Premye liv Kronik
10 Bann Filisten ti pe lager avek Izrael. Bann zonm Izraelit ti sove devan bann Filisten e en kantite parmi zot ti ganny touye lo Montanny Gilboa.+ 2 Bann Filisten ti tay deryer Sail ek son bann garson e zot ti reisi touy Zonatan, Abinadab ek Malki-Soua,+ bann garson Sail. 3 Lager ti vin pli entans kont Sail. Finalman, bann solda ki tir fles ti vwar li e zot ti bles li.+ 4 Sail ti dir sa solda ki ti pe anmenn son zarm: “Tir ou lepe e touy mwan, koumsa sa bann zonm ki pa servi Bondye* pa pou kapab tret mwan dan en fason kriyel.”*+ Me sa solda ti refize, parski i ti vreman per. Alor Sail ti pran son prop lepe e larg son lekor lo la.+ 5 Ler sa solda ti vwar ki Sail ti’n mor, li osi i ti larg son lekor lo son lepe e i ti mor. 6 Alor Sail ek son trwa garson ti mor e tou dimoun ki ti dan son fanmir* ki ti avek li ti mor ansanm.+ 7 Ler bann Izraelit ki ti dan vale ti tande ki tou dimoun ti’n sove e ki Sail ek son bann garson ti’n mor, zot ti konmans kit zot lavil e taye. Apre sa, bann Filisten ti vin reste dan sa bann lavil.
8 Son lannmen, ler bann Filisten ti vin pran bann keksoz lo bann solda ki zot ti’n touye, zot ti vwar lekor Sail ek son bann garson lo Montanny Gilboa.+ 9 Alor zot ti pran bann keksoz Sail, zot ti koup son latet e pran son lekipman batay lo li. Zot ti anvoy bann mesaze partou dan pei bann Filisten pour anons sa nouvel avek zot bann zidol+ ek zot pep. 10 Apre sa, zot ti met lekipman batay Sail dan tanp* zot bondye e zot ti met son latet anpandan kot tanp* Dagonn.+
11 Ler bann zabitan Zabes+ ki Gilead ti tann tou sa ki bann Filisten ti’n fer avek Sail,+ 12 tou zot bann gerye ti leve e al sers lekor Sail ek son bann garson. Zot ti anmenn sa bann lekor dan lavil Zabes e anter zot lezo anba sa gro pye dibwa Zabes.+ Apre, zot ti zennen* pour set zour.
13 Alor Sail ti mor akoz i pa ti fidel avek Zeova, i pa ti obeir Zeova+ e akoz i ti al rod led avek en dimoun ki kominik avek bann ki’n mor+ 14 dan plas al demann led Zeova. Alor Bondye ti met li amor e i ti fer David garson Zese vin lerwa.+