Izai
60 “Sa madanm, leve,+ les ou lalimyer klere, parski ou lalimyer in arive.
Laglwar Zeova i kler ou.+
2 Parski gete! Fernwanr pou kouver later
E en nyaz epe pou kouver bann nasyon.
Me Zeova pou kler ou
E zot pou vwar son laglwar lo ou.
3 Bann nasyon pou al kot ou lalimyer+
E bann lerwa+ pou al kot ou laglwar ki pe klere.*+
4 Get anler e get partou otour ou!
Zot tou zot in rasanble e zot pe vin kot ou.
Ou bann garson ki sorti byen lwen i kontinyen vini+
E ou bann fiy i ganny anmennen lo leren.+
5 Sa letan, ou pou vwar e ou pou zwaye.+
Ou leker pou bat vit e ou pou dan lazwa,
Parski larises dan lanmer pou vin kot ou.
Resours bann nasyon pou vin kot ou.+
6 I pou annan en kantite samo dan ou pei,*
Bann zenn mal samo sorti Madyann ek Efa.+
Tou dimoun ki sorti Seba pou vini.
Zot pou anmenn lor ek lansan blan.*
Zot pou koz lo bann keksoz ki Zeova in fer.+
7 Tou bann troupo ki sorti Kedar+ pou rasanble kot ou.
Bann mal mouton ki sorti Nebayot+ pou la pour ou servi.
Zot pou mont lo mon lotel e mon pou aksepte zot.+
Mon pou fer mon zoli lakaz vin pli zoli.*+
8 Lekel sa bann ki anvole parey nyaz,
Parey bann kolonm* ki anvole pour al kot zot lakaz?*
9 Parski bann zil pou annan lespwar dan mwan.+
Bann bato Tarsis i par devan,*
Pour anmenn ou bann garson ki sorti byen lwen,+
Ansanm avek zot larzan* ek zot lor,
Pour loue non Zeova ou Bondye e sa Enn ki Sen Izrael,
10 Bann etranze pou konstri ou bann miray
E zot bann lerwa pou servi ou,+
Parski mon ti pini ou akoz mon ti ankoler,
Me mon pou pran pitye pour ou akoz mon labonte.*+
11 Ou bann baro pou toultan reste ouver.+
Zot pa pou ganny fermen ni lizour ni aswar,
Pour ki dimoun i anmenn bann resours bann nasyon kot ou
E zot bann lerwa ki pou fer sa premye.+
12 Parski bann nasyon ek rwayonm ki pa pou servi ou pou ganny detrir
E bann nasyon pou ganny detrir konpletman.+
13 Laglwar Liban pou vin kot ou,+
Ansanm avek pye zenevriye,* pye frenn* ek pye sipre,*+
Pour fer mon landrwa sen vin pli zoli.
Mon pou glorifye sa landrwa kot mon met mon lipye.+
14 Garson bann dimoun ki ti fer ou soufer pou vini e azenou devan ou.
Tou bann dimoun ki napa respe pour ou pou bezwen azenou kot ou lipye
E zot pou bezwen apel ou lavil Zeova,
Siyon, lavil sa Enn ki Sen Izrael.+
15 Dan plas ki ou ganny abandonnen e ki zot ay ou e ki personn pa pas kot ou,+
Mon pou fer ou vin sa enn ki fer lezot fyer pour touzour
E ki fer lezot selebre, zenerasyon apre zenerasyon.+
16 Ou pou sirman bwar dile bann nasyon,+
Bann lerwa pou donn ou dile.*+
Ou pou sirman konnen ki mwan, Zeova, mon ou Sover
E sa Enn Pwisan Zakob i sa Enn ki delivre ou.+
17 Mon pou anmenn lor dan plas anmenn kwiv
E mon pou anmenn larzan* dan plas anmenn fer.
Mon pou anmenn kwiv dan plas anmenn dibwa
E mon pou anmenn fer dan plas anmenn ros.
Mon pou fer lape vey lo ou
E ladrwatir diriz ou.+
18 I pou nepli annan vyolans dan ou pei
E nanryen pa pou ganny detrir dan ou pei.+
Ou pou apel ou bann miray, Delivrans+ e ou bann baro, Louanz.
19 Soley pou nepli en lalimyer pandan lazournen pour ou
E lalin pou nepli kler ou,
Parski Zeova pou vin en lalimyer eternel pour ou+
E ou Bondye pou fer ou zoli.+
20 Ou soley pou nepli kouse
E ou lalin pou toultan klere,
Parski Zeova pou vin en lalimyer eternel pour ou+
E ou pou nepli dan dey.+
21 Tou ou bann dimoun pou fer sa ki byen.*
Zot pou reste dan sa pei pour touzour.
Zot menm zot sa bourzon ki mon ti plante,
Ki mon ti fer,+ pour mwan vin pli zoli.+
22 Sa enn ki pti pou vin en milye
E sa enn ki ptipti pou vin en nasyon pwisan.
Mwan, Zeova, mon pou fer sa ariv pli vit dan son letan.”