Eski ou ti konnen?
Akoz Labib i asosye ladorasyon Baal avek bann aktivite seksyel san kontrol?
Baal ti sirtou en bondye fertilite pour bann Kananeen. Son bann adorater ti krwar ki Baal ti sipoze donn zot en bon rekolt ek en kantite troupo. Me, dapre liv Manners and Customs in the Bible, “aktivite seksyel ki ti ganny pratike kot bann lasapel ti ankouraz bondye tanpet ek son madanm Ashera pour annan relasyon seksyel pour fer later vin fertil afen ki zot rekolt ek troupo i a vin annabondans.”
Bann Kananeen ti krwar ki Baal ti al kasyet anba later pandan lasezon sek ler Mot, bondye lanmor ek lasesres ti ganny laviktwar lo li. Me kan lapli ti konmans tonbe, sa ti endike ki Baal ti’n revin o pouvwar e ki vezetasyon ek lavi ti pou annabondans ankor. Bann Kananeen ti selebre sa sezon par bann parti san kontrol. Sa i eksplike akoz bann Izraelit ki ti ador Baal Peor ti fini par pratik “limoralite seksyel avek bann fiy sorti Moab.”—Nonm 25:1-3.
Ki Zezi ti oule dir ler i ti dir ki bann profeser Lalwa ek Farizyen ti parey bann “latonm blansi”?
Zezi ti denons bann profeser Lalwa ek Farizyen konman bann ipokrit e i ti dir zot: “Zot parey bann latonm blansi ki paret zoli an-deor, me ki anndan i plen avek bann zosman dimoun mor ek tou kalite lapouritir.” (Matye 23:27) Bann Zwif ti annan labitid blansi bann latonm avek laso a lafen sezon lapli lo kenzyenm zour mwan Adar, en mwan avan lafet Lapak, afen ki dimoun ti kapab remark zot. Anfet, avek lapli, sa bann latonm ti tant pour perdi sa kouler blan.
Dapre The Jewish Encyclopedia, sa bann latonm ti’n ganny blansi avek laso pour “bann dimoun ki ti pas par sa bann semen pandan lafet Lapak” evite tous avek zot pour ki zot pa vin enpir. Sa lalwa dan Nonm 19:16 ti dir ki en dimoun ki tous en lekor mor, en lezo oubyen latonm ti pou vin enpir pandan set zour. Bann Izraelit ki ti enpir pa ti pou kapab partisip dan ladorasyon pir, sinon zot ti pou ganny santans lanmor. (Levitik 15:31) Zezi ti donn sa legzanp detrwa zour avan lafet Lapak; sa koutim ki zot ti annan pour blansi bann latonm avek laso tou le zan ti bezwen ankor fre dan lespri son lodyans. Anfet, Zezi ti pe fer resorti ki son bann lennmi relizye pa ti sa ki zot ti fer krwar zot ti ete e dimoun ki ti frekant zot ti vin enpir lo plan spirityel.
[Portre lo paz 10]
BAAL-ZEKLER, 14ZYENM/13ZYENMSYEK A.N.L.