Lanmour i motiv nou pour kontinyen fer predikasyon

1. Ki nou ti aprann dan renyon anyel 2023?

DAN renyon anyel 2023,a i ti annan bann azisteman dan nou konprenezon e nou ti tann bann lanons eksitan konsernan nou travay predikasyon. Par egzanp, nou’n aprann ki serten dimoun pou ganny sa loportinite pour zwenn ansanm avek pep Bondye menm apre ki Gran Babilonn i ganny detrir. Nou ti osi aprann ki apartir Novanm 2023, bann proklanmater pou nepli bezwen met en rapor konsernan tou bann keksoz ki zot fer dan predikasyon. Eski sa bann sanzman i fer ki aprezan nou travay predikasyon nepli sitan enportan e nepli sitan irzan parey avan? Definitivman non.

2. Akoz nou travay predikasyon i vin pli irzan avek sak zour ki pase? (Mark 13:10)

² Sak zour ki pase, nou travay predikasyon i vin pli irzan. Akoz? Parski i napa bokou letan avan ki lafen i arive. Annou vwar sa ki Zezi ti dir konsernan sa travay predikasyon ki pou ganny fer dan bann dernyen zour. (Lir Mark 13:10.) Dapre Levanzil Matye, Zezi ti dir ki sa bon nouvel pou ganny anonse partou lo later avan “lafen” i arive. (Mat. 24:14) Sa lekspresyon “lafen” pe refer avek ler lemonn Satan i ganny detrir konpletman. Zeova in fini desid konsernan “sa zour ek sa ler” ki sa pou arive. (Mat. 24:36; 25:13; Akt 1:7) Sak zour ki pase i fer nou vin pli pros avek lafen. (Rom. 13:11) Me ziska ki sa i arive, nou bezwen kontinyen fer sa travay predikasyon.

3. Kwa ki motiv nou pour fer predikasyon?

³ Ler nou reflesir lo nou travay predikasyon, i ti pou byen ki nou osi nou demann nou lekor sa kestyon: Akoz nou anons sa bon nouvel? Larepons i senp, lanmour ki motiv nou pour anons sa bon nouvel. Ler nou fer predikasyon, nou montre ki nou kontan sa bon nouvel, nou kontan dimoun e pli enportan ankor, nou kontan Zeova ek son non. Aprezan annou vwar konsernan sak sa bann keksoz.

NOU FER PREDIKASYON PARSKI NOU KONTAN SA BON NOUVEL

4. Ki mannyer nou reazir ler nou tann en bon nouvel?

⁴ Eski ou rapel lafason ki ou ti santi ler ou ti ganny en bon nouvel, petet ler en dimoun dan ou fanmir ti ganny en pti baba oubyen ou ti ganny en travay ki ou ti vreman bezwen? San dout ou ti anvi partaz sa nouvel avek ou fanmir ek zanmi. Eski en keksoz en pe parey ti arive ler ou ti tann sa pli bon nouvel, setadir sa bon nouvel konsernan Rwayonm Bondye?

5. Ki mannyer ou ti santi ler ou ti tann sa laverite ki sorti dan Parol Bondye pour premye fwa? (Vwar portre.)

⁵ Mazin lafason ki ou ti santi sa premye fwa ki ou ti tann laverite ki sorti dan Parol Bondye. Ou ti aprann ki ou Papa ki dan lesyel i kontan ou, ki i anvi ki ou form parti son bann serviter ki parey en fanmir, ki i’n promet ki i pou tir tou douler ek soufrans, ki en zour ou pou kapab vwar bann dimoun ki ou kontan ki’n mor ganny resisite dan en nouvo lemonn e ou ti aprann lezot keksoz ankor. (Mark 10:29, 30; Zan 5:28, 29; Rom. 8:38, 39; Rev. 21:3, 4) Sa bann laverite ki ou ti aprann ti fer ou vreman kontan. (Lik 24:32) Ou ti kontan sa ki ou ti pe aprann e ou ti anvi dir lezot konsernan sa ki ou ti pe aprann.—Konpar Zeremi 20:9.

6. Ki ou aprann avek leksperyans Ernest ek Rose?

⁶ Annou vwar en leksperyans. En frer ki apel Ernestb ti annan apepre di-z-an ler son papa ti mor. Ernest i dir: “Mon ti demann mon lekor: ‘Eski i’n al dan lesyel oubyen i zis nepli egziste?’ Mon ti zalou lezot manrmay ki zot papa ti ankor vivan.” Souvan Ernest ti al dan simityer, i ti azenou kot latonm son papa e i ti dir dan lapriyer: “Bondye silvouple, mon anvi konnen kote mon papa i ete.” Apepre 17 an apre ki son papa ti’n mor, Ernest ti ganny ofer en letid Labib e i ti aksepte. I ti kontan pour aprann ki bann mor pa konsyan nanryen konmsi zot dan en profon sonmey e ki Labib i promet ki zot pou ganny resisite dan lavenir. (Ekle. 9:5, 10; Akt 24:15) Finalman i ti ganny larepons bann kestyon ki ti pe fatig li pour bokou letan. Ernest ti vreman kontan bann laverite ki i ti pe aprann dan Labib. Son madanm, Rose, ti osi konmans etidye Labib e li osi i ti kontan sa ki i ti pe aprann. Zot ti batize an 1978. Zot ti vreman kontan pour partaz sa laverite ki ti presye avek zot fanmir, zanmi ek lezot dimoun ki ti pare pour ekoute. Ernest ek Rose in reisi ed plis ki 70 dimoun pour aprann konn Zeova e batize.

