Izai
14 Parski Zeova pou pran pitye pour Zakob e i pou swazir Izrael ankor. I pou anmenn zot* dan zot pei. Bann etranze pou vin kot zot e zot pou reste ansanm avek desandans* Zakob. 2 Bann pep pou pran zot e anmenn zot kot zot. Desandans Izrael pou fer zot vin zot bann serviter ek zot bann servant dan pei Zeova. Zot pou fer bann dimoun ki ti pran zot konman prizonnyen, vin bann prizonnyen aprezan. Zot pou annan lotorite lo bann dimoun ki ti fors zot pour travay.*
3 Sa zour ler Zeova i soulaz ou e i fer ou aret ganny douler, i fer ou aret ganny problenm e i fer ou aret ganny forse pour travay konman lesklav, 4 ou pou dir sa proverb kont* lerwa Babilonn ki dir:
“Sa enn ki ti abitye fors lezot pour travay in arete fer sa!
Bann dimoun in aret soufer!
5 Zeova in kas baton sa enn ki move,
Baton bann sef,
6 Sa enn ki ankoler e ki pe kontinyen bat bann dimoun,
Sa enn ki pe diriz bann nasyon avek lakoler e ki pe kontinyen persekit zot.
7 Aprezan, later antye i anpe e napa problenm.
Bann dimoun i kriye dan lazwa.
8 Menm bann pye zenevriye* i kontan sa ki’n arive avek ou
E bann pye sed Liban osi i kontan.
Zot dir, ‘Depi ki ou’n tonbe,
Bann dimoun ki koup pye dibwa pa vin kot nou.’
9 Menm sa Latonm* ki anba i kontan
Pour vin zwenn ou ler ou vini.
Ler i vwar ou, i lev sa bann ki’n mor e ki napa lafors,
Tou bann sef dominer* ki ti lo later.
I fer tou bann lerwa bann nasyon leve lo zot tronn.
10 Zot tou zot koz avek ou e zot dir ou,
‘Eski ou osi ou’n vin fay parey nou?
Eski ou’n vin parey nou?
11 Ou lorgey in desann dan Latonm,*
Ansanm avek sa lanmizik ki zot zwe lo ou bann lenstriman lakord.
Bann moutouk i partou anba ou parey en lili
E bann lever in vin parey ou tapi.’
12 Gete ki mannyer ou’n sorti dan lesyel e ou’n tonbe,
Ou sa enn ki klate, garson granmaten!
Gete ki mannyer ou’n tonm ater,
Ou sa enn ki ti ganny laviktwar lo bann nasyon!
13 Ou ti dir sa dan ou leker, ‘Mon pou mont dan lesyel.
Mon pou lev mon tronn par lao bann zetwal Bondye
E mon pou asiz lo montanny renyon,
Dan bann landrwa pli lwen dan nor.
14 Mon pou mont par lao bann nyaz.
Mon pou fer mwan vin parey sa Enn Tre O.’
15 Me ou pou desann dan Latonm,*
Dan bann landrwa pli lwen dan sa trou.
16 Bann dimoun ki vwar ou pou get ou.
Zot pou get ou byen e zot pou dir,
‘Eski li menm li sa zonm ki ti pe sekwe later,
Ki ti fer bann rwayonm tranble,
17 Ki ti fer later* vin parey en dezer,
Ki ti detri son bann lavil
E ki pa ti les son bann prizonnyen retourn kot zot?’
18 Tou lezot lerwa bann nasyon,
Wi, zot tou, zot in ganny antere dan en fason respektab,
Sakenn dan son prop latonm.*
19 Me ou, ou’n ganny zete e ou napa en latonm,
Parey en bourzon* ki personn pa kontan.
Ou’n ganny kouver avek lekor bann dimoun ki’n ganny pike avek lepe,
Ki’n ganny zete dan en trou ki annan en kantite ros,
Parey en lekor mor ki’n ganny pil pil lo la.
20 Ou pa pou zwenn zot dan en latonm,
Parski ou ti detri ou prop pei,
Ou ti touy ou prop pep.
Personn pa pou servi non desandans bann move dimoun ankor.
21 Prepare pour touy son bann garson
Parski zot bann zanset i koupab,
Pour ki zot pa leve, kontrol later antye
E ranpli sa pei avek zot bann lavil.”
22 La sa ki Zeova Sef larme i dir, “Mon pou leve kont zot.”
“Mon pou detri non Babilonn, bann dimoun ki ankor reste laba, son bann zanfan ek son desandans.” La sa ki Zeova in dir.
23 La sa ki Zeova Sef larme i dir, “Mon pou fer li vin en landrwa kot bann tang* i reste e mon pou fer li vin en landrwa kot i annan en kantite lanmar. Mon pou balye li avek balye destriksyon.”
24 Zeova Sef larme in fer serman e i’n dir:
“I pou ariv zis parey mon anvi
E i pou ariv zis parey sa ki mon’n deside.
25 Mon pou kraz sa Asiriyen dan mon pei
E mon pou pil pil lo li lo mon bann montanny.
Son zoug* pou ganny tire lo zot
E son fardo pou ganny tire lo zot zepol.”
26 Sanmenm sa ki’n ganny deside* kont later antye
E sanmenm sa lanmen ki’n leve kont* tou bann nasyon.
27 Parski Zeova Sef larme ki’n deside,
Lekel ki pou kapab anpes sa arive?
I’n lev son lanmen,
Lekel ki pou kapab bes son lanmen?
28 Dan sa lannen ki Lerwa Aaz ti mor, Bondye ti anvoy sa mesaz:
29 “Filisti, personn pa devret dan lazwa,
Zis akoz baton sa enn ki pe tap ou in kase.
Parski en serpan anpwazonnen pou sorti dan dizef* sa serpan
E son piti pou en serpan dife ki anvole.”*
30 Anmezir ki premye ne sa dimoun ki pa enportan pe manze
E sa dimoun pov pe dormi dan sekirite,
Mon pou touy zot* avek lafanmin
E larestan dimoun kot ou pou ganny touye.
31 Baro, plere! Lavil, kriye!
Filisti, zot tou zot pou dekouraze!
Parski en lafimen pe vini e i sorti dan nor.
Napa en gerye dan son larme ki ganny kit deryer.”
32 Ki mannyer zot devret reponn bann mesaze ki sorti kot sa nasyon?
Zot devret dir ki Zeova in met fondasyon Siyon
E ki bann dimoun ki pa enportan parmi son pep pou pran refiz dan li.