Lentrodiksyon

Sa liv Bann verse Labib pour nou lavi Kretyen pou ed ou pour rod bann verse ek bann resi dan Labib ki kapab ed ou fer fas avek problenm dan lavi. I pou osi ed ou pour rod bann verse Labib ki kapab ed ou ankouraz lezot e fer bann bon desizyon ki pou onor Zeova. Zis rod sa topik ki ou bezwen, bann kestyon ek pti rezimen pou ed ou vwar sa lenformasyon ki ou pe rode pli fasilman. (Vwar bwat “Ki mannyer pour rod lenformasyon.”) Ou pou trouv en kantite konsey ki itil, gidans ek rekonfor ki sorti dan Parol Bondye. Ou pou osi trouv bann perl spirityel ki ou kapab partaz avek lezot, bann verse Labib ki pou ankouraz zot, ed zot ler zot rankontre problenm, donn zot serten konsey ek lankourazman.

Ki mannyer pour rod lenformasyon

Pour rod en topik, ou kapab servi sa bwat resers oubyen al dan bann diferan kategori. Sa liv Bann verse Labib pour nou lavi Kretyen in ganny klasifye dan set kategori: Problenm, Kondwit, Kongregasyon, Lavi toulezour, Fanmir, Spirityalite ek Kalite. Laplipar topik pou tonm anba sa set kategori. Swazir enn sa bann kategori e get lalis ki anba la. Par kont, si ou pa konnen dan ki kategori pour rode, swazir Tou e get lalis tou bann topik ziska ki ou vwar sa enn ki ou pe rode. Anba sak topik, ou pou vwar bann tit dan gro lekritir nwanr, serten i en kestyon oubyen en pti rezimen. Ler ou lir bann verse Labib ki dan gro lekritir nwanr, reflesi e medit lo ki mannyer sa bann verse i reponn sa kestyon oubyen siport sa pti rezimen. Serten topik in ganny divize an diferan parti pour fer li pli fasil pour vwar sa lenformasyon ki ou pe rode. I annan “Vwar osi” lezot verse. Sa i kapab donn lezot lenformasyon. Anba sa bann diferan topik, ou pou osi vwar sa tit “Legzanp dan Labib ki kapab ed ou.” En pti leksplikasyon i entrodwi pwen enportan oubyen leson lo sa verse Labib. Ler ou lir sa verse Labib, ou kapab servi sa leksplikasyon pour ed ou reflesi.

Sa liv pa donn tou bann verse ki koz lo en serten size, me i en bon konmansman pour kontinyen fer resers. (Pr 2:1-6) Pour al pli o profon, ou kapab servi bann verse adisyonnel (marginal references) ek bann not ki ganny mansyonnen dan New World Translation of the Holy Scriptures. Ou osi kapab servi sa Liv resers pour Temwen Zeova oubyen Watch Tower Publications Index pour kapab etidye pli o profon, konpran pli byen bann verse Labib e ki mannyer pour aplik zot. Konmans par etidye bann piblikasyon ki pli resan pour fer sir ki ou ganny sa leksplikasyon lo Labib ki pli azour.

Nou swete ki sa liv Bann verse Labib pour nou lavi Kretyen pou ed ou annan plis lasazes, konnesans ek konprenezon lo Labib. Ler ou servi sa liv, ou pou vreman konvenki ki “parol Bondye i vivan e pwisan.”—Ebr 4:12.