Sizyenm krwayans: Bondye i aksepte zimaz ek zidol dan ladorasyon
Kote sa krwayans i sorti? “Bann premye Kretyen pa ti servi zimaz dan zot ladorasyon . . . Rezon akoz zimaz ti ganny entrodwir dan legliz dan katriyenm ek senkyenm syek ti pour ki bann dimoun ki ti napa gran ledikasyon i kapab pli byen aprann laverite lo larelizyon Kretyen atraver zot olye atraver bann diskour oubyen liv.”— Cyclopedia of Biblical, Theological, and Ecclesiastical Literature, par McClintock ek Strong, Volim 4, paz 503 ek 504.
Ki Labib i dir? “Ou pa devret fer pour ou menm en zidol, ki dan laform okenn keksoz dan lesyel anler oubyen lo later anba oubyen dan delo anba. Ou pa devret prostern devan zot oubyen ador zot.” (Egzod 20:4, 5, The Holy Bible—New International Version) Zapot Zan ti ekrir bann premye Kretyen: “Mon bann pti zanfan, prezerv zot kont bann zidol.”—1 Zan 5:21.
Eski zimaz, parey legliz i dir, i senpleman en mwayen pour apros oubyen onor sa ki zot pe reprezante? The Encyclopedia of Religion i dir: “O konmansman petet bann zimaz ti ganny servi prensipalman dan lansennyman e konman dekorasyon; omwen, sa ti sa largiman ki zot ti donnen pour zistifye akoz zot ti ganny servi. Me en pe letan apre zot ti ganny servi konman bann lobze ladorasyon. Sa ti sirtou vre an rapor avek bann zidol ki ti vin en laspe enportan dan larelizyon Orthodox dan bann pei Les Lazi. Me, profet Izai ti annan rezon demande: “Avek lekel Bondye i kapab ganny konpare? Ki zimaz ou kapab kree ki parey li?”—Izai 40:18, The New Jerusalem Bible.
Konpar sa bann verse Labib: Izai 44:13-19; Akt 10:25, 26; 17:29; 2 Korentyen 5:7
REALITE:
Bondye pa aksepte ki nou servi zimaz ek zidol
REZET BANN FO KRWAYANS, RESTE ATASE AVEK LAVERITE
Ki konklizyon nou kapab tire atraver sa pti revizyon lo bann fo krwayans ki ankor pe ganny ansennyen dan bokou legliz? Sa “bann fab [Grek myʹthos] byen aranze” pa kapab ganny konpare avek sa laverite senp e rekonfortan ki sorti dan Labib.—2 Pyer 1:16.
Alor, annan en lespri ouver e pa ezite pour konpar sa ki ou’n ganny ansennyen avek Parol Bondye ki sours laverite. (Zan 17:17) Alor, sa promes i a vin vre pour ou: “Zot a konn laverite e laverite i ava fer zot lib.”—Zan 8:32.