Proverb
18 En dimoun ki pa frekant personn* i mazin zis son dezir egois.
I refize azir avek lasazes.*
2 En dimoun ki bet pa anvi konpran nanryen.
I plito anvi koz lo sa ki li i anvi koz lo la.
3 Ler en move dimoun i vini, larogans* osi i vini
E imilyasyon i vin avek laont.
4 Parol en dimoun i parey delo profon.
Sours lasazes i parey en larivyer ki pe kontinyen koule.
5 I pa byen pour fer lapreferans pour en move dimoun
Oubyen pour anpes en dimoun ki fer sa ki byen* ganny lazistis.
6 Parol en dimoun bet i fer dimoun dispit
E son labous pou fer li ganny bate.
7 Parol en dimoun bet i fer li ganny problenm
E son parol i en latrap pour li.*
8 Parol sa enn ki fann rimer i parey en bon manze,*
I desann byen dan vant.
9 En dimoun ki fer pares dan son travay
I frer sa dimoun ki fer problenm.
10 Non Zeova i en latour for.
Sa enn ki fer sa ki byen i tay laba e i ganny proteze.*
11 Larises en dimoun i son lavil for.
Dan son lespri,* larises i parey en miray ki protez li.
12 Lorgey dan leker en dimoun i anmenn maler
E limilite i fer en dimoun ganny laglwar.
13 Ler en dimoun i reponn avan ki i tann sa ki’n vreman arive,
Sa i bet e anbarasan.
14 Ler en dimoun i pozitif, sa i kapab ed li ler i malad,
Me lekel ki kapab andire ler i dekouraze?*
15 Leker en dimoun ki entelizan i ganny konnesans
E zorey en dimoun ki saz i rod konnesans.
16 Ler en dimoun i donn en kado, sa i ouver laport pour li
E i fer li zwenn bann dimoun enportan.
17 Sa enn premye pour koze i paret ki i annan rezon,
Ziska ki en lot dimoun i vin demann li kestyon.*
19 I pli difisil pour fer lape avek en frer ki ofanse ki pran en lavil for
E i annan dispit ki parey baro en lavil for.
20 Parol* en dimoun i parey manze ki fer son vant plen.
Son vant pou plen avek bann keksoz ki i dir.
21 Parol* en dimoun i kapab fer li viv oubyen mor.
Bann dimoun ki kontan servi li pou pey konsekans.
22 En zonm ki ganny en bon madanm in ganny en bon keksoz
E i ganny laprouvasyon* Zeova.
23 En dimoun pov i sipliye ler i pe koze,
Me en dimoun ris i reponn dan en fason brit.
24 I annan bann zanmi ki pare pour kraz kanmarad,
Me i annan en zanmi ki pli fidel ki en frer.