“Pour Bondye Tou i Posib”
1 Travay prensipal kongregasyon Kretyen se pour pres mesaz Rwayonm partou dan lemonn. (Mat. 24:14) Sa i en gran latas. Pour bokou obzervater, i paret ki i demann bann resours anplis ki sa ki nou deza posede. Pour lezot, akonpli sa latas i preski enkrwayab parski nou rankontre ridikil, lopozisyon, ek persekisyon. (Mat. 24:9; 2 Tim. 3:12) Pour bann ki pa tro krwar dan larelizyon i konvenki ki sa travay i en keksoz enposib pour akonpli. Sepandan, Zezi ti dir: “Pour Bondye tou i posib.”—Mat. 19:26.
2 Bann Legzanp Pozitif Pour Imite: Zezi ti konmans son minister konman en sel zonm kont lemonn. Napa ki son bann lennmi pa ti esey fer pour anpes li reisi, e pour fini kont fer li mor en lanmor martir. Kantmenm sa, alafen, Zezi ti deklare avek konfyans: “Mon’n ranport laviktwar lo lemonn.” (Zan 16:33) Vreman en lakonplisman ekstraordiner!
3 Bann disip Zezi ti demontre sa menm leta lespri kouraze e zele dan minister Kretyen. Bokou ti ganny fwete, bate, anprizonnen, e menm ganny met amor. Toudmenm, zot ti “byen kontan, ki zot ti ganny konsidere diny pour ganny maltrete pour sa Non Senyer.” (Akt 5:41) Avek bokou dezavantaz kont zot, zot ti akonpli sa latas pour pres sa bon nouvel “ziska tou bann landrwa pli elwannyen lo later” menm si i ti paret enposib.—Akt 1:8; Kol. 1:23.
4 Konman Reisi dan Nou Letan: Nou osi nou’n antreprann sa travay predikasyon Rwayonm avek zel kantmenm bann sirkonstans i paret enposib. Menm si nou ganny persekite, anprizonnen, restriksyon i ganny enpoze lo nou ek lezot lesey vyolan pour aret nou, nou pe reisi. Konman ki sa i posib? “‘Non pa par en lafors militer, ni menm par pwisans, me par mon lespri,’ Zeova bann larme in dir.” (Zek. 4:6) Avek soutyen Zeova, nanryen pa pou kapab aret nou travay!—Rom. 8:31.
5 Ler nou prese, nou napa rezon pour nou kanmi oubyen per oubyen santi ki nou enkonpetan. (2 Kor. 2:16, 17) Nou annan bann rezon valab pour kontinyen al devan pour propaz sa bon nouvel Rwayonm. Avek led Zeova, nou pou akonpli sa ki “pa posib”!—Lik 18:27.