“Aprezan mon kontan fer predikasyon!”

MON TI PERDI MON LAZWA

Malerezman, ler mon ti annan apepre 13 an, mon ti konmans dekile avek Zeova. I ti paret ki mon bann kanmarad lekol ti lib pour fer sa ki zot ti anvi e mon osi mon ti anvi annan sa kalite liberte. Mon ti santi ki mon paran ek bann standar Kretyen ti tro strik e mon ti mazinen ki i ti demann tro bokou zefor pour ador Zeova. Mon’n toultan krwar ki Zeova i egziste me mon ti nepli santi mwan pros avek li.

Mon pa ti aret anons sa bon nouvel konpletman me mon ti pe vreman fer en ptigin dan predikasyon. Mon pa ti prepare ler mon ti sorti dan predikasyon alor mon ti vwar li difisil pour konmans oubyen kontinyen en konversasyon. Sa ti fer ki mon ti napa retourn vizit oubyen letid Labib e mon ti nepli kontan pour fer predikasyon. Avek letan mon ti konmans degout predikasyon. Mon ti demann mon lekor: ‘Ki mannyer en dimoun i kapab kontinyen fer predikasyon semenn apre semenn e mwan apre mwan?’

Ler mon ti annan 17 an, mon ti anvi mon laliberte. Alor mon ti fer mon bagaz, kit lakour e al reste Lostrali. Mon paran ti sagren ler mon ti kit lakour. Zot ti sagren me zot ti krwar ki mon ti pou kontinyen servi Zeova.

Ler mon ti Lostrali, mon pa ti fer preski nanryen spirityel. Mon ti konmans mank renyon. Mon ti fer zanmi avek bann zenn ki parey mwan ti kontan pour asiste renyon en swar me son lannmen swar nou ti al bwar e danse dan bann diskotek. Ler mon mazin sa letan, mon realize ki mon ti dan laverite me an menm tan dan lemonn. Me mon pa ti santi mwan konfortab okenn par.

EN LESON KI MON PA TI PE EKSPEKTE ME KI TI ENPORTAN

Apepre de-z-an pli tar, mon ti zwenn en ser ki san realize i ti fer mwan reflesir lo lafason ki mon ti pe viv mon lavi. Mon ti pe reste dan en lakaz avek senk ser selibater. Nou ti envit sirveyan rezyonal ek son madanm, Tamara pour reste kot nou pour en semenn. Ler msye Tamara ti pe fer bann travay pour kongregasyon, Tamara ti pas letan avek nou e nou ti pas bann bon moman ansanm. Mon ti kontan sa. I ti fasil pour koz avek li. Mon ti vwar li enteresan ki en dimoun ki vreman okipe dan servis Zeova, ti pou osi en dimoun ki gou pas letan avek.

Tamara ti en dimoun vreman devoue. I ti vreman kontan laverite ek predikasyon. I ti kontan pour donn Zeova son meyer tandis ki mwan, mon pa ti dan lazwa akoz mon pa ti pe donn mon meyer. Son bon latitid ek lazwa ti annan en gran lefe lo mwan. Son legzanp ti fer mwan mazin en laverite enportan dan Labib ki dir ki Zeova i anvi ki nou tou nou servi li “dan lazwa” e ki nou “kriye avek lazwa.”​—Ps. 100:2, NWT.

MON TI REKONMANS KONTAN PREDIKASYON

Mon ti anvi annan sa kalite lazwa ki Tamara ti annan me pour ganny sa lazwa mon ti bezwen fer bann gro sanzman. Mon pa ti sanz deswit me mon ti konmans fer bann pti sanzman. Mon ti konmans prepare avan al predikasyon e mon ti fer pionye asistan tanzantan. Sa ti ed mwan pour pa tro per e pour santi mwan pli konfidan. Pli mon ti servi Labib dan predikasyon, pli mon ti kontan predikasyon. Pa bokou letan apre, mon ti konmans fer pionye asistan tou le mwan.

Mon ti konmans fer zanmi avek dimoun diferan laz ki ti pe donn Zeova zot meyer e ki ti pe servi Zeova dan lazwa. Zot bon legzanp ti ed mwan pour reflesir lo sa ki pli enportan pour mwan e pour konmans lir Labib sak zour. Mon ti konmans kontan predikasyon plis ankor e avek letan mon ti konmans fer pionye ordiner. Apre plizyer lannen, mon ti finalman santi mwan ere e konfortab dan kongregasyon.

