Proverb
8 Pa lasazes ki pe kriye?
Pa disernman ki pe koz for?
2 O bor semen lo en oter,
I pran son plas dan krwaze semen.
3 I o bor bann baro ki al dan lavil,
Dan bann larantre.
I kontinyen kriye byen for e i dir:
4 “Bann dimoun, mon pe kriy zot.
Mon pe koz for avek zot tou.*
5 Zot ki napa leksperyans, aprann ki mannyer pour vin pridan.
Zot bann dimoun bet, rod lentelizans.*
6 Ekoute, parski sa ki mon dir i enportan,
Mon dir sa ki byen.
7 Parski mon koz laverite dousman
E mon deteste sa ki mal.
8 Tou sa ki mon dir i byen.*
Napa nanryen ki mon dir ki manti oubyen ki anbet lezot.
9 Mon parol i fasil pour konpran pour dimoun ki annan disernman
E i byen pour dimoun ki’n ganny konnesans.
10 Aksepte mon disiplin dan plas larzan*
E aksepte konnesans dan plas sa pli bon kalite lor,
11 Parski lasazes i pli bon ki koray.*
Napa okenn bon keksoz ki kapab ganny konpare avek li.
12 Mwan, lasazes, mon reste ansanm avek pridans.
Mon’n ganny konnesans e mon’n aprann reflesir byen.
13 Annan en gran respe pour Zeova i vedir ay sa ki mal.
Mon ay bann ki vantar, arogan, orgeye, bann move aksyon ek parol.
14 Mon annan bann bon konsey ek lasazes.*
Mon annan lentelizans ek pwisans.
15 Mwan ki fer bann lerwa kontinyen dirize
E mwan ki fer bann o zofisye fer bann lalwa ki drwat.
16 Mwan ki fer bann prens kontinyen dirize
E mwan ki fer bann dimoun enportan ziz dan en fason ki zis.
17 Mon kontan bann ki kontan mwan
E bann ki pe rod mwan pou trouv mwan.
18 Mon annan larises ek laglwar
E mon pou toultan annan larises* ek ladrwatir.
19 Sa ki mon donnen i pli bon ki lor, i menm pli bon ki lor pir
E sa ki sorti kot mwan i pli bon ki sa pli bon kalite larzan.*
20 Mon mars lo santye ladrwatir,
Dan milye bann semen lazistis.
21 Mon donn bann dimoun ki kontan mwan en gran leritaz
E mon ranpli zot bann stor.
22 Mon ti sa premye keksoz ki Zeova ti fer.
I ti fer mwan premye dan tou sa ki i’n fer depi byen lontan.
23 Depi byen lontan,* i ti donn mwan en plas,
Depi o konmansman, depi avan ki later ti ganny fer.
24 I ti napa delo profon ler i ti fer mwan,*
I ti napa bann sours delo ki ti pe deborde.
25 Avan ki bann montanny ti ganny zot plas,
Avan ki i ti fer bann pti montanny, i ti fer mwan,
26 Ler i pa ti ankor fer later e son bann lakanpanny
Oubyen sa premye lapousyer ki sorti dan later.
27 Mon ti la ler i ti prepar lesyel,
Ler i ti tras lorizon* lo sirfas lanmer,
28 Ler i ti met bann nyaz* anler,
Ler i ti fer bann landrwa ki annan delo profon,
29 Ler i ti donn lanmer en lord
Ki i pa devret al pli lwen ki i devret,
Ler i ti etabli* bann fondasyon later,
Mon ti sa enn ki i ti vreman kontan,* zour apre zour.
Mon ti toultan dan lazwa ler mon ti avek li.
32 Aprezan mon bann garson, ekout mwan.
Wi, ere bann ki kontinyen swiv mon bann semen.
33 Ekout disiplin e vin saz.
Pa zanmen rezet li.
34 Ere sa enn ki ekout mwan,
Ki vin boner kot* mon laport zour apre zour
E ki espere o bor mon lankadreman laport.
35 Parski sa dimoun ki trouv mwan pou ganny lavi
E i ganny laprouvasyon Zeova.
36 Me sa dimoun ki pa enterese avek mwan i fer son lekor ditor
E bann ki ay mwan i kontan lanmor.”