Psonm
SENKYENM LIV
(Psonm 107-150)
107 Remersye Zeova, parski i bon,
Son lanmour fidel i dire pour touzour.
2 Ki bann ki Zeova in sove* i dir sa parol,
Bann ki i’n sove dan lanmen* son lennmi,
3 Bann ki i’n rasanble sorti dan lezot pei,
Depi dan les ziska dan was,*
Depi dan nor ziska dan sid.
4 Zot ti ale vini dan dezer, dan bann landrwa dezerte.
Zot pa ti vwar en semen pour al dan en lavil kot zot kapab reste.
5 Zot ti lafen e swaf.
Telman zot ti fatige, zot ti pros pour tonm feb.
6 Zot ti kontinyen kriy osekour Zeova akoz zot ti pe soufer.
I ti delivre zot dan zot maler.
7 I ti fer zot mars lo sa bon semen
Pour ki zot ariv dan en lavil kot zot kapab reste.
8 Ki dimoun i remersye Zeova pour son lanmour fidel
E pour bann keksoz merveye ki i’n fer pour bann imen.
9 Parski i’n donn delo bann ki swaf
E i’n donn bann ki lafen bann bon keksoz pour manze.
10 Serten ti pe viv dan fernwanr.
Zot ti bann prizonnyen ki pe soufer dan lasenn.
11 Parski zot ti’n rebel kont sa ki Bondye ti dir.
Zot ti mank respe pour konsey sa Enn Tre O.
12 Alor i ti les zot soufer pour imilye zot.
Zot ti tonbe e i ti napa personn pour ed zot.
13 Zot ti demann led Zeova akoz zot ti pe soufer.
I ti sov zot dan zot maler.
14 I ti tir zot dan fernwanr
E kas zot lasenn.
15 Ki dimoun i remersye Zeova pour son lanmour fidel
E pour bann keksoz merveye ki i’n fer pour bann imen.
16 Parski i ti kas bann laport an kwiv
E koup bann bar feray.
17 Zot ti bet e zot ti soufer
Akoz zot pese ek fot.
18 Zot pa ti anvi manz nanryen.*
Zot ti ariv pros avek baro lanmor.
19 Zot ti demann led Zeova akoz zot ti pe soufer.
I ti sov zot dan zot maler.
20 I ti donn lord e zot ti ganny geri
E i ti sov zot dan bann trou ki zot ti’n tonm ladan.
21 Ki dimoun i remersye Zeova pour son lanmour fidel
E pour bann keksoz merveye ki i’n fer pour bann imen.
22 Ki zot ofer bann sakrifis remersiman,
Koz lo sa ki Bondye in fer e kriy avek lazwa.
23 Bann ki vwayaz lo bato,
Ki fer komers lo sa gran lanmer,
24 Zot in vwar sa ki Zeova in fer
E bann keksoz merveye ki i’n kree dan lanmer.
25 I donn lord e en tanpet divan i deklare
E sa i fer ki i annan bann gro laroul dan lanmer.
26 Lo laroul, bann maren i mont ziska dan lesyel
E zot desann dan fon.
Zot perdi kouraz* akoz maler ki pe arive.
27 Zot drive e perdi lekilib parey en dimoun sou
E abilite sa bann maren pa servi dan nanryen.
28 Alor dan zot maler, zot kriy osekour Zeova
E i delivre zot dan zot maler.
29 I kalmi sa tanpet divan
E bann laroul i reste trankil.
30 Bann maren i dan lazwa akoz lanmer i kalm
E i anmenn zot ziska kot zot destinasyon.*
31 Ki dimoun i remersye Zeova pour son lanmour fidel
E pour bann keksoz merveye ki i’n fer pour bann imen.
33 I fer bann larivyer vin en dezer
E bann sours delo vin sek.
34 I fer en bon later vin en laplenn sale,
Akoz bann zabitan pe fer bann move keksoz.
35 I fer dezer vin en lanmar ranpli avek zon*
E later sek vin bann sours delo.
36 I fer bann ki lafen reste laba,
Pour ki zot konstri en lavil kot zot kapab reste.
37 Zot senm lagrenn dan plantasyon e plant bann pye rezen
Ki raport bann bon rekolt.
38 I beni zot e fer zot vin en kantite
E i fer zot ganny en kantite bef.
39 Me ankor enn fwa zot vin ptigin e zot ganny imilye
Akoz labi, maler ek sagrinasyon.
40 I fer bann dimoun enportan ganny meprize
E i fer zot ale vini dan dezer kot napa semen.
41 I protez* bann pov ki ganny abize
E i fer zot fanmir vin bokou parey en troupo zannimo.
42 Bann ki fer sa ki byen i vwar sa e zot kontan,
Me bann move dimoun i ferm zot labous.
43 Dimoun saz pou vwar sa bann keksoz
E zot pou reflesi byen lo sa ki Zeova in fer pour demontre son lanmour fidel.