Lanmour i Motiv Nou Pour Prese
1 Nou bann Temwen Zeova, nou pli renonmen konman bann predikater zele mesaz Rwayonm. (Mat. 24:14) Plis ki sis milyon i aktif partou dan lemonn; bann nouvo i ganny azoute ler zot zwenn avek nou dan predikasyon. Bann sif i ganny kalkile baze lo partisipasyon dan sa travay.
2 Kwa ki motiv nou pour volonter nou letan pour akonpli en tel latas ki annan sitan bokou defi? Nou pa ganny forse, ni atire par en profi materyel, oubyen ganny ofer bann loner spesyal. Okonmansman, bokou nou ti per akoz nou ti santi ki nou enkonpetan, e reaksyon piblik ti souvan negatif. (Mat. 24:9) Laplipar obzervater pa kapab konpran kwa ki motiv nou. I bezwen annan en rezon byen enportan pour nou persevere.
3 Pwisans Lanmour: Zezi ti idantifye sa pli gran komann ler i ti deklare ki nou ‘devret kontan Zeova avek tou nou leker, nanm, lespri, ek lafors.’ (Mark 12:30) Nou lanmour pour Zeova i lakoz nou lapresyasyon profon pour li e sa ki i ete—Dirizan Siprenm, Kreater tou keksoz, ki ‘merite resevwar laglwar, loner ek pwisans.’ (Rev. 4:11) Napa nanryen ki kapab ganny konpare avek son bann kalite merveye.—Egz. 34:6, 7.
4 Konn Zeova e kontan li i motiv nou pour les nou lalimyer briye devan bann zonm. (Mat. 5:16) Nou lalimyer i briye ler nou piblikman loue li, koz konsernan son bann aksyon merveye, e propaz mesaz konsernan son Rwayonm. Zis parey sa lanz ki anvole atraver lesyel, nou annan “levanzil eternel pour anons tou zabitan later, tou nasyon, tribi, lalang ek pep.” (Rev. 14:6) Nou lanmour i sa lafors ki par deryer sa travay predikasyon partou dan lemonn.
5 Lemonn i konsider nou predikasyon konman en keksoz ‘bet’ ki devret ganny inyore. (1 Kor. 1:18) En gran zefor in ganny fer pour aret nou travay. Parey bann zapot ti dir, nou lanmour lwayal in ranforsi nou osi pour dir ki nou “pa kapab aret koz lo keksoz ki nou’n war e tande. . . . Nou devre obei Bondye plito ki zonm.” (Akt 4:20; 5:29) Kantmenm lopozisyon, travay predikasyon i kontinyen agrandir dan tou kwen lemonn.
6 Nou lanmour pour Zeova i parey en dife ki pe brile e ki pe pous nou pour deklar son bann keksoz merveye. (Zer. 20:9; 1 Pyer 2:9) Nou pou kontinyen “fer konnen parmi lepep son bann fason azir . . . akoz i’n azir dan en fason enkonparab”!—Iza. 12:4, 5.