Zeremi

43 Ler Zeremi ti’n fini dir tou dimoun tou sa ki Zeova zot Bondye ti’n dir, tou sa ki Zeova zot Bondye ti’n anvoy li dir zot, 2 Azarya garson Osaya, Zoanann garson Karea ek tou bann zonm arogan ti dir Zeremi: “Sa ki ou pe dir pa vre! Zeova nou Bondye pa’n anvoy ou dir nou, ‘Pa bezwen al reste Lezip.’ 3 Barouk garson Neriya ki pe fer ou vir kont nou pour nou ganny livre dan lanmen bann Kaldeen, pour zot touy nou oubyen pour zot anmenn nou an egzil Babilonn.”

4 Alor, Zoanann garson Karea, bann sef larme ek tou dimoun ti dezobei Zeova e zot pa ti reste Zida. 5 Zoanann garson Karea ek bann sef larme ti pran tou bann dimoun Zida ki ti’n reste e zot ti anmenn avek zot. Sa bann dimoun ti’n sorti dan bann pei kot zot ti’n ganny disperse e zot ti’n retournen pour zot reste Zida. 6 Zot ti pran bann zonm, bann madanm, bann zanfan, bann fiy lerwa ek tou dimoun ki Nebouzaradann sef bann gard ti’n kit avek Gedalya garson Aikam garson Safann e osi profet Zeremi ek Barouk garson Neriya. 7 Zot ti al Lezip, parski zot pa ti obei Zeova. Zot ti al ziska Tapanes.

8 Apre, ler Zeremi ti Tapanes, Zeova ti koz avek li e i ti dir li: 9 “Pran bann gro ros e kasyet zot dan mortye,* dan sa lateras ki’n ganny fer avek blok,* ki dan larantre lakaz Faraon dan lavil Tapanes. Fer sa devan bann zonm Zwif. 10 Apre dir zot, ‘La sa ki Zeova Sef larme, Bondye Izrael, i dir: “Mon pe fer mon serviter Neboukadnezar* lerwa Babilonn, vini. Mon pou met son tronn par lao sa bann ros ki mon’n kasyet e i pou met son latant* lo sa bann ros. 11 I pou vini e i pou atak Lezip. Serten dimoun parmi zot pou mor akoz bann maladi, serten dimoun pou al an egzil e serten dimoun pou mor akoz lepe. 12 Mon pou bril bann lakaz* bann bondye Lezip. I pou bril zot e pran zot konman prizonnyen. I pou anvlop Lezip otour li zis parey en berze i anvlop li dan son lenz e i pou kit sa landrwa anpe.* 13 I pou kas kas bann pilye* Bet-Semes* ki Lezip e i pou bril bann lakaz* bann bondye Lezip.”’”