Konstriksyon Lasal Rwayonm enternasyonal
dan serten Pei Lerop
1 Diran sa bann syek ki’n pase, travay bann Temwen Zeova dan serten pei Lerop, enkli Les Lerop, ti ganny restrikte. Dan plizyer ka, sa bann restriksyon ti tre sever. I ti difisil pour organiz bann renyon ouvertman, e pour servi en Lasal Rwayonm ti preski enposib. Parkont, dan sa ennde lannen ki’n pase, “Zeova in fer en gran keksoz pour nou. Nou’n vin zwaye.”—Ps. 126:3.
2 Konmansman 1983, sa kontrol lo Temwen Zeova ti konmans diminyen. An 1989, Temwen Zeova ti ganny rekonnet legalman an Lapolonny ek Laongri. An 1991, Temwen Zeova ti ganny anrezistre legalman Larisi. Depi sa, travay in prospere Larisi ek ansyen repiblik Linyon Sovyetik. Ant Mars 1996 ek Oktob 1998, Konsey Direkter ti aprouv 359 demann pour lón Lasal Rwayonm sorti kot bann biro brans ki pe siperviz 11 pei Lerop.
3 Anmezir ki ou get bann portre dan sa sipleman, reflesir lo bann gran keksoz merveye ki Zeova in fer an faver son pep. (Ps. 136:4) Ou pou kontan pour konnen ki bann kontribisyon ki lasosyasyon frer enternasyonal i fer pe byen ganny servi. Sa i reflekte sa ki Zezi ti dir dan Zan 13:35: “Dimoun pou war ki zot mon bann disip si zot kontan kanmarad.”
4 Parmi bann pei Lerop ki pe benefisye avek en laranzman pour ede konstri bann Lasal Rwayonm dan serten pei ki napa bokou resours i Laroumani. Laba, 36 Lasal Rwayonm in ganny konstri depi Zilyet 2000. Par servi menm model pour preski tou zot Lasal Rwayonm, Likrenn ti konstri 61 Lasal Rwayonm lannen 2001 e ankor 76 an 2002. Avek led bann larzan ki’n ganny kontribye pour Fon Lasal Rwayonm, plizyer santenn Lasal Rwayonm in ganny konstri an Bilgari, Kroasi, Larisi, Laserbi ek Montenegro, Masedwann, ek Moldova.
5 I pa’n telman fasil pour konstri bann Lasal Rwayonm dan serten pei, e bokou zefor i bezwen ganny fer avan ki konstriksyon i kapab konmanse. Souvan preparasyon pour konstriksyon i pran en kantite letan. Deplis, pri pour konstri en Lasal Rwayonm dan sa parti Lerop i bokou plis ki dan bokou rezyon Lafrik oubyen Sid Lanmerik. Me vi ki i annan en gran ogmantasyon dan lakantite dimoun ki ador Zeova, plizyer santenn Lasal Rwayonm i bezwen ganny konstri dan bann pei Lerop ki napa bokou resours!
6 I merveye pour vwar sa gran ogmantasyon rapid dan konstriksyon sa bann Lasal Rwayonm! Sa in donn en bon temwannyaz dan bann landrwa kot zot in ganny konstri, parey plizyer leksperyans i montre. Dan serten landrwa, lotorite in enpresyonnen par sa korporasyon ki bann frer in demontre par swiv bann gidans konstriksyon.
7 Izai ti byen profetize konsernan ogmantasyon dan vre ladorasyon dan sa letan. Atraver sa profet, Bondye ti predir: “Mwan menm Zeova, mon pou akseler li dan son letan.” (Iza. 60:22) Sa dis dernyen lannen in annan levidans kler ki i ti letan pour Zeova akseler ogmantasyon dan Les Lerop. Fotespere ki Zeova i kontinyen devers bokou benediksyon lo nou bann zefor pour akseler konstriksyon bann Lasal Rwayonm dan bokou pei pandan ki nou donn plis sipor sa Fon Lasal Rwayonm! Sa pou fer bokou plis Lasal Rwayonm ganny konstri dan bann pei ki napa bokou resours. I pou kontribye ver lagrandisman vre ladorasyon dan plizyer parti Lerop e pour ki en pli gran temwannyaz i ganny donnen “ziska landrwa pli lwen lo later.”—Akt 13:47.
[Bann portre lo paz 3]
Lasal Rwayonm Moscow, Larisi
[Bann portre lo paz 4-6]
Nouvo Lasal Rwayonm dan Les Lerop
Strumica, Masedwann
Daruvar, Kroasi
Bitola, Masedwann
Sokal, Lviv District, Likrenn
Mladost, Bilgari
Plovdiv, Bilgari
Krasnooktyabrskiy, Maykop Area, Larisi
Bački Petrovac, Laserbi ek Montenegro
Tlumach, Ivano-Frankivsk District, Likrenn
Rava-Ruska, Lviv District, Likrenn
Stara Pazova, Laserbi ek Montenegro
Zenica, Bosni ek Erzegovin
Sokal Lviv District, Likrenn
Zhydachiv Lviv District, Likrenn