En sanzman pour sa zonm ris ek Lazar

Zezi fek donn son bann disip bann bon konsey konsernan bann keksoz materyel. Me pa zis son bann disip ki pe ekoute. Bann Farizyen osi i la e zot devret pran aker konsey Zezi. Akoz? Parski zot “kontan larzan.” Ler zot tann sa ki Zezi pe dir, zot “konmans boufonn li.”​—Lik 15:2; 16:13, 14.

Me sa pa fer Zezi per. I dir zot: “Zot fer krwar ki zot drwat devan dimoun, me Bondye i konn zot leker. Parski sa ki dimoun i konsider enportan, Bondye i vwar li degoutan.”​—Lik 16:15.

I fer en kantite letan depi ki bann Farizyen i ganny konsidere konman “enportan,” me la i’n ariv ler pour keksoz sanze. Bann ki dimoun i konsider enportan akoz zot annan larises, pouvwar politik e relizye pou ganny abese. Bann dimoun ordiner ki rekonnet ki zot annan en bezwen spirityel pou vin enportan. Zezi i fer li kler ki i annan en gran sanzman ki pe arive. I dir:

“Lalwa ek lansennyman bann Profet ti ganny anonse ziska Zan. Depi sa letan, bon nouvel lo Rwayonm Bondye pe ganny anonse e tou sort kalite dimoun pe lite pour antre ladan. Anfet, i pli fasil pour lesyel ek later disparet ki pour en pwen lo en let ‘i’ dan Lalwa disparet san ki tou keksoz dan Lalwa i ganny akonplir.” (Lik 3:18; 16:16, 17) Ki mannyer parol Zezi i montre ki en sanzman pe arive?

Bann sef relizye Zwif i byen fyer pour dir ki zot swiv Lalwa Moiz. Rapel sa ki bann Farizyen orgeye ti dir ler Zezi ti geri sa zonm aveg Zerizalenm: “Nou nou disip Moiz. Nou konnen ki Bondye ti koz avek Moiz.” (Zan 9:13, 28, 29) En rezon ki Lalwa Moiz ti ganny donnen i pour ed dimoun ki annan limilite aksepte Mesi, setadir Zezi. Zan ki batize ti dir ki Zezi i Pti Mouton Bondye. (Zan 1:29-34) Depi lepok Zan, bann Zwif ki annan limilite, sirtou bann pov, in tann konsernan “Rwayonm Bondye.” I annan en “bon nouvel” pour tou bann ki anvi vin sitwayen Rwayonm Bondye e profit son bann byenfe.

Lalwa Moiz in ganny akonplir akoz i’n ed dimoun aksepte Mesi. Deplis, byento zot pou nepli oblize swiv Lalwa. Par egzanp, Lalwa ti permet bann dimoun pour divorse pour diferan rezon, me la aprezan Zezi i eksplike ki “en dimoun ki divors son madanm e marye avek en lot i komet adilter. En dimoun ki marye avek en madanm ki’n divorse avek son msye i komet adilter.” (Lik 16:18) Sa parol i fer bann Farizyen vreman ankoler akoz zot kontan met bann lareg pour tou keksoz!

Aprezan Zezi i donn en legzanp ki montre lenportans sa sanzman ki pe arive. I koz lo de zonm ki zot sityasyon i sanz net. Anmezir ki nou egzamin sa legzanp, mazinen ki bann ki pe ekoute i bann Farizyen ki kontan larzan e ki dimoun i konsider enportan.

Zezi i dir: “I ti annan en zonm ris ki ti abitye met lenz mov byen ser e ki ti kontan profit son larises tou le zour. Me en mandyan ki ti apel Lazar, ki ti annan boubou partou lo li ti abitye ganny anmennen kot son baro. I ti anvi manz bann keksoz sorti lo latab sa zonm ris ki ti tonm ater. Menm lisyen ti vin lis son bann boubou.”​—Lik 16:19-21.

Bann Farizyen i kontan larzan, alor i evidan ki sa “zonm ris” i reprezante. Bann sef relizye Zwif osi i kontan byen abiye avek bann lenz ser ki lanmod. An plis ki zot larises materyel, i paret ki zot ris lo plan spirityel akoz zot annan bokou loportinite ek privilez pour servi Bondye. Zezi ti dir ki sa zonm ris ti’n met en lenz mov byen ser. Sa i montre ki zot annan en plas enportan e ki zot krwar ki zot pli byen ki lezot.​—Danyel 5:7, NWT.

Ki mannyer sa bann sef ris e orgeye i konsider bann dimoun ordiner ki pov? Zot mank respe pour zot e apel zot ‛am ha·’aʹrets ki vedir bann dernyen dimoun ki pa konn Lalwa e ki pa merit ganny ansennyen Lalwa. (Zan 7:49) Sa i parey sityasyon ki sa ‘mandyan ki apel Lazar’ i ladan. I telman lafen ki i menm anvi manz sa ptigin “keksoz sorti lo latab sa zonm ris ki ti tonm ater.” Parey Lazar ki kouver avek boubou, bann dimoun ordiner i ganny meprize konmsi zot malad spirityelman.

