Mars parey bann dimoun saz
1 Kan Zezi ti demann kat peser pour vin son disip, zot pa ti ezite, me o kontrer “deswit . . . zot ti swiv li.” (Mat. 4:18-22) Kan Sol sorti Tars ti konverti e apre revwar kler, li osi i pa ti tarde me plito “apre sa ti konmans prese deswit dan bann sinagog.” (Akt 9:20) Letan i kontinyelman pe al an avan, enn fwa ki i pase in ale pour touzour. Se pour sa rezon ki i enportan pour nou mars konman bann “dimoun saz” dan lafason ki nou servi nou letan.—Efe. 5:15, 16.
2 Levennman san ekspekte: Bann loportinite ki nou annan pour servi Zeova i kapab disparet demen. (Zak 4:14) Personn pa kapab ganny eparnyen avek bann “levennman san ekspekte.” (Ekle. 9:11) Deplis, nou tou nou laz pe monte, e dan sa lemonn ki nou pe viv nou pa kapab evit “bann zour difisil” ki nou eksperyanse anmezir ki nou vyeir, e sa i limit lakantite ki nou kapab fer dan servis Zeova. (Ekle. 12:1) Alors i pa saz pour tarde pour fer dedikasyon avek Bondye ouswa pour esper bann bon sirkonstans pour agrandi nou minister si pour le moman i posib. (Lik 9:59-62) Dan son bann vye zour Abraam ti annan lape ek trankilite akoz i ti’n servi son lavi avek sazes. I ti viv en lavi kot i ti devoue avek Zeova e se pour sa ki i ti mor “vye e satisfe.”—Zen. 25:8.
3 Letan i kourt: Nou osi nou anvi servi nou letan avek sazes akoz “letan i kourt.” (1 Kor. 7:29-31) Tre byento sa lemonn pou ariv ver son lafen. Bann loportinite ki nou gannyen pour partisip dan sa gran rasanbleman bann mouton pandan “rekolt later” pou terminen. (Rev. 14:15) Nou bezwen fer atansyon pour pa les traka lavi ek distraksyon pran tou nou letan ki nou ti a kapab pli byen servi dan predikasyon. (Lik 21:34, 35) Eski pa nou pou satisfe kan nou get dan lepase e vwar ki nou’n partisip plennman dan sa travay rekolt!
4 Nou bezwen kontinyen reste vizilan pour ki nou pa les pase bann loportinite ki vin dan nou semen pour partisip dan sa travay ki anmenn lazwa. Annou determinen pour fer tou sa ki nou kapab pour servi Zeova “osi lontan ki apel ‘ozordi.’” (Ebr. 3:13) Kan nou fer sa, nou pou montre ki nou vreman saz akoz “sa ki fer lavolonte Bondye i reste eternelman.”—1 Zan 2:17.