Eski nou’n ganny kree pour al viv dan lesyel?
PA SA lespwar pour viv dan lesyel i kapab vreman atiran! Bann Mizilman, Endou, Boudis, manm larelizyon Kretyen e menm bokou ki pa enterese avek larelizyon i annan diferan pwennvi lo sa ki arive apre lanmor. Normalman bokou dimoun i mazin lesyel konman en landrwa ki gou e zoli, kot dimoun nepli soufer e zot reini avek bann “dimoun ki zot kontan ki’n kit zot.” Pourtan, pour laplipar dimoun sa parol i vre: Tou dimoun i anvi al dan lesyel, me personn pa anvi mor pour al laba. Akoz sa i leka?
Si nou ti’n ganny kree pour nou mor pour al dan lesyel, pa bokou dimoun ti pou enpasyan pour mor e al dan lesyel zis parey en zanfan i enpasyan pour vin en adilt oubyen en zenn i enpasyan pour marye? Me an zeneral dimoun pa anvi mor.
Kantmenm sa, bann sef relizye i dir ki apre ki nou’n reste lo later pour en pti pe letan, nou sipoze al viv dan lesyel. Par egzanp, Theodore Edgar Cardinal McCarrick en larsevek ki’n pran son retret ki reste Washington, D.C. ti dir: “Sa i pa sa kalite lavi ki nou’n ganny kree pour viv. Nou’n ganny kree pour viv dan lesyel.” Pareyman, en ansyen prezidan National Association of Evangelicals Lanmerik ti dir: “Bi lavi i pour loue Bondye e al viv dan lesyel . . . akoz lesyel i nou landrwa reste.”
Bann ki krwar bann dimoun mor i al viv dan lesyel i normalman baz zot lafwa lo zis en pti gin lenformasyon ki zot gannyen. George Barna, prezidan en lakonpannyen ki fer resers lo diferan pwennvi relizye ti trouve ki bokou dimoun i adopte bann “pwennvi lo lavi e lavi apre lanmor baze lo bann lide ki sorti dan bann sours ki konpletman diferan, parey bann film, lanmizik ek liv.” En paster Episcopalian Florid ti dir: “Nou pa konn nanryen konsernan lesyel, eksepte ki lesyel i sa landrwa kot Bondye i ete.”
Par kont, lesyel i en size enportan ki ganny diskite dan Labib. Dapre Parol Bondye, ki mannyer lesyel i ete? Eski imen ti ganny kree pour viv dan lesyel? Si dimoun i vreman al dan lesyel, ki zot pou fer laba?
[Pwen adisyonnel lo paz 3]
Akoz bokou dimoun i anvi al dan lesyel, me personn pa anvi mor pour al laba?