Izai
64 Si zis ou ti’n desir lesyel e desann,
Pour bann montanny tranble akoz ou,
2 Parey ler dife i bril bann pti brans dibwa
E sa dife i fer delo bwi,
Ou bann lennmi ti pou konn ou non
E bann nasyon ti pou tranble devan ou!
3 Ler ou ti fer bann keksoz enpresyonan ki nou pa ti pe ekspekte,
Ou ti desann e bann montanny ti tranble devan ou.
4 Depi lontan, personn pa’n tann oubyen ekout en lot Bondye
E personn pa’n vwar en lot Bondye apard ou,
En Bondye ki fer bann keksoz pour bann dimoun ki kontinyen esper li.*
5 Ou’n al zwenn sa bann dimoun ki kontan pour fer sa ki byen,*
Sa bann dimoun ki rapel ou e swiv ou bann semen.
Gete! Ou ti ankoler pandan ki nou ti kontinyen fer pese.
Nou ti fer sa pour en kantite letan.
Eski nou devret ganny sove aprezan?
6 Nou tou nou’n vin parey en dimoun enpir
E tou bann bon keksoz ki nou’n fer i parey en sifon ki en madanm ki pe ganny son peryod i servi.
Nou tou nou pou sek parey en fey
E nou bann fot pou fer nou anvole parey divan.
7 Napa personn ki pe loue* ou non,
Napa personn ki pe esey rod ou led,
Parski ou’n kasyet ou figir avek nou
8 Me aprezan, O Zeova, ou nou Papa.
Nou, nou larzil e ou, ou nou Potye.*
Ou ki’n fer nou tou.
9 O Zeova, pa bezwen ankoler tro bokou
E pa bezwen rapel nou fot pour touzour.
Silvouple, get nou, parski nou tou nou ou pep.
10 Ou bann lavil sen in vin en dezer.
Siyon in vin en dezer,
Zerizalenm in vin en dezer.
11 Nou lakaz* ki sen e ki annan laglwar,*
Kot nou bann zanset ti loue ou,
In ganny brile
E tou keksoz ki nou ti kontan in ganny detrir.
12 Me aprezan, O Zeova, eski ou pou kontinyen pa fer nanryen?
Eski ou pou reste trankil e les nou soufer en kantite?