Ou kapab asire ki Zeova pou ed ou dan bann moman difisil

1-2. (a) Ki mannyer nou sityasyon ozordi i parey avek sityasyon bann Zwif ki ti retourn Zerizalenm? (b) Ki serten difikilte bann Zwif ti rankontre? (Vwar sa bwat “Dan letan Agay, Zekarya ek Ezra.”)

ESKI parfwa ou enkyet konsernan lavenir? Petet ou’n perdi ou travay e ou enkyet konsernan ki mannyer ou pou pran swen avek ou fanmir. I kapab ki ou enkyet pour ou fanmir parski i annan problenm politik dan sa landrwa kot ou reste, bann serviter Zeova pe ganny persekite oubyen travay predikasyon pe ganny opoze. Eski ou pe fer fas avek enn parmi sa bann problenm? Si wi, ou pou ganny bann byenfe ler ou vwar lafason ki Zeova ti ed bann Izraelit ler zot ti fer fas avek bann problenm en pe parey.

² Bann Zwif ki ti’n reste Babilonn tou zot lavi ti bezwen annan en lafwa for pour zot kapab kit bann keksoz materyel e sa lavi konfortab ki zot ti annan Babilonn, pour zot al dan en landrwa ki laplipar zot pa ti konn bokou keksoz lo la. Pa bokou letan apre ki zot ti’n ariv laba, zot ti konmans fer fas avek problenm ekonomik, i ti annan problenm politik e zot ti pe ganny opoze. Sa ti fer ki serten ti vwar li difisil pour konsantre lo sa travay pour rekonstri tanp Zeova. Alor apepre 520 avan Kris, Zeova ti anvoy Agay ek Zekarya ki ti de profet, pour ankouraz son pep pour kontinyen sa travay. (Aga. 1:1; Zek. 1:1) Parey nou pou vwar, sa ki sa bann profet ti dir ti vreman ankouraz sa pep. Me apepre 50 an pli tar, bann Zwif ki ti’n retourn Zerizalenm ti bezwen lankourazman ankor. Alor Ezra, ki ti en dimoun ki ti kopye parol Bondye, ti kit Babilonn e al Zerizalenm pour ankouraz pep Zeova pour fer ladorasyon Zeova vin premye dan zot lavi.—Ezra 7:​1, 6.

3. Ki kestyon nou pou reponn? (Proverb 22:19)

³ Bann profesi Agay ek Zekarya ti ed pep Bondye dan lepase pour kontinyen annan konfyans dan Zeova ler zot ti ganny opoze. Sa bann profesi i kapab ed nou ozordi pour kontinyen annan konfyans ki Zeova pou ed nou malgre nenport problenm ki nou fer fas avek. (Lir Proverb 22:19.) Dan sa lartik, nou pou vwar sa mesaz ki Zeova ti donn Agay ek Zekarya pour dir son pep e nou pou osi vwar legzanp Ezra. Anmezir nou fer sa, nou pou reponn sa bann kestyon swivan: Ki lefe bann problenm ti annan lo bann Zwif ki ti’n retourn Zerizalenm? Akoz ler nou fer fas avek problenm nou bezwen kontinyen met lavolonte Bondye premye dan nou lavi? Ki mannyer nou kapab devlop plis konfyans dan Zeova pandan bann moman difisil?

KI LEFE BANN PROBLENM TI ANNAN LO BANN ZWIF KI TI’N RETOURN ZERIZALENM?

4-5. Kwa ki ti fer ki bann Zwif ti nepli devoue dan sa travay pour rekonstri tanp?

⁴ Ler bann Zwif ti ariv Zerizalenm zot ti annan en kantite travay pour fer. Deswit, zot ti konmans rekonstri lotel pour Zeova e met fondasyon tanp. (Ezra 3:​1-3, 10) Me apre en serten letan, zot ti nepli devoue pour sa travay parey avan. Akoz? Apard ki konstri tanp, zot ti osi bezwen konstri zot prop lakaz, plante e donn zot fanmir manze. (Ezra 2:​68, 70) An plis ki sa, zot lennmi ti opoz zot e fer plan pour aret sa travay pour rekonstri tanp.—Ezra 4:​1-5.