7. Ki i arive ler nou kontan laverite ki dan Labib? (Lik 6:45)

⁷ Ler nou kontan sa ki nou’n aprann dan Labib, nou anvi dir tou dimoun sa ki nou’n aprann. (Lir Lik 6:45.) Nou santi parey bann disip Kris dan premye syek ki ti dir: “Nou pa kapab aret koz lo keksoz ki nou’n vwar e tande.” (Akt 4:20) Nou sitan kontan laverite ki nou anvi partaz sa laverite avek otan dimoun posib.

NOU FER PREDIKASYON PARSKI NOU KONTAN DIMOUN

8. Kwa ki motiv nou pour anvi partaz sa bon nouvel avek lezot? (Vwar bwat “Kontan dimoun—Fer zot vin disip.”) (Vwar portre.)

⁸ Parey Zeova ek son Garson, nou kontan dimoun. (Prov. 8:31; Zan 3:16) Nou annan konpasyon pour bann dimoun ki pa “konn Bondye” e ki “napa lespwar.” (Efe. 2:12) Zot sitan annan problenm ki i konmsi zot pe noye e nou annan sa zile sovtaz ki zot bezwen, setadir sa bon nouvel konsernan Rwayonm Bondye. Sa lanmour ek konpasyon ki nou annan pour sa bann dimoun i motiv nou pour fer tou sa ki nou kapab pour partaz sa bon nouvel avek zot. Sa mesaz presye i kapab donn zot lespwar, ed zot pour annan sa pli meyer lavi la konmela e donn zot sa loportinite pour ganny “sa vre lavi,” setadir lavi eternel dan nouvo lemonn.—1 Tim. 6:19.

9. Ki lavertisman nou pe donn bann dimoun konsernan lavenir e akoz? (Ezekyel 33:7, 8)

⁹ Sa lanmour ki nou annan pour bann dimoun i osi motiv nou pour averti zot ki lafen sa move lemonn i pros. (Lir Ezekyel 33:7, 8.) Nou annan konpasyon pour bann dimoun otour nou e pour nou bann manm fanmir ki pa servi Zeova. En kantite parmi zot pe viv zot lavi san konnen ki byento i pou annan en “gran ladetres, enn ki pa’n zanmen arive depi konmansman lemonn ziska prezan e [ki] pa pou zanmen ariv ankor.” (Mat. 24:21) Nou anvi ki zot konnen ki sa pou en letan zizman kot Zeova pou detri tou fo larelizyon e apre sa, i pou detri sa move lemonn Satan pandan Armagedon. (Rev. 16:14, 16; 17:16, 17; 19:11, 19, 20) Nou anvi ki maksimonm dimoun posib i ekout nou e ki zot deside pour servi Zeova ansanm avek nou la konmela. Me ki pou arive avek bann dimoun, enkli nou bann manm fanmir, ki la konmela pa ekout nou mesaz?

10. Akoz i irzan ki nou kontinyen averti bann dimoun konsernan sa ki pou arive byento?

¹⁰ Parey nou’n diskite dan sa lartik avan, i kapab ki Zeova i sov bann dimoun ki konmans met lafwa dan li ler zot vwar destriksyon Gran Babilonn. Si sa i arive, i pli irzan ankor ki nou kontinyen averti zot. Reflesir lo sa: Sa ki nou dir zot la konmela i kapab sanmenm ki zot mazin lo la ler zot vwar destriksyon Gran Babilonn. (Konpar Ezekyel 33:33.) Petet zot pou mazin sa lavertisman ki nou ti donn zot e sa pou motiv zot pour servi Zeova ansanm avek nou avan ki i tro tar. Zis parey sa gard prizon ti konmans annan lafwa dan Zeova apre ki i ti annan “en gran tranblemandter,” petet serten ki pa ekout nou la konmela pou anvi zwenn ansanm avek nou ler zot vwar Gran Babilonn ganny detrir.—Akt 16:25-34.

