Premye liv Kronik
21 Apre, Satan* ti deside atak Izrael e i ti enfliyans David pour konte konbyen dimoun i annan Izrael.+ 2 Alor David ti dir Zoab+ ek bann sef sa pep: “Ale e konte konbyen dimoun i annan Izrael, depi Beer-Seba ziska Dann.+ Apre vin dir mwan pour mwan konnen ki kantite dimoun i annan.” 3 Me Zoab ti dir li: “Ki Zeova i fer son pep ogmante 100 fwa plis! Mon senyer lerwa, zot tou zot deza ou bann serviter. Alor, akoz mon senyer i anvi fer sa? Akoz ou anvi fer Izrael koupab?”
4 Me lerwa pa ti oule ekout Zoab. Alor, Zoab ti al partou dan pei Izrael e apre i ti retourn Zerizalenm.+ 5 Zoab ti donn David lalis dimoun ki ti’n ganny anrezistre. I ti annan 1,100,000 zonm ki ti annan lepe Izrael e 470,000 zonm ki ti annan lepe dan tribi Zida.+ 6 Me i pa ti anrezistre tribi Levi ek Benzamen,+ parski Zoab pa ti kontan sa ki lerwa ti’n dir.+
7 Sa vre Bondye pa ti kontan ditou sa ki ti’n arive, alor i ti pini Izrael. 8 Apre David ti dir sa vre Bondye: “Mon’n fer en gro pese+ ler mon’n fer sa. Aprezan, silvouple, pardonn fot ou serviter+ parski mon’n azir dan en fason vreman bet.”+ 9 Apre Zeova ti koz avek Gad,+ sa enn ki ti dir David bann vizyon Bondye. I ti dir: 10 “Al dir David, ‘La sa ki Zeova i dir: “Mon pe donn ou trwa opsyon. Swazir sa enn ki mon devret anmenn lo ou.”’” 11 Alor Gad ti al kot David e dir li: “La sa ki Zeova i dir, ‘Swazir 12 si ou anvi ki i annan trwa-z-an lafanmin+ oubyen ki ou bann lennmi i servi zot lepe e ganny laviktwar lo ou+ pour trwa mwan oubyen ki Zeova i pini ou avek son lepe pour trwa zour, kot i annan en lepidemi dan pei+ e en lanz Zeova i anmenn en destriksyon+ dan tou teritwar Izrael.’ Aprezan, reflesir lo sa ki ou anvi mon al dir sa Enn ki’n anvoy mwan.” 13 Alor David ti dir Gad: “Sa i trakas mwan en kantite. Silvouple, les mwan tonm dan lanmen Zeova parski i pou sirman pran pitye pour mwan,+ me pa les mwan tonm dan lanmen zonm.”+
14 Zeova ti anvoy en lepidemi+ lo Izrael e 70,000 dimoun Izrael ti mor.+ 15 Sa vre Bondye ti osi anvoy en lanz Zerizalenm pour detrir li, me ler Zeova ti vwar sa lanz pe al detrir zot, i ti regrete* akoz sa maler.+ I ti dir sa lanz ki ti pe al anmenn destriksyon: “Ase!+ Bes ou lanmen aprezan.” Lanz Zeova ti pe debout pros avek sa landrwa kot dible i ganny bate ki ti pour Ornann+ en Zebouzit.+
16 Ler David ti gete, i ti vwar lanz Zeova pe debout ant later ek lesyel. Sa lanz ti annan en lepe+ dan son lanmen ki ti’n viz ver Zerizalenm. David ek bann ansyen ti’n met latwal goni*+ lo zot e deswit zot ti tonm ater lafas anba.+ 17 David ti dir sa vre Bondye: “Mwan ki ti dir kont sa pep. Mwan ki’n fer pese e mwan ki’n fer sa ki mal.+ Ki sa bann mouton in fer? O Zeova mon Bondye, silvouple, pini mwan ek fanmir* mon papa, me pa bezwen anmenn sa fleo lo ou pep.”+
18 Alor, lanz Zeova ti dir Gad+ al dir David, mont kot sa landrwa kot dible i ganny bate ki pour Ornann en Zebouzit e fer en lotel pour Zeova.+ 19 Alor David ti mont kot sa landrwa kot dible i ganny bate parey Zeova ti’n dir Gad dir li. 20 Pandan sa menm letan, Ornann ti pe bat dible. Ler i ti vire, i ti vwar sa lanz e son kat garson ki ti avek li ti al kasyet. 21 Ler Ornann ti vwar David pe vin kot li, deswit i ti sorti kot i ti pe bat dible, desann kot David e tonm azenou lafas anba devan li. 22 David ti dir Ornann: “Vann* mwan sa landrwa kot dible i ganny bate pour mwan konstri en lotel pour Zeova. Vann mwan sa landrwa dapre son vre valer, pour ki sa fleo lo sa pep i arete.”+ 23 Me Ornann ti dir David: “Mon senyer lerwa, pran sa landrwa e fer sa ki ou krwar i bon.* Mon pe osi donn ou sa bann bef pour lofrann brile* e sa plans dibwa ki bat dible avek+ pour alim dife. Pran sa dible pour ou fer lofrann lagrenn* avek. Mon donn ou tousala.”
24 Me Lerwa David ti dir Ornann: “Non, mon devret aste sa landrwa dapre son vre valer, parski mon pa pou pran sa ki pour ou e donn Zeova oubyen ofer bann lofrann brile ki pa’n kout mwan nanryen.”+ 25 Alor David ti donn Ornann lor ki pez 600 sekel* pour li aste sa landrwa. 26 David ti fer en lotel+ laba pour Zeova e i ti ofer bann lofrann brile ek sakrifis lape.* I ti priy Zeova e i ti reponn li par anvoy dife+ sorti dan lesyel pour bril bann sakrifis lo lotel. 27 Apre, Zeova ti donn lord sa lanz+ pour met son lepe dan son fouro.* 28 Sa letan, ler David ti vwar ki Zeova ti’n reponn son lapriyer dan sa landrwa kot dible i ganny bate ki ti pour Ornann en Zebouzit, i ti kontinyen ofer bann sakrifis laba. 29 Me sa letan, tabernak* Zeova ki Moiz ti’n konstri dan dezer e sa lotel pour bann lofrann brile ti ankor lo montanny Gibeonn.+ 30 Me David pa ti kapab al devan sa lotel pour rod gidans Bondye, parski i ti vreman per lepe lanz Zeova.