Amos
9 Mon ti vwar Zeova par lao lotel e i ti dir: “Tap bout anler sa pilye e fondasyon pou tranble. Kraz bout anler sa pilye pour li tonm lo latet bann dimoun e mon pou touy larestan dimoun avek lepe. Napa personn ki taye ki pou sape e napa personn ki pou reisi sove.
Si zot mont anler dan lesyel,
Mon pou fer zot desann.
3 Si zot kasyet lo latet Montanny Karmel,
Mon pou rod zot e tir zot laba.
Si zot kasyet dan fon lanmer pour ki mon pa trouv zot,
Mon pou donn lord serpan pour mord zot.
4 Si zot ganny pran konman prizonnyen dan pei zot lennmi,
Laba menm mon pou donn lord pour ki zot ganny touye avek lepe.
Mon lizye pou reste fikse lo zot pour anmenn maler, me pa benediksyon.
5 Parski Souvren Senyer, Zeova Sef bann larme i sa Enn ki pou tous sa pei,*
Pour ki i fonn e tou son bann zabitan pou dan dey.
Sa pei antye pou monte parey Larivyer Nil
E i pou desann parey Larivyer Nil, Lezip.
6 ‘Sa enn ki konstri son peron ziska dan lesyel
E ki met en plafon* par lao later,
Sa enn ki anmas delo lanmer
E vid li lo later,
Son non i Zeova.’
7 La sa ki Zeova i dir, ‘O pep Izrael, pa zot parey bann garson Kous pour mwan?
Pa mon ti fer Izrael sorti Lezip,
Bann Filisten sorti Kret e bann Siriyen sorti Kir?’
8 La sa ki Zeova i dir, ‘Gete! Souvren Senyer Zeova pe get sa rwayonm kot dimoun pe fer pese
E i pou elimin sa rwayonm lo sirfas later.
Me mon pa pou detri konpletman bann desandans Zakob.’
9 ‘Gete! Mon pe donn lord
E mon pou sekwe pep Izrael parmi tou nasyon,
Zis parey en dimoun i sekwe en tanmi
E napa ni menm en pti ros ki tonm ater.
10 Tou mon pep ki annan en move lavi pou ganny touye avek lepe.
Bann ki pe dir, “Sa maler pa pou ariv lo nou, ni o bor nou.”’
11 ‘Sa zour, mon pou rekonstri lakaz* David ki’n tonbe.
Mon pou repar bann trou dan miray
E mon pou rebatir sa ki’n ganny kraze.
Mon pou rekonstri li parey i ti ete avan,
12 Pour ki mon pep i kapab domin larestan dimoun Edonm
E osi tou bann nasyon ki port mon non.’ La sa ki Zeova in dir, sa Enn ki pou fer sa arive.
13 La sa ki Zeova i dir, ‘Gete! Letan pe vini
Ler sa dimoun ki pe labour later pou zwenn sa enn ki ankor pe rekolte
E sa enn ki pe senm lagrenn pou zwenn sa enn ki ankor pe kraz rezen.
Diven dou pou degoute lo bann montanny
E i pou koule* lo bann pti montanny.
14 Mon pou fer mon pep Izrael ki an egzil retourn dan son pei,
Zot pou rekonstri bann lavil ki’n ganny abandonnen e reste dan sa bann lavil.
Zot pou plant bann pye rezen e bwar son diven,
Zot pou fer bann zarden e manz son fri.’
15 ‘Mon pou plant zot dan zot pei
E zot pa pou zanmen ganny derasinen
Dan sa pei ki mon’n donn zot.’ La sa ki Zeova zot Bondye in dir.”