NOU FER PREDIKASYON PARSKI NOU KONTAN ZEOVA EK SON NON

11. Ki mannyer nou donn Zeova laglwar, loner ek pwisans? (Revelasyon 4:11) (Vwar portre.)

¹¹ Sa rezon akoz nou anons sa bon nouvel i parski nou kontan Zeova ek son non ki sen. Nou vwar nou travay predikasyon konman en fason pour loue nou Bondye ki nou kontan. (Lir Revelasyon 4:11.) Nou dakor ki Zeova i merit laglwar, loner ek pwisans. Nou donn Zeova laglwar ek loner ler nou montre dimoun levidans ki Zeova ki’n “kree tou keksoz” e ki nou vivan parski in donn nou lavi. Nou donn Zeova pwisans, setadir nou pwisans, ler nou servi nou letan, lenerzi ek keksoz materyel pour donn nou meyer dan sa travay predikasyon dapre nou sirkonstans. (Mat. 6:33; Lik 13:24; Kol. 3:23) Nou kapab senpleman dir ki nou kontan koz lo sa Bondye ki nou kontan. Nou osi anvi koz avek lezot lo son non e sa kalite Bondye ki i ete. Akoz?

12. Ki mannyer nou sanktifye non Zeova dan predikasyon?

¹² Sa lanmour ki nou annan pour Zeova i motiv nou pour sanktifye son non. (Mat. 6:9) Sa i fer ki nou anvi dir lezot ki sa bann keksoz ki Satan in dir lo Zeova, pa vre. (Zen. 3:1-5; Zob 2:4; Zan 8:44) Dan predikasyon, nou vreman anvi koz avek lezot konsernan Zeova e konsernan sa Bondye ki i ete. Nou anvi ki tou dimoun i konnen ki lanmour i sa pli gran kalite ki Zeova i annan, ki son fason dirize i drwat e zis e ki byento son Rwayonm pou tir tou soufrans e fer ki bann imen i anpe e zwaye. (Ps. 37:10, 11, 29; 1 Zan 4:8) Ler nou defann repitasyon Zeova dan predikasyon, nou sanktifye son non. Nou osi kontan parski nou pe fer sa ki nou sipoze fer konman bann Temwen Zeova. Akoz nou kapab dir sa?

13. Akoz nou fyer pour ganny apele Temwen Zeova? (Izai 43:10-12)

¹³ Zeova in swazir nou konman son “bann temwen.” (Lir Izai 43:10-12.) Detrwa lannen pase, en let sorti kot Konsey Direkter ti dir: “Sa pli gran loner ki nou kapab annan i pour ganny apele en Temwen Zeova.”c Akoz sa? Annou vwar en legzanp. Meton en dimoun in anmenn ou ankour e in akiz ou konmkwa ou’n fer en keksoz mal. Ou pou bezwen en dimoun pour dir lezot ki sa lakizasyon i fo e ki ou en bon dimoun ki pa pou zanmen fer en keksoz koumsa. Lekel ki ou pou swazir? Ou ti pou zwazir en dimoun ki ou konnen, ki ou annan konfyans ladan e ki annan en bon repitasyon pour ki lezot i kapab krwar li. Ler Zeova i swazir nou konman son Temwen, i montre ki i konn nou byen e ki i annan konfyans ki nou pou dir lezot ki i sa sel vre Bondye. Nou vwar li en loner ki nou son Temwen e nou servi tou loportinite ki nou annan pour fer lezot konn son non e nou montre ki bann move keksoz ki’n ganny dir lo li, pa vre. Ler nou fer sa, nou fer en keksoz ki nou vreman fyer pour fer. Nou montre ki nou en Temwen Zeova.—Ps. 83:18; Rom. 10:13-15.

NOU POU KONTINYEN FER PREDIKASYON ZISKA LAFEN

14. Ki keksoz eksitan ki pou arive byento?

¹⁴ Nou vreman eksite pour vwar sa ki pou arive byento. Avek benediksyon Zeova, nou anvi ki bokou plis dimoun i zwenn ansanm avek nou avan gran ladetres i konmanse. Osi nou vreman eksite ki menm pandan gran ladetres ki pou sa letan pli difisil dan listwar imen, i kapab annan plis dimoun ki pou kit lemonn Satan e zwenn ansanm avek nou pour loue Zeova.—Akt 13:48.

15-16. Ki nou pou kontinyen fer e ziska kan?

¹⁵ Antretan i annan en kantite travay pour nou fer. Nou annan sa privilez pour anons sa bon nouvel konsernan Rwayonm Bondye partou lo later e sa i en travay ki pa pou zanmen ganny fer ankor. Me an menm tan nou bezwen kontinyen averti dimoun konsernan sa ki pou arive byento. Bann dimoun i bezwen konnen ki lafen sa move lemonn i pros e i pe vin vitman. Koumsa ler sa letan i arive, zot pou konnen ki sa mesaz ki nou ti anonse i sorti kot Bondye.—Ezek. 38:23.

¹⁶ Ki nou determinen pour fer? Vi ki nou kontan sa bon nouvel, nou kontan dimoun e pli enportan ankor, nou kontan Zeova ek son non, nou vreman anvi partisip dan sa travay predikasyon. Nou fer sa travay parski i irzan e nou fer li avek devouman, ziska ki Zeova i dir: “Sa travay predikasyon in fini!”