Zob
41 “Eski ou kapab atrap Levyatan* avek en lanmson
Oubyen eski ou kapab anmar son lalang avek en lakord?
3 Eski i pou kontinyen sipliy ou
Oubyen koz avek ou dan en fason zantiy?
4 Eski i pou fer en lalyans avek ou
Pour li vin ou lesklav pour lavi?
5 Eski ou pou zwe avek li parey avek en zwazo
Oubyen anmar li avek en lakord pour ou bann pti fiy?
6 Eski bann peser pou vann li?
Eski zot pou partaz li avek bann marsan?
7 Eski ou pou pers son lapo avek en larpon
Oubyen son latet avek en lans?
8 Esey tyonbo li,
Ou pa pou oubliy sa lager e ou pa pou zanmen fer li ankor!
9 Initil ou esey kontrol li.
Osito ki ou pou vwar li, ou pou per.*
10 Napa personn ki pou oze fer li ankoler.
Alor lekel ki kapab opoz mwan?
11 Lekel ki’n donn mwan en keksoz premye ki mon pou bezwen rann li?
Tou sa ki lo later i pour mwan.
12 Mon pa pou aret koze konsernan son lapat,
Son lafors ek son lekor ki’n ganny fer dan en fason merveye.
13 Lekel ki kapab tir son lenz lo li?
Lekel ki kapab antre dan son labous ler son lanmaswar i ouver?
14 Lekel ki kapab fors li pour ouver son lagel?*
Tou son ledan i vreman fer per.
15 I annan bann ranze lekay lo son ledo*
Ki byen kole avek kanmarad.
16 Sa bann lekay i sitan koste avek kanmarad
Ki menm divan pa kapab pase.
17 Zot kol ansanm,
Zot atase avek kanmarad e nanryen pa kapab separ zot.
18 Ler i eternen, lalimyer i sorti dan son nennen
E son lizye i parey bann reyon lalimyer dan granmaten.
19 Zekler i sorti dan son labous.
Bann letensel i anvole.
20 Lafimen i sorti dan son nennen,
Parey dan en four ki pe bril zerb.
21 Son souf i alim labrez
E dife i sorti dan son lagel.
22 I annan en gran lafors dan son likou
E bann ki zwenn li i per li.
23 Bann pli lo son lapo i koste avek kanmarad,
Bann pli lo son lapo i ferm, parey en plak feray ki pa kapab ganny tire.
24 Son leker i dir parey ros,
Wi, i dir parey en ros moulen.*
25 Ler i leve, menm bann dimoun for i per.
Ler i bouze, dimoun pa konnen ki zot pou fer.
26 Menm en koud lepe pa pou touy li,
Ni menm en lans, dart oubyen fles.
27 Pour li, feray i parey lapay
E kwiv i parey dibwa pouri.
28 En fles pa fer li taye.
Ros dan fles i vin parey lapay pour li.
29 Pour li, en mayos i parey lapay
E i riye ler i tann tapaz en lans.
30 I konmsi son vant in kouver avek bann bout resipyan anter ki pwent.
I glise dan labou parey en plans dibwa.*
31 I fer delo profon brouye parey delo ki pe bwi dan marmit.
I fer lanmer azite parey delwil dan en marmit.
32 Kot i pase dan delo, i fer lekim.
I konmsi delo profon i annan seve blan.
33 Napa nanryen ki parey li lo later,
Bondye in fer li pour ki i pa per nanryen.
34 I get tou bann zannimo arogan avek lakoler.
I lerwa tou bann gro zannimo sovaz.”