TENM POUR SA MWAN: “PRES SA PAROL, PERSISTE POUR FER LI.”—2 TIM. 4:2, NW.
Sezi bann loportinite ki ou gannyen pour partaz sa mesaz Rwayonm!
1. Ki leson nou kapab aprann avek legzanp David?
1 Lerwa David ti en dimoun ki pa ti les son bann sirkonstans paraliz li. Par egzanp David ti anvi konstri en lakaz pour Zeova. David ti aziste son bann lobzektif ler i ti ganny dir ki pa li ki ti pou konstri sa tanp me se Salomon ki ti pou fer. I ti met tou keksoz pare pour sa konstriksyon. (1 Rwa. 8:17-19; 1 Kron. 29:3-9) Olye konsantre lo sa ki i pa ti kapab fer, David ti plito konsantre lo sa ki i ti kapab fer. Ki mannyer nou kapab imit legzanp David anmezir ki nou rod bann fason pour partaz sa mesaz Rwayonm?
2. Ki mannyer nou kapab egzamin nou sirkonstans?
2 Fer sa ki ou kapab: Plizyer in senplifye zot lavi pour ki zot kapab fer pionye asistan ouswa ordiner. (Mat. 6:22, not) Eski ou osi ou kapab fer parey? Anmezir ki ou egzamin ou sirkonstans dan lapriyer, petet ou pou vwar ki ‘en gran laport in ouver pour fer en gran travay.’ Si wi, sezi sa loportinite!—1 Kor. 16:8, 9.
3. Ki bann loportinite pour rann temwannyaz nou kapab sezi menm si nou sirkonstans pa permet nou pour fer pionye?
3 Me si ou sirkonstans pa permet ou fer pionye? Pa bezwen inyor lezot loportinite ki ou annan. Par egzanp si ou pe travay avek bann non-krwayan akoz ou pa sezi sa loportinite pour rann temwannyaz avek zot? Oubyen si ou pe fer fas avek en problenm lasante, eski ou kapab sezi loportinite pour rann temwannyaz avek sa dimoun ki pe pran swen avek ou? Pa oubliye ki bann ki tre limite dan predikasyon akoz laz oubyen problenm lasante, i annan drwa raport zis 15 minit. Ler ou pe ranpli ou rapor pour le mwan, fer sir ki ou enkli letan ki ou’n pase dan temwannyaz enformel e osi lakantite piblikasyon, trak, lenvitasyon memoryal ek lasanble ki ou’n donnen. Petet ou pou etonnen ki mannyer sa bann pti loportinite pou fer en diferans lo ou rapor!
4. Ki ou determinen pour fer?
4 Nenport ki sirkonstans nou ladan, annou sezi tou loportinite pour partaz sa bon nouvel. Alor, nou pou ganny sa satisfaksyon lefet ki nou konnen ki nou pe fer tou sa ki nou kapab pour Rwayonm.—Mark 14:8; Lik 21:2-4.