Kantik Salomon
3 “Ler mon ti lo mon lili aswar,
Mon ti rod sa enn ki mon kontan.
Mon ti rod li, me mon pa ti trouv li.
2 Mon pou leve e mon pou al mars partou dan lavil.
Les mwan rod sa enn ki mon kontan
Dan bann semen e dan bann landrwa piblik.
Mon ti rod li, me mon pa ti trouv li.
3 Bann gardyen ki ti pe fer letour dan lavil ti vwar mwan.
‘Eski zot in vwar sa enn ki mon kontan?’
4 Zis apre ki mon ti kit zot,
Mon ti trouv sa enn ki mon kontan.
Mon ti tyonbo li e mon pa ti oule larg li
Ziska ki mon ti anmenn li dan lakaz mon manman,
Dan lasanm sa madanm ki’n fer mwan.
5 Bann fiy Zerizalenm, fer en serman
Lo bann gazel ek bann femel serf dan lakanpanny:
Pa bezwen esey fer mwan kontan li ziska ler mon kontan li mwan menm.”
6 “Kisisa sa keksoz ki parey lafimen ki pe monte dan dezer,
Ki santi loder lamir,* lansan blan*
Ek tou bann lapoud santi bon ki en marsan i vann?”
7 “Gete! Sa i sofa Salomon.
I annan 60 zonm for otour li,
Bann zonm for ki’n ganny swazir parmi bann zonm for Izrael.
8 Zot tou zot annan en lepe,
Zot in aprann ki mannyer pour lager.
Zot tou zot annan en lepe dan zot kote
Pour protez lerwa kont bann danze aswar.”
9 “Sa i sofa* Lerwa Salomon
Ki i’n fer pour li menm avek bann pye dibwa Liban.
10 I’n fer son bann poto avek larzan,*
I’n fer son bann sipor avek lor.
I’n fer son kousen avek lalenn mov.
Bann fiy Zerizalenm
In dekor son anndan avek lanmour.”
11 “Bann fiy Siyon, ale,
Al get Lerwa Salomon.
I’n met sa kouronn maryaz* ki son manman ti fer pour li
Zour i ti marye,
Zour ki son leker ti kontan.”