Psonm

144 Ki Zeova, mon Ros i ganny loue,

Sa Enn ki antrenn mwan* pour batay

E prepar mwan* pour lager.

 2 I mon lanmour fidel e mon landrwa proteksyon,

Mon landrwa kasyet* ki an sekirite e mon sover,

Mon boukliye e sa Enn kot mon’n rod proteksyon,

Sa Enn ki fer bann pep soumet avek mwan.

 3 O Zeova, ki imen i ete pour ki ou remark li?

Ki garson zonm* i ete pour ki ou pran swen avek li?

 4 Lavi en imen i parey lavaper,*

E i parey en lonbraz ki disparet.

 5 O Zeova, fer ou lesyel bese e desann.

Tous bann montanny e fer lafimen sorti.

 6 Fer zekler tape e dispers ou lennmi.

Tir ou fles e fer zot panik.

 7 Depi anler dan lesyel, anvoy ou lanmen,

Delivre mwan e sov mwan dan sa bann gran laroul,

Dan lanmen bann etranze

 8 Ki koz manti

E ki lev zot lanmen drwat pour fer bann fo serman.*

Mon pou sant kantik* pour loue ou e zwe en lenstriman dis lakord,

10 Pour sa Enn ki donn laviktwar bann lerwa,

Sa Enn ki sov son serviter David kont bann ki touy avek lepe.

11 Delivre mwan e sov mwan dan lanmen bann etranze

Ki koz manti

E ki lev zot lanmen drwat pour fer bann fo serman.

12 Koumsa nou bann garson pou parey bann zenn plant ki pous vitman,

Nou bann fiy parey bann pilye ki’n ganny skilpte dan kwen en pale.

13 Nou bann stor pou deborde avek tou sort kalite prodwi.

Nou bann troupo dan lakanpanny pou vin en kantite, zot pou vin plizyer milye ek dizenn milye.

14 Nou bann bef ki plenn pa pou ganny difikilte met ba ni fer pert.

Personn pa pou kriye akoz i pe soufer dan nou bann landrwa piblik.