Malerezman i fer en pe letan depi ki keksoz i koumsa, me Zezi i konnen ki’n ariv ler pour en gran sanzman pour bann ki parey sa zonm ris e pour bann ki parey Lazar.

EN SANZMAN POUR SA ZONM RIS EK LAZAR

Zezi i eksplike ki mannyer sa sityasyon i sanz net. I dir: “Avek letan, sa mandyan ti mor e bann lanz ti anmenn li akote Abraam. Sa zonm ris osi ti mor e zot ti anter li. Dan Latonm, i ti pe soufer en kantite, i ti get anler e vwar Abraam dan lwen ek Lazar dan son kote.”​—Lik 16:22, 23.

Bann dimoun ki pe ekout Zezi i konnen ki i fer en kantite letan depi ki Abraam in mor e i dan Latonm. Labib i eksplik byen ki napa personn ki dan Latonm ki kapab vwar oubyen koze. Sa i enkli Abraam. (Eklezyast 9:5, 10) Alor ki bann sef relizye i konpran avek legzanp Zezi? Ki i pe esey dir konsernan bann dimoun ordiner ek bann sef relizye ki kontan larzan?

Zezi fek koz lo en sanzman ki’n arive avek konmansman minister Zan. I’n dir ki ‘Lalwa ek lansennyman bann Profet ti ganny anonse ziska Zan ki batize, me depi sa letan, bon nouvel lo Rwayonm Bondye pe ganny anonse.’ Alor ler Zan ek Zezi Kri in prese, sa in fer ki sityasyon Lazar ek sa zonm ris in sanze, dan en sans zot in mor e zot in ganny en nouvo pozisyon devan Bondye.

Sa sanzman in sirtou enportan pour bann pov ki annan limilite e ki pa’n ganny manze spirityel pour en bon pe letan. Me zot pe ganny ede e zot aksepte mesaz lo Rwayonm ki’n ganny prese par Zan ki batize e apre par Zezi. Avan sa, zot ti bezwen kontant zot avek sa ptigin ‘sorti lo latab spirityel [bann sef relizye] ki ti tonm ater.’ La aprezan zot pe ganny nouri avek bann laverite enportan sorti dan Lekritir, sirtou bann keksoz ekstraordiner ki Zezi pe eksplike. I konmsi alafendefen zot dan en pozisyon kot zot ganny laprouvasyon Zeova.

De lot kote, bann sef relizye ki ris e annan en gran lenfliyans i refize aksepte mesaz Rwayonm ki Zan ti anonse e ki Zezi pe prese partou dan zot pei. (Matye 3:1, 2; 4:17) Anfet sa mesaz i fer zot ankoler oubyen soufer en kantite akoz i koz konsernan en zizman ki Bondye pou anmennen avek dife. (Matye 3:7-12) I ti pou en soulazman pour bann sef relizye ki kontan larzan si Zezi ek son bann disip ti aret anons sa mesaz Bondye. Sa bann sef relizye i parey sa zonm ris dan sa parabol ki dir: “Papa Abraam, pran pitye pour mwan, anvoy Lazar tranp son bout ledwa dan delo pour rafresi mon lalang parski mon pe soufer bokou dan sa gro dife.”​—Lik 16:24.

Me pa sa ki pou arive. Laplipar bann sef relizye pa pou sanze. Zot ti’n refize “ekout lansennyman Moiz ek bann Profet.” Sa bann profesi ti’n devret pous zot pour aksepte Zezi konman Mesi ek Lerwa Bondye. (Lik 16:29, 31; Galat 3:24) Zot pa pare pour abes zot e les bann pov ki annan limilite ek laprouvasyon Bondye ed zot. Bann disip Zezi pa kapab fer konpromi oubyen kasyet laverite zis pour fer bann sef relizye plezir oubyen soulaz zot. Dan son legzanp, Zezi i dekrir sa par servi parol ki “Abraam” i dir sa zonm ris:

“Mon garson, mazinen ki ou ti annan en kantite bon keksoz tou dilon ou lavi, me Lazar li i ti ganny sa ki move. Aprezan, i pe ganny rekonforte isi me ou ou pe soufer en kantite. Deplis, i annan en gran ranpar ki separ nou ek ou, pour ki bann ki anvi traverse sorti isi pour vin kot ou zot pa kapab e personn pa kapab traverse sorti kot ou pour vin kot nou.”​—Lik 16:25, 26.

Pa sa i en bon sanzman! Se konmsi sityasyon in konpletman sanze pour bann sef relizye orgeye ek bann dimoun ki annan limilite. Bann dimoun ki annan limilite in vin disip Zezi e finalman zot ganny lafors ek manze spirityel. (Matye 11:28-30) Sa sanzman pou pli evidan ankor dan detrwa mwan ler nouvo lalyans i ranplas lalyans Lalwa. (Zeremi 31:31-33; Kolosyen 2:14; Ebre 8:7-13) Ler Bondye i donn son lespri sen zour Lapannkot lannen 33, i pou napa okenn dout ki se bann disip Zezi ki annan laprouvasyon Bondye, pa bann Farizyen ek lezot sef relizye.