ZONAS

1 Zeova ti koz avek Zonas,*+ garson Amitay e dir: 2 “Leve e al Niniv,+ sa gran lavil. Anons en mesaz zizman kont li, parski mon’n vwar bann move keksoz ki son bann zabitan pe fer.”

3 Me Zonas ti al Tarsis pour li sov lwen avek Zeova. I ti desann Zope e i ti trouv en bato ki ti pe al Tarsis. Alor i ti pey son pasaz e i ti anbarke pour al avek zot Tarsis, pour sov lwen avek Zeova.

4 Apre sa, Zeova ti fer en gro divan soufle lo lanmer. Sa tanpet ti sitan for ki bato ti pros pour koule. 5 Bann maren ti telman per ki sakenn ti konmans priy son bondye pour demann led. Zot ti konmans tir bann keksoz ki ti dan bato e zet dan lanmer pour fer bato pli leze.+ Me Zonas ti’n desann anba dan fon* bato,* kot i ti alonze e tonm dan en profon sonmey. 6 Kaptenn bato ti al kot li e dir li: “Akoz ou pe dormi? Leve e priy ou bondye! Petet sa vre Bondye pou pran pitye pour nou e nou pa pou mor.”+

7 Apre, bann maren ti dir antre zot: “Vini, annou tir osor*+ pour konnen lekel ki responsab pour sa maler.” Alor zot ti tir osor e i ti tonm lo Zonas.+ 8 Zot ti dir li: “Silvouple dir nou, lekel ki responsab pour sa maler ki’n tonm lo nou? Ki travay ou fer e kote ou sorti? Lekel ou fanmir e dan ki pei ou sorti?”

9 Zonas ti reponn: “Mwan mon en Ebre e mon annan en gran respe pour* Zeova, sa Bondye lesyel, sa Enn ki’n fer lanmer ek later.”

10 Ler bann maren ti tann sa, zot ti pli per ankor e zot ti demann li: “Ki ou’n fer?” (Sa bann maren ti konnen ki Zonas ti pe sov lwen avek Zeova, akoz i ti’n dir zot.) 11 Alor zot ti demann li: “Ki nou devret fer avek ou pour lanmer kalmi?” Parski lanmer ti pe vin pli move ankor. 12 Zonas ti reponn: “Pran mwan, zet mwan dan lanmer e lanmer pou kalmi. Parski mon konnen ki sa gro tanpet i mon lafot.” 13 Kantmenm sa, bann maren ti naz zaviron avek tou zot kouraz* pour anmenn bato ater, me zot pa ti kapab parski lanmer ti pe vin pli move ankor.

14 Alor zot ti sipliy Zeova e dir: “O Zeova, silvouple, pa les nou mor akoz sa zonm! O Zeova, ou’n fer sa ki ou oule, alor pa blanm nou pour lanmor* en dimoun inosan.” 15 Apre sa, zot ti pran Zonas, zet li dan lanmer e lanmer ti kalmi. 16 Ler bann maren ti vwar sa, zot ti annan en gran lafreyer pour Zeova.+ Alor zot ti ofer en sakrifis pour Zeova e fer bann ve.

17 Aprezan, Zeova ti anvoy en gro pwason pour anval Zonas e Zonas ti reste dan vant sa pwason pour trwa zour ek trwa lannwit.+

2 Dan vant sa pwason, Zonas ti priy Zeova, son Bondye+ 2 e i ti dir:

“Dan mon maler, mon ti kriy Zeova e i ti reponn mwan.+

Depi dan fon* Latonm* mon ti demann led.+

Ou ti tann mon lavwa.

 3 Ler ou ti zet mwan dan fon lanmer, dan milye kannal,

Lanmer ti kouver mwan.+

Tou ou bann gro laroul ti kraz lo mwan.+

 4 Apre, mon ti dir, ‘Mon’n ganny pouse devan ou!

Ki mannyer mon pou vwar ou tanp sen ankor?’

 5 Delo ti kouver mwan e mon lavi ti an danze.+

Mon ti desann ziska dan fon lanmer.

Mon latet ti anpaye dan gomon.

 6 Mon ti desann ziska kot fondasyon bann montanny.

Baro later ti pe ferm lo mwan pour touzour.

