Kantik Salomon

Ou seve i parey en troupo kabri

Ki pe desann lo bann montanny Gilead.

 2 Ou ledan i parey en troupo mouton ki zot lalenn fek ganny koupe

E ki sorti bennyen.

Zot tou zot in ganny bann zimo

E napa enn ki’n perdi son piti.

 3 Ou lalev i parey en difil rouz

E ou dir bann zoli keksoz.

Ou lazou* par deryer ou vwal

I parey en bout grenad.

 4 Ou likou i parey latour David,

Ki’n ganny konstri avek bann ranze ros

Ki annan mil boukliye ki anpandan lo la.

 5 Ou tete i parey de pti serf,

Zimo en gazel,

Ki manz parmi bann fler lis.”

 6 “Avan ki divan i konmans soufle* e lonbraz i ale,

Mon pou al lo montanny kot i annan lamir*

E lo sa pti montanny kot i annan lansan blan.”*

 7 “Ou sa enn ki mon kontan, ou vreman zoli,

Ou napa okenn defo.

 8 Mon nouvel marye, kit Liban e vin avek mwan,

Wi, kit Liban e vin avek mwan.

Sorti lo montanny Amana* e desann,

Sorti lo montanny Senir, lo montanny Ermonn,

Sorti kot bann lyon i reste, lo montanny kot bann leopar i reste.

 9 Mon ser, mon nouvel marye, ou’n vol mon leker,

Wi, ou’n vol mon leker avek zis en gete,

Avek en pandan dan ou sennon.

Fason ki ou montre ki ou kontan mwan i bokou pli bon ki diven

E loder ou lesans i pli santi bon ki tou bann zepis!

Anba ou lalang i annan dimyel ek dile

E loder ou lenz i santi bon parey Liban.

12 Mon ser, mon nouvel marye, i parey en zarden ki’n ganny fermen avek lakle,

En zarden ki’n ganny fermen avek lakle, en sours delo ki’n ganny byen kouver.

13 Ou bann pti brans i en paradi* kot i annan bann pye grenad

Avek sa bann pli bon fri, avek roukou* ek bann nar,*

14 Nar ek safran, zon* ki santi bon ek kannel,

Avek tou sort kalite pye lansan blan, lamir ek lalwes*

Ek tou bann pli bon lesans.

15 Ou en sours delo dan en zarden, en pwi delo dou

Ek bann pti larivyer sorti Liban.

“Les sa enn ki mon kontan vin dan mon zarden

E manz son bann pli bon fri.”