⁵ Bann Zwif ki ti’n retournen ti osi bezwen fer fas avek problenm ekonomik ek problenm politik. Zot pei ti aprezan form parti Lanpir Pers. Apre ki Lerwa Siris, ki ti lerwa Pers, ti mor an 530 avan Kris, Kanbiz ti vin lerwa e i ti anvi kontrol Lezip. Ler Kanbiz ti pe al Lezip, i tre probab ki son bann solda ti demann bann Izraelit manze, delo ek landrwa reste. Sa ti fer lavi pli difisil pour bann Izraelit. Ler Daryis 1 ti konmans dirize konman lerwa apre Kanbiz, i ti ankor annan en kantite problenm dan Lanpir Pers, par egzanp i ti annan bann rebelyon ek problenm politik. Sa ti fer ki en kantite Izraelit ti enkyet konsernan ki mannyer pour pran swen avek zot fanmir. Tou sa bann problenm ti fer serten Zwif santi ki i pa ti sa bon moman pour rekonstri tanp Zeova.—Aga. 1:2.

6. Dapre Zekarya 4:​6, 7, ki lezot problenm bann Zwif ti fer fas avek e ki Zekarya ti dir zot?

⁶ Lir Zekarya 4:​6, 7. Apard ki problenm ekonomik ek problenm politik, bann Zwif ti osi ganny persekite. An 522 avan Kris, zot lennmi ti reisi persyad gouvernman Pers pour aret sa travay pour rekonstri tanp Zeova. Me Zekarya ti asir bann Zwif ki Zeova ti pou servi son lespri sen ki pwisan pour retir okenn lobstak ki ti pe anpes zot konstri tanp. An 520 avan Kris, Lerwa Daryis ti donn bann Zwif permisyon pour kontinyen konstri tanp e i ti menm donn zot larzan pour fer sa. I ti osi donn lord bann gouverner pour ed zot.—Ezra 6:​1, 6-10.

7. Ki benediksyon bann Zwif ki ti’n retourn Zerizalenm ti gannyen ler zot ti fer travay Zeova vin en priyorite dan zot lavi?

⁷ Atraver profet Agay ek Zekarya, Zeova ti promet son pep ki i ti pou ed zot si zot ti fer sa travay pour rekonstri tanp vin en priyorite dan zot lavi. (Aga. 1:​8, 13, 14; Zek. 1:​3, 16) Sa ki sa bann profet ti dir ti ankouraz bann Zwif e zot ti rekonmans konstri tanp an 520 avan Kris e zot ti fini rekonstri tanp dan mwens ki senk an. Vi ki bann Zwif ti fer travay Zeova vin en priyorite dan zot lavi menm si zot ti annan en kantite problenm, Zeova ti donn zot sa ki zot ti bezwen pour viv e i ti ed zot pour reste pros avek li. Sa ti fer ki zot ti ador Zeova dan lazwa.—Ezra 6:​14-16, 22.

KONTINYEN MET LAVOLONTE BONDYE PREMYE DAN NOU LAVI

8. Ki mannyer sa bann parol ki dan Agay 2:4 i kapab ed nou pour kontinyen fer lavolonte Zeova vin sa keksoz pli enportan dan nou lavi? (Vwar not.)

⁸ Vi ki gran ladetres i vreman pros, nou realize ki i vreman enportan pour obei sa lord pour partisip dan sa travay predikasyon. (Mark 13:10) Me nou kapab vwar li difisil pour fer sa travay predikasyon vin sa keksoz pli enportan dan nou lavi, si nou annan problenm larzan oubyen si dimoun pe opoz sa travay predikasyon. Kwa ki kapab ed nou fer lavolonte Bondye vin sa keksoz pli enportan dan nou lavi? Nou bezwen annan konfyans ki “Zeova Sef larme”b i avek nou. I pou ed nou si nou kontinyen met lentere Rwayonm avan sa ki pour nou. Alor i napa nanryen pour nou per.—Lir Agay 2:4.

9-10. Ki mannyer en koup ti vwar ki sa ki Zezi ti dir dan Matye 6:33 i vre?

