Premye liv Kronik

22 Apre David ti dir: “Sa i lakaz Zeova sa vre Bondye e sa i lotel pour bann lofrann brile* pour Izrael.”+

2 David ti donn bann lord pour rasanble bann etranze+ ki dan pei Izrael. I ti fer zot kas ros e tay ros pour konstriksyon lakaz sa vre Bondye.+ 3 David ti osi prepar en gran kantite fer pour zot fer bann klou ek kouple pour bann laport kot baro. I ti osi prepar en gran kantite kwiv ki ti enposib pour peze+ 4 e en gran kantite dibwa sed+ ki pa ti kapab ganny konte parski bann Sidonyen+ ek bann Tiriyen+ ti anmenn en gran kantite dibwa sed pour David. 5 David ti dir: “Mon garson Salomon i zenn e i napa leksperyans.*+ Sa lakaz ki pou ganny konstri pour Zeova i devret vreman ekstraordiner+ pour ki dimoun dan tou pei+ i koz lo li e lo son labote.+ Alor, mon pou fer bann preparasyon pour li.” Alor David ti prepar en gran kantite materyo avan son lanmor.

6 Deplis, i ti kriy son garson Salomon e i ti donn li lord pour konstri en lakaz pour Zeova Bondye Izrael. 7 David ti dir son garson Salomon: “Mon ti vreman anvi konstri en lakaz pour non Zeova mon Bondye.+ 8 Me Zeova ti dir mwan, ‘Ou’n touy* en kantite dimoun e ou’n al dan bann gro lager. Ou pa pou konstri en lakaz pour mon non,+ parski ou’n touy en kantite dimoun devan mwan. 9 Gete! Ou pou ganny en garson+ e i pou en zonm ki kontan lape.* Mon pou donn li repo kont son bann lennmi otour li,+ parski i pou apel Salomon*+ e mon pou donn Izrael lape ek trankilite pandan son lavi.+ 10 Li menm ki pou konstri en lakaz pour mon non.+ I pou vin mon garson e mon pou vin son papa.+ Mon pou byen etabli son tronn ek son rwayonm lo Izrael pour touzour.’+

11 “Aprezan mon garson, ki Zeova i avek ou e ki ou reisi konstri sa lakaz pour Zeova ou Bondye, zis parey i’n dir ou pou fer.+ 12 Ler Zeova i donn ou lotorite lo Izrael, ki i osi donn ou bon zizman ek lentelizans+ pour ki ou obeir lalwa Zeova ou Bondye.+ 13 Si ou fer sir ki ou obeir bann lalwa+ ek bann komannman ki Zeova ti donn lord Moiz pour donn Izrael, ou pou sirman reisi.+ Pran kouraz e reste for. Pa bezwen per oubyen panik.+ 14 Mon’n fer en kantite zefor pour prepar 100,000 talan* lor, 1,000,000 talan larzan pour lakaz Zeova e osi en gran kantite kwiv ek fer+ ki pa kapab ganny peze. Mon’n prepar bann dibwa ek ros,+ me ou, ou pou rod plis ankor. 15 Ou annan en gran kantite travayer, sa i enkli bann ki kas ros, mason,+ sarpantye ek tou kalite artizan ki annan abilite.+ 16 Lakantite lor, larzan* ek kwiv ki i annan, pa kapab ganny peze.+ Aprezan leve e konmans sa travay. Ki Zeova i avek ou.”+

17 Apre, David ti donn lord tou bann prens Izrael pour ed son garson Salomon, i ti dir zot: 18 “Pa Zeova zot Bondye i avek zot e pa i’n donn zot repo dan tou kote? I’n livre bann zabitan sa pei dan mon lanmen e Zeova ek son pep in ganny kontrol lo sa pei. 19 Aprezan, zot devret determinen pour rod Zeova zot Bondye+ avek tou zot leker e avek tou zot lafors.* Konmans konstri landrwa sen Zeova sa vre Bondye,+ pour zot kapab anmenn lars lalyans* Zeova ek bann keksoz sen sa vre Bondye+ dan sa lakaz ki pou ganny konstri pour non Zeova.”+