Kwa ki fer ou zwaye?
1. Akoz nou merit zwaye a lafen sak mwan?
1 Ler lafen sak mwan i arive e tou dimoun i ganny demande pour donn zot rapor servis, kwa ki fer ou zwaye? (Gal. 6:4) Ki swa nou en pionye spesyal ki fer 130 erdtan dan predikasyon oubyen en proklanmater ki annan drwa raport zis 15 minit, nou tou nou merit zwaye akoz nou pe travay avek tou nou leker pour Zeova.—Ps. 100:2.
2. Akoz nou devret donn nou meyer dan servis Zeova?
2 Konman Souvren Senyer liniver, Zeova i merit sa ki pli meyer ki nou kapab donnen. (Mal. 1:6) Akoz nou lanmour pour li, nou’n dedye nou lavi pour fer son lavolonte. Alor, a lafen en lazournen oubyen lafen di mwan, si nou asire ki nou’n donn bann “premye fri” nou letan, talan ek lafors dan servis Zeova, savedir nou annan tou rezon pour nou zwaye. (Prov. 3:9) Par kont, si nou konsyans pe fatig nou, savedir nou devret egzamin nou lekor pour vwar ki nou kapab fer pour amelyore.—Rom. 2:15.
3. Akoz i pa saz pour konpar nou avek lezot?
3 ‘San ki ou bezwen konpar ou avek sa ki pour lezot’: I pa saz pour konpar nou avek lezot oubyen avek nou menm ler nou ti annan plis lafors. Sirkonstans i sanze. Nou tou nou annan diferan abilite. Si nou konpar nou avek lezot, nou pou tant pour anvi fer konpetisyon avek zot oubyen nou kapab santi ki nou napa valer. (Gal. 5:26; 6:4) Zezi pa ti fer okenn konparezon. I ti plito donn felisitasyon dapre sa ki en dimoun ti kapab fer.—Mark 14:6-9.
4. Ki leson enportan nou kapab aprann avek parabol Zezi konsernan talan?
4 Dan parabol Zezi konsernan bann talan, sak travayer ti ganny talan “sakenn selon son kapasite.” (Mat. 25:15) Ler zot met ti retournen e demann zot en rapor lo sa ki zot ti’n fer, bann ki ti’n travay dir dapre zot kapasite ek sirkonstans ti ganny felisite e partaz lazwa zot met. (Mat. 25:21, 23) Pareyman, si nou reste byen okipe dan predikasyon, nou kapab asire ki nou annan laprouvasyon Bondye e annan rezon pour nou zwaye!