⁹ Annou vwar legzanp Oleg ek Irina,c en koup marye ki pe servi konman pionye. Apre ki zot ti’n al ede dan en kongregasyon dan en lot landrwa, zot ti perdi zot travay parski i ti annan problenm ekonomik dan zot pei. Menm si pour apepre enn an, zot ti napa en travay permanan, zot ti toultan santi ki Zeova ti pe ed zot e parfwa bann frer ek ser osi ti ed zot. Kwa ki ti ed zot pandan sa bann moman difisil? O konmansman Oleg ti dekouraze. I ti dir: “Ler nou ti reste okipe dan sa travay predikasyon, sa ti ed nou pour konsantre lo sa ki pli enportan dan lavi.” Pandan ki Oleg ek son madanm ti pe kontinyen rod en travay, zot ti reste bizi dan predikasyon.

¹⁰ En zour ler zot ti pe retourn kot zot lakour apre predikasyon, zot ti tande ki enn zot zanmi pros ti’n vwayaz apepre 160 kilomet pour anmenn de sak konmisyon pour zot. Oleg i dir: “Sa zour, nou ti vwar ankor enn fwa ki kantite Zeova i pran swen avek nou e ki kantite nou bann frer ek ser i enterese avek nou. Nou asire ki Zeova pa zanmen oubliy son bann serviter, menm si zot krwar ki zot sityasyon pa pou zanmen amelyore.”—Mat. 6:33.

11. Ki pou arive si nou kontinyen fer lavolonte Zeova vin sa keksoz pli enportan dan nou lavi?

¹¹ Zeova i anvi ki nou konsantre lo sa travay ki sov lavi par kontinyen fer disip. Parey in ganny mansyonnen dan paragraf 7, Agay ti ankouraz pep Zeova pour oubliy sa ki ti’n arive e rekonmans zot servis sakre konmsi zot pe met fondasyon tanp ankor. Zeova ti promet ki si zot ti fer sa, i ti pou “beni zot.” (Aga. 2:​18, 19) Nou osi nou kapab asire ki Zeova pou beni bann zefor ki nou fer, si nou fer sa travay ki i’n donn nou vin en priyorite.

KI MANNYER NOU KAPAB DEVLOP PLIS KONFYANS DAN ZEOVA?

12. Akoz Ezra ek bann lezot Zwif ti bezwen annan en lafwa for?

¹² An 468 avan Kris, Ezra ti kit Babilonn avek en dezyenm group Zwif pour al Zerizalenm. Pour zot kapab fer sa vwayaz, zot ti bezwen annan en lafwa for parski zot ti pou pe vwayaz dan bann semen danzere e avek zot i ti pou annan en kantite lor ek larzan ki bann dimoun ti’n donnen konman kontribisyon pour tanp Zeova. Sa ti fer ki voler ti kapab atak zot. (Ezra 7:​12-16; 8:31) Pli tar zot ti osi realize ki menm Zerizalenm pa ti an sekirite. I ti napa bokou dimoun ki ti reste laba e son bann miray ek baro ti bezwen ganny repare. Ki nou kapab aprann avek Ezra konsernan lafason ki nou kapab devlop plis konfyans dan Zeova?

13. Ki mannyer Ezra ti devlop plis konfyans dan Zeova? (Vwar not.)

¹³ Ezra ti’n vwar lafason ki Zeova ti ed Son pep dan bann moman difisil. Detrwa lannen pli boner an 484 avan Kris, i tre probab ki Ezra ti Babilonn ler Lerwa Asweris ti donn lord pour touy tou bann Zwif dan Lanpir Pers. (Ester 3:​7, 13-15) Lavi Ezra ek tou bann Zwif ti an danze. Ler zot ti tann sa lord, bann Zwif “dan tou bann provens” ti zennen e zot ti dan dey. San dout, zot ti priy Zeova pour ganny son led. (Ester 4:3) Imazin lafason ki Ezra ek bann Zwif ti santi ler bann dimoun ki ti’n fer plan pour touy zot, ti ganny touye. (Ester 9:​1, 2) I kapab ki sa ki ti arive sa letan ti prepar Ezra pour fer fas avek bann problenm ki i ti pou rankontre dan lavenir e i ti donn li plis konfyans ki Zeova i kapab protez Son pep.d

14. Ki en ser ti aprann ler i ti vwar lafason ki Zeova ti pran swen avek li dan bann moman difisil?

¹⁴ Ler nou vwar lafason ki Zeova i ed nou pandan bann moman difisil, sa i ed nou pour annan plis konfyans dan li. Annou vwar legzanp en ser ki apel Anastasia ki reste dan les Lerop. Anastasia ti kit son travay parski i pa ti anvi pran kote dan bann zafer politik. I dir: “Sa ti sa premye fwa dan mon lavi kot mon ti napa ditou larzan.” I osi dir: “Mon ti koz avek Zeova dan lapriyer e mon ti vwar lafason ki i ti pran swen avek mwan. Si i arive ki mon perdi mon travay ankor, mon pa pou per. Si mon Papa ki dan lesyel i pran swen avek mwan ozordi, i pou osi pran swen avek mwan demen.”

