Gard Rwayonm premye
1 Met Rwayonm Bondye premye dan nou lavi e kontinyen fer li, i pa fasil kan nou pe fer fas avek presyon ekonomik oubyen lezot problenm. Kan nou rankontre difikilte, konman nou kapab gard Rwayonm premye? Ki nou pou fer si nou ganny ofer en travay ki kapab fer nou mank nou renyon oubyen ki enterfer avek nou predikasyon? Eski Rwayonm pou alor pran dezyenm plas dan nou lavi?
2 Lafwa for i neseser: Kan nou lafwa i ganny teste dan bann tel sirkonstans, nou pa devret oubliy promes Zeova ek lasirans Zezi pour ganny sipor divin si nou resers Rwayonm premye. (Ps. 37:25; Mat. 6:31-34) Bann lenfliyans ek presyon sa monn i kapab bar nou vizyon e anpes nou gard Rwayonm premye. Serten in permet lespwar pour ganny promosyon dan travay oubyen pour ganny benefis finansyel vin sa ki pli enportan dan zot lavi. Me, parey Pol, nou bezwen evalye byen kwa ki vreman enportan dan lavi.—Fili. 3:7, 8.
3 Eski nou bezwen fer bann Sanzman? En proklanmater ti dir: “Mon leker ti dan mon biznes—ti napa naryen ki ti annan sitan lenportans dan mon lavi. Mon ti santi ki mon kapab reste en Temwen anmenmtan ki mon kontinyen konsakre plis letan dan mon biznes.” Me i ti touzour annan en santiman ki i ti kapab fer plis pour servi Zeova. Avek letan, i ti abandonn son biznes ki ti en lobstak pour son progre spirityel. Enn fwa ki i ti’n dedye li antyerman avek travay Rwayonm, i ti kapab dir: “Aprezan mon santi ki devan Zeova mon pe fer byen dan mon lavi, annefe se sa ki pli enportan.”
4 En kantite in abandonn en karyer profann ek dezir pour ganny bann benefis finansyel, zot in senplifye zot lavi, e antreprann servis aplentan. Bann asistan ministeryel ek ansyen ki ankor zenn e selibater, ki’n asiste Lekol Formasyon Ministeryel in fer sa e zot pe rezwir bann bon privilez. Par imit legzanp merveye Pol, zot vreman satisfe avek bann keksoz materyel debaz.—1 Kor. 11:1; 1 Tim. 6:6-8; Ebr. 13:5.
5 Menm si lemonn i kapab ridikiliz nou pwenn-vi lo lavi, nou annan benediksyon Zeova. (1 Kor. 1:26-31) Eski pa i ankourazan pour konnen ki Zeova pou servi nou o maksimonm e i pou ed nou pour akonpli son travay? Loportinite ki nou annan konmela pour proklanm Rwayonm etabli par Bondye pa pou zanmen ganny repete. Alor la i sa letan pour gard Rwayonm Bondye premye dan nou lavi.