhmi upa kul le pali kha an ṭhu.
(Biat. 4:6) Bawiṭhutdan hmaiah cun thlalang fim bantuk a simi rili a um. Bawiṭhutdan cu a hnulei, a hmailei le a sirlei veve in a nungmi saram pali nih an kulh i cu saram hna cu hmailei he, hnulei he mit in an khat.
re 76-77 ¶8
Sunparnak In A Khatmi Jehovah I Vancung Bawiṭhutdan
8 Hlanlio puan biakinn ah rian ṭuan dingin tlangbawi pawl cu rianpek an si ti kha Johan nih a hngalh. Cucaah a hnuah a hmuhmi langhnak ruangah a khuaruah a har tuk ko lai. Hitin a ti: “Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan raang aa aih i sui luchin aa chinhmi upa kul le pali kha an ṭhu.” (Biat. 4:4) A si, tlangbawi pawl canah upa 24 cu siangpahrang bantukin sui luchin i chinh in bawiṭhutdan cungah an ṭhu. Mah upa hna cu ahote dah an si? Jehovah biakam ningin thihnak in a tho ṭhanmi, vancung ruahchannak a ngeimi chiti thuhmi kha an si. Mah kha zeitindah kan hngalh khawh?
re 80 ¶19
Sunparnak In A Khatmi Jehovah I Vancung Bawiṭhutdan
19 Mah thilnung hna nih zeidah an langhter? A dang profet pakhat a simi Ezekiel chimmi langhnak nih a phi hngalhthiam awkah a kan bawmh. Johan hmuhmi langhter he aa lomi, a nungmi saram hna nih an kulhmi vancung rang leng cungah a ṭhumi Jehovah kha Ezekiel nih a hmuh. (Ezek. 1:5-11, 22-28) A hnuah Ezekiel nih thilnung hna nih kulhmi bawiṭhutdan kha a hmuh ṭhan. Asinain atu i a hmuhmi thilnung hna cu cherubim tiah a langhter. (Ezek. 10:9-15) Johan hmuhmi thilnung pali nih Pathian i a tam tukmi cherubim pawl—thlarau minung bu i a dirhmun a sangmi thilnung hna kha a aiawh hna. Johan nih Jehovah pawngte ah cherubim pawl a hmuh hna tikah a khuaruah a har lai lo. Zeicahtiah hlanlio puan biakinn ah Jehovah ṭhutdan a aiawhmi, biakamnak kuang cungah sui in sermi cherubim pahnih chiah a si. Jehovah nih Israel mi kha mah cherubim pahnih karlak in nawlbia a pek tawn hna.
(Biat. 5:5) Cu tikah upa pakhat nih khan a hun ka chawnh i, “Ṭap hlah! Zohhmanh, Judah phun chungin a chuakmi Chiandeih, David tefa mi lianngan nih khan teinak a hmuh cang i cakhenhnak pasarih kha a phoih khawh hna i cazual kha a kau khawh,” tiah a ti.
cf 36 ¶5-6
“Zohhmanh, Judah Phun chungin a Chuakmi Chiandeih”
5 Chiandeih cu ralṭhatnak he langhterṭi tawnmi a si. A ngan cangmi chiandeih pakhat hmaiah hmaitonh in na dir bal maw? Ka dir bal tiah na ti ahcun mah cu saram zuatnak chungah a ummi, chiandeih hmaiah a si men lai. Cutin a si hmanhah na caah ṭihnung a si men lai. A pum a ngan i a ṭhawng tukmi mah saram kha na zoh tikah aan zoh chih ve ko lai. Chiandeih timi saram phun cu ṭihnak ngei in a zammi phun an si lo. Baibal nih “saram lak i a ṭhawng bik chiandeih, zeihmanh a ṭih lomi” tiah a ti. (Phungthlukbia 30:30) Khrih ralṭhatnak cu, cu bantuk phun kha a si.
6 Jesuh nih chiandeih bantukin ralṭhatnak a langhternak lam pathum kha i ruahhmanh hna u sih. Mah cu biatak kan ṭanh tikah, dinnak kan i tlaih tikah le ralchanhnak hna kan ton tikah ralṭhatnak langhter kha an si. A ral a ṭhami kan si ah, a ral a chiami kan si ah kan dihlak in Jesuh i zohchunh in ralṭhatnak kan langhter khawh ti kha kan hngalh lai.
Baibal Relnak
(Biat. 4:1-11) Hi dih hin langhnak a dang pakhat ka hmuh ṭhan i vancung ah khin innka pakhat a hun i hun kha ka hmuh. Cun hlan deuh ah ka rak theihmi aw, muko aw bantuk a simi kha, a hung thang i, “Hika ah hin hung kai law hi dih hin zeidah a um lai ti kha kaan hmuhsak lai,” a ti. 2 Thlarau nih cun khulrang in a ka tlaih. Cun vancung ah cun bawiṭhutdan pakhat a um i a chungah cun mi pakhat a ṭhut kha ka hmuh. 3 A hmai cu jasper lungvar le karnelian lungvar bantukin a tleu i bawiṭhutdan velchum ahcun emaral lungvar mui a kengmi chuncha kha aa zel. 4 Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan raang aa aih i sui luchin aa chinhmi upa kul le pali kha an ṭhu. 5 Bawiṭhutdan cun nimtlau aa lek i khuari thawng kha a thang. Bawiṭhutdan hmaiah cun meifar vanmi pasarih an um i cu hna cu Pathian thlarau pasarih kha an si. 6 Bawiṭhutdan hmaiah cun thlalang fim bantuk a simi rili a um. Bawiṭhutdan cu a hnulei, a hmailei le a sirlei veve in a nungmi saram pali nih an kulh i cu saram hna cu hmailei he, hnulei he mit in an khat. 7 Saram nung pakhatnak cu chiandeih he an i lo, pahnihnak cu cawfa he an i lo, pathumnak cu a hmai minung hmai bantuk a si, palinak cu a zuang liomi mupi bantuk a si. 8 Saram nung pali hna nih cun thla paruk cio an ngei i an chunglei he, an lenglei he mit in an khat. Chun zan in hlasak an baang lo: “A thiang, a thiang, a thiang, Lianngan Bik Bawipa Pathian cu, Amah cu a um cangmi le a um liomi le a um laimi a si,” an ti. 9 A nungmi saram pali nih cun bawiṭhutdan cung i a ṭhumi, zungzal in zungzal tiang a nungmi cu, sunparnak le upatnak le lawmhnak hla in an thangṭhat. 10 Cu bantukin an thangṭhat tikah upa kul le pali kha bawiṭhutdan cung i a ummi hmaiah cun an kun i zungzal in zungzal tiang a nungmi cu an biak. An suiluchin kha bawiṭhutdan hmaiah cun an chiah hna i, 11 “Kan Bawipa le kan Pathian, nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i nangmah duhnak bangin annih cu ser an si i nunnak an ngei,” tiah an ti.