‘Ki mannyer zot pou tande?’
1 Zezi ti dir klerman: “Me avan, Bonn Nouvel i bezwen ganny anonse avek tou bann nasyon.” (Mark 13:10) Malgre nou bann zefor entans, i ankor annan milyon dimoun ki pa ankor resevwar en temwannyaz personnel. Serten gouvernman i restrikte nou travay. En kantite pei i annan bann gran popilasyon ki pe kontinyen agrandi rapidman. Alors, ‘ki mannyer zot pou tande?’—Rom. 10:14.
2 Annan Konfyans dan Zeova: Nou bezwen mazinen ki Zeova i konn kondisyon leker tou dimoun. Nenport ki sitiasyon ki en dimoun i ladan, si i senserman sers laverite lo Bondye, i pou trouve.—1 Kron. 28:9.
3 Abraam ti enkyet konsernan zabitan Sodonm ek Gomor. Me Bondye ti donn li sa lasirans ki Sodonm pa ti pou ganny detrir menm si ti annan zis dis dimoun drwat ki ganny trouve dan sa landrwa. (Zen. 18:20, 23, 25, 32) Zeova pa’n zanmen detrir bann dimoun drwat ansanm avek bann mesan, parey ti ganny demontre par delivrans Lot ek son de fiy.—2 Pyer 2:6-9.
4 En fwa Eliya ti panse ki i ti konpletman tousel pe servi sa vre Bondye. Parkont, Zeova ti asir li ki i pa ti tousel e ki sa travay ki i ti’n konmanse ti pou konplete. (1 Rwa. 19:14-18) Me konman sitiasyon i ete dan nou letan?
5 Reste okipe dan Servis Bondye: Lo ki lesel sa travay i bezwen kontinyen ganny fer, nou pa konnen. Zeova i responsab sa travay, e i pe servi son bann lanz pour sirvey sa travay. (Rev. 14:6, 7) I sa enn ki determinen ziska ki pwen sa temwannyaz i devret ganny donnen avek tou nasyon. Si Zeova i oule, i kapab fer sa mesaz Rwayonm fannen dan bann fason ki nou pa kapab mazinen afen ki en kantite dimoun i kapab “tann Parol Levanzil e krwar.” (Akt 15:7) Sa ki Zeova i fer pou an armoni avek sa ki i ete—en Bondye ki annan lanmour, ki saz e ki zis.
6 I nou privilez pour travay an armoni avek lavolonte Zeova, fer nou mye pour les tou dimoun antann sa bon nouvel.—1 Kor. 9:16.