Paran—Enkilke bann Bon Labitid dan Zot Zanfan
1 Bann bon labitid pa vin natirelman, ni menm par aksidan. Anplis ki sa, i pran letan pour enkilke bann bon labitid dan en zanfan. “Enkilke” i vedir “transmet gradyelman” oubyen “fer antre pti gin par pti gin.” I demann konsistans delapar paran pour zot kapab “elve zot [bann zanfan] dan en ledikasyon ek lenstriksyon Senyer.”—Efe. 6:4.
2 Konmans Depi Pti Baba: Abilite bann pti zanfan pour aprann e pour fer bann nouvo keksoz i remarkab. Kantmenm adilt i souvan vwar li difisil pour aprann en nouvo langaz, bann zanfan lakres i kapab aprann de ou trwa langaz anmenmtan. Pa zanmen krwar ki ou zanfan i tro pti pour devlop bann bon labitid. Si lenstriksyon dan bann verite biblik i konmans boner e i kontinyen, lemoman ki en zanfan in ganny en pti laz, son lespri pou’n ranpli avek sa konnesans ki pou donn li “lasazes ki kondir dan lavi eternel.”—2 Tim. 3:15.
3 Fer Predikasyon en Labitid: Pres regilyerman sa bon nouvel Rwayonm Bondye i en bon labitid pour enkilke dan en zanfan pandan son bann lannen formasyon. Bokou paran i konmans fer sa, par anmenn zot zanfan dan minister port-an-port pandan ki sa zanfan i ankor pti baba. Partisipasyon regilye bann paran dan predikasyon i ed zot zanfan pour devlop lapresyasyon ek zel pour minister. Paran i kapab montre zanfan konman pour rann temwannyaz dan diferan laspe predikasyon.
4 Partisip dan Lekol Minister Teokratik i osi ed bann zanfan. I ansenny zot bann bon labitid pour etidye e konman pour lir e konpran. Zot aprann konman pour fer bann konversasyon lo Labib, fer retourn vizit, e kondwir letid Labib. En tel formasyon i kapab enspir zot pour vin pionye e aspir bann privilez spesyal dan servis. Bokou Betelit ek misyonner i rapel avek lapresyasyon zot bann letan dan Lekol Teokratik e konsider li konman en provizyon ki’n ed zot devlop bann bon labitid.
5 Nou tou nou parey later dan lanmen sa Gran Potye, Zeova. (Iza. 64:8) Pli sa later i mou, i pli fasil pour formen. Pli i pran letan pour sek, i pou vin pli dir. I menm parey avek dimoun. Ler zot ankor zenn, zot pli fasil pour travay avek—e pli sa zanfan i zenn, rezilta pou pli meyer. Bann premye lannen zot lavi i bann lannen formasyon, moman kot zot pou ganny fasonnen pour lebyen oubyen pour lemal. Konman en paran ki responsab, konmans enkilke dan ou zanfan bann bon labitid dan minister Kretyen byen boner.