LESON 29

Ki arive avek nou ler nou mor?

Edisyon ki enprimen

Eski ou’n deza perdi en dimoun ki ou kontan dan lanmor? Dan sa moman difisil petet ou’n demann ou lekor: ‘Ki arive avek nou ler nou mor? Eski en zour nou pou vwar nou bann defen ankor?’ Dan sa enn leson e lot ki swiv, nou pou vwar larepons rekonfortan ki Labib i donnen lo sa size.

1. Ki arive avek nou ler nou mor?

Zezi ti konpar lanmor avek en profon sonmey. En dimoun ki dan en profon sonmey pa konnen ki pe arive otour li. Ki mannyer lanmor i parey en sonmey? Apre ki en dimoun in mor, i pa santi okenn douler. I pa ni mank son bann zanmi ek fanmir, kantmenm i ti kontan zot sitan en kantite. Labib i dir: “Bann ki’n mor pa konn nanryen.”—Lir Eklezyas 9:5.

2. Ki byenfe nou gannyen ler nou konn laverite lo lanmor?

Bokou dimoun i per lanmor e serten i menm per bann dimoun mor! Me sa ki Labib i dir lo lanmor i kapab rekonfort ou. Zezi ti dir: “Laverite pou fer zot lib.” (Zan 8:32) Serten larelizyon i dir ki en dimoun i annan en nanm imortel ki kontinyen viv apre lanmor. Me Labib pa dir sa. Alor, napa personn ki soufer apre ki i’n mor. Deplis, vi ki bann mor pa konsyan nanryen, zot pa kapab ni fer nou dimal. I pa neseser alor pour ador nou bann defen oubyen fer kek keksoz pour zot pa ankoler avek nou. I pa vo lapenn osi pour nou priy pour zot.

Serten dimoun i dir ki zot kapab kominik avek bann mor. Me sa pa posib. Parey nou fek aprann, bann mor “pa konn nanryen.” Bann ki krwar zot pe kominik avek zot bann defen, an realite zot kapab pe kominik avek bann demon ki fer krwar zot sa bann dimoun ki’n mor. Alor, ler nou konn laverite lo lanmor, sa i protez nou kont pyez bann demon. Zeova i demann nou pour pa esey kominik avek bann mor akoz i konnen ki kominik avek bann demon i danzere pour nou.—Lir Deterononm 18:10-12.

AL PLI O PROFON

Aprann plis lo sa ki Labib i dir konsernan lanmor e annan plis lafwa dan en Bondye lanmour ki pa fer bann dimoun ki’n mor soufer.

En msye avek son de zenn zanfan pe asize lo en ban zour lanterman son madanm ki manman son zanfan. Zanmi ek fanmir i la pour rekonfort zot.

3. Aprann laverite lo bann dimoun mor

Dimoun partou dan lemonn i annan diferan krwayans konsernan sa ki arive letan nou mor. Byensir pa tou sa bann krwayans ki vre.

Dan ou pei, ki dimoun i krwar i arive avek en dimoun ler i mor?

Pour vwar ki Labib i dir, zwe sa VIDEO.

VIDEO: Kote bann mor i ete?—Ekstre (1:19)

Diferan portre: Bann senn dan sa video ‘Kote bann mor i ete?—Ekstre.’ 1. En lekor mor lo lili lopital. 2. En msye ki vwayaz dan tren pe dormi ant de dimoun.

Lir Eklezyas 3:20 e apre reponn sa bann kestyon:

Dapre sa verse, ki arive avek en dimoun ler i mor?
Eski i annan okenn keksoz ki kontinyen viv ler en dimoun i mor?

Labib i koz lo lanmor Lazar ki ti en bon zanmi Zezi. Anmezir ki ou lir Zan 11:11-14, remarke ki Zezi ti dir lo Lazar. Apre reponn sa bann kestyon:

Zezi ti konpar lanmor avek kwa?
Ki sa i montre nou lo lanmor?
Ki mannyer ou santi konsernan sa ki Labib i dir lo lanmor?

4. Laverite lo lanmor i liber nou

Ler nou konn laverite lo lanmor sa i liber nou avek lafreyer bann mor. Lir Eklezyas 9:10 e apre reponn sa kestyon:

Eski bann dimoun mor i kapab fer nou ditor?

Ler nou konn laverite dan Labib, nou pa pou ador bann mor oubyen fer kek keksoz pour zot pa ankoler avek nou. Lir Izai 8:19 ek Revelasyon 4:11 e apre reponn sa kestyon:

Ki mannyer ou krwar Zeova i santi ler en dimoun i ador oubyen rod led avek dimoun ki’n mor?

Diferan portre: Bann koutim ladorasyon zanset. 1. Bann dimoun avek en mask koksis lo zot figir. Zot pe marse avek bann imitasyon leskelet. 2. En msye i azenou pe priye devan en latonm kot i annan manze ki ganny ofer avek sa dimoun mor. 3. Trwa msye pe danse dan en resanz tribal. — Laverite lo lanmor i liber nou avek bann koutim ki depler Zeova

5. Laverite lo lanmor i rekonfort nou

Bokou dimoun in ganny ansennyen ki ler zot mor zot pou soufer akoz sa ki zot in fer dan lepase. Me i rekonfortan pour konnen ki personn pa soufer ler i mor, ni menm en dimoun ki’n fer bann keksoz vreman move. Lir Romen 6:7 e apre reponn sa kestyon:

Parey nou’n lir dan Labib, en dimoun ki’n mor in ganny akite oubyen pardonnen avek son pese. Dan sa ka, eski ou krwar ki bann dimoun ki’n mor pe soufer akoz bann fot ki zot in fer dan lepase?

Pli nou aprann konn Zeova, pli nou pou realize ki i pa pou zanmen permet ki bann dimoun ki’n mor i soufer. Lir Deterononm 32:4 ek 1 Zan 4:8 e apre reponn sa bann kestyon:

Eski sa Bondye lanmour ki’n ganny dekrir dan sa bann verse pou kontan ki dimoun mor i soufer?
Eski laverite konsernan bann mor i rekonfortan pour ou? Akoz?

SERTEN DIMOUN I DIR: “Mon per ki pou arive avek mwan ler mon mor.”