Sa bon nouvel pou ganny anonse!
1. Ki mannyer nou konnen ki napa nanryen ki kapab anpes sa travay predikasyon ganny fer?
1 Napa nanryen ki kapab anpes Zeova akonplir son lavolonte. (Iza. 14:24) Menm si i ti paret enposib pour Ziz Gideonn ek son 300 zonm ganny laviktwar kont en larme Madyanit 135, 000 zonm, Zeova ti dir li: “Ou pou sirman sov bann Izraelit dan lanmen bann Madyanit. Pa mwan ki pe anvoy ou?” (Ziz 6:14) Ki travay ki pe ganny sipor Zeova ozordi? Zezi ti dir: “Sa Bonn Nouvel Rwayonm pou ganny anonse partou dan lemonn.” (Mat. 24:14) Personn pa pou kapab anpes sa travay ganny fer!
2. Akoz nou kapab ekspekte ki Zeova i ed nou personnelman dan predikasyon?
2 Zeova i ed nou personnelman: Nou annan konfyans ki Zeova pou fer son bann Temwen reisi konman en group, me eski nou kapab ekspekte ki i ed nou personnelman? Kan i ti dan bezwen zapot Pol ti personnelman santi sa sipor ki Zeova ti donn li atraver son Garson, Zezi. (2 Tim. 4:17) Pareyman, nou kapab annan konfyans ki Zeova pou beni zefor ki nou fer pour akonplir son lavolonte.—1 Zan 5:14.
3. Dan ki sirkonstans Zeova i ed nou?
3 Eski ou telman trakase avek bann keksoz dan lavi tou le zour ki ou napa ase lenerzi pour al prese? “I pe donn lafors sa enn ki fatige.” (Iza. 40:29-31) Eski ou pe fer fas avek persekisyon oubyen lopozisyon? “Larg ou fardo lo Zeova li menm, e li i pou soutenir ou.” (Ps. 55:22) Eski parfwa ou mank konfyans dan ou prop lekor? “Ale, e mwanmenm mon pou avek ou labous.” (Egz. 4:11, 12) Eski ou annan problenm lasante ki limit lakantite ki ou kapab fer dan predikasyon? Ou presye dan lizye Zeova e i kapab servi ou zefor ki ou donnen avek tou ou leker, menm si i pa bokou.—1 Kor. 3:6, 9.
4. Si nou annan konfyans dan Zeova, ki lefe sa pou annan lo nou?
4 Zeova in “avans son lanmen, e lekel ki kapab fer li retournen.” (Iza. 14:27) Lefet ki nou annan konfyans ki Zeova pou beni nou travay, avek son led annou persevere e kontinyen pres avek lardyes.—Akt 14:3.