Rod Loportinite pour prese
1 Sak dimoun dan kongregasyon, i dan diferan kalite sitiasyon. Me ansanm nou ini pour loue Zeova. (Ps. 79:13) Si problenm lasante oubyen lezot difikilte i anpes nou partisip otan dan predikasyon, ki mannyer nou kapab rod loportinite pour prese?
2 Dan Lavi toulezour: Zezi ti pres avek bann dimoun ki i ti zwenn toulezour. I ti koz avek Matye ler i ti pas kot en biro taks, e avek Zase ler i ti pe vwayaze. I ti osi koz avek en madanm Samariten ler i ti pe repoze. (Mat. 9:9; Lik 19:1-5; Zan 4:6-10) Dan nou lavi toulezour, nou osi nou kapab donn temwannyaz avek nenport dimoun ki nou zwenn. Si toultan nou annan en Labib, bann trak oubyen brosir, nou pou toultan pare pour koz lo nou lesperans.—1 Pyer 3:15.
3 Eski ou nepli kapab al port an port akoz ou laz oubyen ou dezabilite? Vey bann loportinite pour pres avek bann dokter, ners ek lezot dimoun ki ou zwenn. (Akt 28:30, 31) Si laplipar-di-tan ou sitiasyon i fer ou reste kot lakour, eski ou’n sey donn temwannyaz par telefonn oubyen par let? En ser ki toultan ekrir son bann fanmiy ki pa Temwen i enkli bann panse ankourazan sorti dan Labib ek bann leksperyans ki i’n gannyen ler i pe prese.
4 Dan Travay oubyen kot Lekol: Nou dezir pour loue Zeova pou osi pous nou pour rod loportinite pour senm legren laverite dan travay oubyen kot lekol. En zenn proklanmater wit an ti rakont son laklas sa ki i ti’n lir dan Réveillez-vous! konsernan lalin. Apre ki son mis ti’n aprann kote i’n ganny sa lenformasyon i ti konmans aksepte Latour Veyer ek Réveillez-vous! regilyerman. Pour nou ki travay, nou kapab met en kopi sa liv Ki Labib i dir kot lezot i kapab trouve. Sa i kapab fer zot demann kestyon ki pou donn nou loportinite pour donn temwannyaz.
5 Eski ou kapab mazin bann fason kot ou kapab rod loportinite pour prese toulezour? Par fer tou sa ki nou kapab malgre nou sitiasyon, annou fer zefor sak zour pour ‘loue Bondye par nou labous.’—Ebr. 13:15.