Me Zeova, mon Bondye, ou ti tir mwan vivan dan sa trou.+

 7 Ler mon ti pros pour mor, Zeova ti sa Enn ki mon ti mazinen.+

Apre, ou ti tann mon lapriyer dan ou tanp sen.+

 8 Bann dimoun ki ador bann zidol ki pa vo nanryen i rezet sa enn ki demontre lanmour fidel anver zot.*

 9 Tandis ki mwan, mon pou eksprim mon rekonesans anver ou e mon pou ofer ou bann sakrifis.

Mon pou fer sa ki mon’n promet.+

Zeova ou sa Enn ki delivre.”+

10 Avek letan, Zeova ti donn lord sa pwason e i ti vomi Zonas lo sek.

3 Apre, Zeova ti koz avek Zonas pour en dezyenm fwa e dir:+ 2 “Leve e al Niniv,+ sa gran lavil. Anons sa mesaz ki mon pou dir ou.”

3 Alor Zonas ti obeir lord Zeova,+ i ti leve e al Niniv.+ Niniv ti sitan gran ki i ti pran apepre trwa zour apye* pour en dimoun travers sa lavil.* 4 Apre, Zonas ti antre dan sa lavil e i ti mars en lazournen antye. I ti pe anons sa mesaz: “Dan zis 40 zour, Niniv pou ganny detrir.”*

5 Ler zot ti tann sa, bann dimoun Niniv ti demontre lafwa dan Bondye.+ Tou dimoun, depi sa ki pli pti ziska sa ki pli gran, ti deside pour zennen* e met latwal goni* lo zot. 6 Ler lerwa Niniv ti tann mesaz Zonas, i ti leve lo son tronn e tir son lenz rwayal. I ti met en latwal goni e asiz dan lasann.* 7 Deplis, lerwa ti fer sa mesaz ganny anonse partou Niniv, “Par lord lerwa ek son bann zofisye: Napa okenn dimoun, zannimo oubyen troupo ki devret manz okenn keksoz. Zot pa devret ni manze ni bwar delo. 8 Tou dimoun i devret met latwal goni lo zot e lo zannimo. Zot devret sipliy Bondye, rezet zot move fason viv ek zot aksyon vyolan. 9 Lekel ki konnen si sa vre Bondye pa pou sanz son desizyon* e aret ankoler avek nou, pour ki nou pa mor?”

10 Ler sa vre Bondye ti vwar sa ki zot ti’n fer, ki mannyer zot ti’n rezet zot move fason viv,+ i ti sanz son desizyon* e i pa ti anmenn sa maler lo zot parey i ti’n dir.+

4 Me Zonas pa ti kontan ditou e i ti vreman ankoler. 2 Alor, i ti priy Zeova: “Ar wi Zeova! Pa sanmenm sa ki mon ti pe mazinen ler mon ti ankor dan mon pei? Sanmenm sa ki premye kou mon ti esey sove pour al Tarsis.+ Parski mon konnen ki ou en Bondye ki annan konpasyon ek pitye, ou pa ankoler vitman, ou annan en kantite lanmour fidel+ e ou pa kontan pini dimoun. 3 O Zeova, silvouple pran mon lavi,* plito mon mor ki mon kontinyen viv koumsa.”+

4 Zeova ti demande: “Eski ou annan rezon pour ou sitan ankoler?”

5 Alor, Zonas ti kit lavil e i ti al asize dan les lavil. I ti fer en pti tonnel e asiz dan lonbraz pour gete ki pou arive avek sa lavil.+ 6 Bondye Zeova ti fer en pye kalbas pous par lao latet Zonas, pour donn li lonbraz e soulaz li dan son soufrans. Zonas ti vreman kontan sa pye kalbas.*

7 Me son lannmen ler soley ti pe leve, sa vre Bondye ti fer en lever pik sa pye kalbas e i ti sek. 8 Ler soley ti konmans tape, Bondye ti osi anvoy en divan so sorti dan les e soley ti tap lo latet Zonas e i ti fer li feb. I ti kontinyelman demande pour mor e i ti dir, “Plito mon mor ki mon kontinyen viv koumsa.”+

9 Bondye ti demann Zonas: “Eski ou annan rezon pour ou sitan ankoler akoz sa pye kalbas?”+

Zonas ti reponn: “Mon annan rezon ankoler, mon sitan ankoler ki mon oule mor.” 10 Me Zeova ti dir: “Ou’n pran pitye pour en pye kalbas ki ou pa’n plante, ni fer pouse. I’n pouse dan en lannwit e i’n mor dan en lannwit. 11 Pa mon devret osi pran pitye pour Niniv, sa gran lavil+ ki annan plis ki 120,000 dimoun ki pa ni menm konn sa ki byen ek sa ki mal,* san kont sa kantite zannimo ki zot annan?”+