Bondye i beni bann ki ed lezot

Bokou dimoun dan lemonn i bezwen manze ek en landrwa reste. Serten i zis bezwen en lespwar pour lavenir. Ki mannyer Bondye pou beni nou ler nou fer zefor pour ed sa bann dimoun?

SA KI LABIB I DIR

“Sa ki rann faver bann dernyen dimoun pe pret Zeova, e I pou rekonpans li pour son aksyon.”​—PROVERB 19:17, NWT.

KI I VEDIR ED EN DIMOUN KI DAN BEZWEN?

Zezi ti donn legzanp en zonm ki ti ganny atake par bann voler e ki ti kit li demi mor. (Lik 10:29-37) En etranze ti arete e pran swen avek sa zonm ki ti’n ganny en kantite blesir. I ti fer sa menm si i ti sorti dan en lot nasyon.

Sa etranze pa ti zis pran swen avek blesir sa zonm me i ti donn li bann keksoz ki i ti bezwen e i ti osi rekonfort li.

Ki nou aprann avek sa legzanp? Zezi ti pe montre ki nou devret ed bann ki dan bezwen. (Proverb 14:31) Labib i ansenny nou ki byento Bondye pou met en lafen avek soufrans ek lapovrete. Petet nou kapab demann nou lekor ki mannyer e kan ki Bondye pou fer sa? Sa lot lartik pou diskit lo bann benediksyon ki nou Kreater in promet pour donn nou.