MON TI GANNY EN KONPANYON SERVIS

Enn an pli tar, mon ti zwenn Alex. I ti en bon dimoun, ki ti senser e ki ti kontan Zeova ek predikasyon. I ti en serviter kongregasyon e i ti’n fer pionye pour si-z-an. Alex ti’n osi servi apepre wit mwan Malawi, kot i ti annan bezwen pour plis proklanmater. Laba, i ti pas letan avek bann misyonner ki ti bann bon legzanp pour li. Zot ti ankouraz li pour kontinyen met lentere Rwayonm premye dan son lavi.

An 2003, nou ti marye e nou’n kontinyen dan servis a plen tan ziska la. Nou’n aprann en kantite zoli leson e Zeova in beni nou dan bokou fason.

ZEOVA TI BENI NOU PLIS ANKOR

An 2009, nou ti ganny envite pour al servi konman misyonner Timor-Leste, en pti pei dan larsipel Lendonezi. Nou ti sirprann, eksite e per an menm tan. Senk mwan pli tar, nou ti ariv Dili, kapital Timor-Leste.

Lavi dan nou nouvo lakour ti vreman diferan avek kot nou sorti. Nou ti bezwen adapte avek nouvo kiltir, langaz, manze e kondisyon lavi. Dan predikasyon, souvan nou ti vwar dimoun ki ti vreman pov, napa bon ledikasyon e ki ti ganny viktimize. Nou ti vwar en kantite dimoun ki ti pe soufer fizikman e emosyonnelman akoz lager ek vyolans.a

Predikasyon ti enkrwayab! Par egzanp, en fwa mon ti zwenn en fiy 13 an ki ti apel Maria e ki ti sagren.b Son manman ti’n mor detrwa lannen pli boner e i rar ki i ti vwar son papa. Parey en kantite zanfan son laz, Maria pa ti konnen ki i ti anvi dan son lavi. Mon rapel en fwa i ti plere ler i ti eksplik mwan lafason ki i ti santi. Par kont, mon pa ti konpran ki i ti pe dir akoz mon pa ti ankor konn koz son langaz byen. Mon ti priy Zeova e demann li pour ed mwan pour ankouraz li. Apre sa, mon ti konmans lir bann verse ankourazan avek li. Sa detrwa lannen ki ti swiv, mon ti vwar lafason ki laverite ti sanz latitid, laparans ek lavi Maria. I ti batize e aprezan i pe kondwir son bann prop letid Labib. Ozordi, Maria i annan en gran fanmir spirityel e i pe santi sa lanmour parmi pep Zeova.

Zeova pe beni sa travay predikasyon ki pe ganny fer Timor-Leste. Menm si i pandan sa dernyen dizan ki laplipar proklanmater in batize, en kantite zot i pionye, serviter kongregasyon oubyen ansyen. Lezot pe travay dan biro tradiksyon e zot pe ede tradwir bann piblikasyon baze lo Labib dan zot prop langaz. Mon vreman kontan pour tann zot pe sante dan renyon, pour vwar sourir lo zot figir e vwar zot vin zanmi Zeova.

MON PA TI POU KAPAB MAZIN EN LAVI PLI ERE KI SA

Lavi Timor-Leste ti vreman diferan avek Lostrali me nou ti vreman ere. Parfwa, nou ti voyaz dan bann pti bis ranpli avek dimoun ek zot pwason sek ek legim sorti bazar. Serten zour, nou ti kondwir en letid Labib dan en pti lakaz ki fer so avek poul ki pe ale vini anndan. Kantmenm i annan sa bann difikilte, souvan mon mazinen, ‘Sa i gou!’

Ler mon mazin lepase, mon apresye ki mon paran in fer zot mye pour ansenny mwan bann standar Zeova e siport mwan menm ler mon ti napa en bon lanmitye avek Zeova. Sa ki i ekri dan Proverb 22:6 i vre dan mon ka. Mon manman ek mon papa i fyer ler zot get nou de Alex. Zot kontan pour vwar nou pe servi Zeova. Depi 2016, nou pe servi Zeova konman sirveyan rezyonal, dan teritwar ki tonm anba Biro Brans Australasia.

I difisil pour krwar ki pa tro bokou letan pase, mon pa ti kontan fer predikasyon. Aprezan mon kontan fer predikasyon! Mon’n realize ki malgre nenport kwa ki arive dan nou lavi, nou ganny vre lazwa ler nou servi Zeova avek tou nou leker. Sa 18 an ki mon’n servi Zeova ansanm avek Alex, in sa letan ki mon’n pli ere dan mon lavi. Aprezan mon konpran ki sa ki psalmis David ti dir avek Zeova i vre: “Tou sa ki pran refiz dan ou pou rezouir; zot pou toultan kriye avek lazwa. . . . Tou sa ki kontan ou non pou rezouir akoz ou.”​—Ps. 5:11, NWT.