15. Kwa ki ti ed Ezra pour kontinyen annan konfyans dan Zeova? (Ezra 7:​27, 28)

¹⁵ Ezra ti vwar ki Zeova i avek li. Ler Ezra ti reflesir lo lakantite fwa ki Zeova ti’n ed li, sa ti fer li kontinyen annan konfyans dan Zeova. Remark sa lekspresyon ki Ezra ti servi. I ti dir: “Zeova mon Bondye ti avek mwan.” (Lir Ezra 7:​27, 28.) Ezra ti servi bann lekspresyon en pe parey sis lezot fwa dan sa liv Labib ki port son non.—Ezra 7:​6, 9; 8:​18, 22, 31.

16. Dan ki sityasyon nou kapab vwar lafason ki Zeova i ed nou? (Vwar portre.)

¹⁶ Ler nou pe fer fas avek en sityasyon difisil, Zeova i kapab ed nou. Par egzanp, nou kapab vwar lafason ki Zeova i ed nou ler nou demann nou anplwayer konze pour nou asiste lasanble oubyen ler nou demande pour aziste nou progranm travay pour nou kapab asiste tou nou renyon. Keksoz i kapab mars pli byen ki nou ti pe ekspekte e sa pou fer nou annan plis konfyans dan Zeova.

17. Ki mannyer Ezra ti demontre limilite ler i ti pas dan problenm? (Vwar portre lo kouvertir.)

¹⁷ Ezra ti priy Zeova pour demann li led. Sak fwa ki Ezra ti enkyet konsernan son bann responsabilite, i ti demontre limilite e i ti koz avek Zeova dan lapriyer. (Ezra 8:​21-23; 9:​3-5) Vi ki Ezra ti depan lo Zeova, sa ti motiv lezot pour siport li e pour swiv son legzanp. (Ezra 10:​1-4) Ler nou enkyet konsernan nou bann bezwen materyel oubyen konsernan sekirite nou fanmir, nou bezwen annan konfyans e koz avek Zeova dan lapriyer.

18. Kwa ki kapab ed nou pour devlop plis konfyans dan Zeova?

¹⁸ Si nou rod led Zeova e nou les nou bann frer ek ser ed nou, sa pou fer nou annan plis konfyans dan Zeova. En ser ki apel Erika ki annan trwa zanfan, ti kontinyen annan konfyans dan Zeova menm ler i ti pas dan bann sityasyon ki ti vreman difisil. Son zanfan ki pa ti ankor ne ek son msye ti mor enn deryer lot. Konsernan tou sa ki’n arive, Erika i dir: “Avan en keksoz i arive, ou pa konnen ki mannyer Zeova pou ed ou. Ou kapab ganny led dan bann fason ki ou pa pe ekspekte. Mon’n vwar ki Zeova in servi mon bann zanmi pour reponn mon bann lapriyer. I’n fer sa, ki swa par sa ki zot in dir oubyen fer. Si mon koz avek mon bann zanmi lo sa ki pe arive dan mon lavi, sa i fer li pli fasil pour zot ed mwan.”

KONTINYEN ANNAN KONFYANS DAN ZEOVA ZISKA LAFEN

19-20. Ki nou aprann avek bann Zwif ki pa ti kapab retourn Zerizalenm?

¹⁹ Nou kapab osi aprann en leson enportan avek bann Zwif ki pa ti kapab retourn Zerizalenm. Serten pa ti kapab retournen parski zot ti tro vye, zot ti malad oubyen sityasyon zot fanmir pa ti permet zot. Kantmenm sa, zot ti kontan pour siport bann ki ti pe retournen par fer zot kontribisyon. (Ezra 1:​5, 6) I paret ki apepre 19 an apre ki sa premye group Zwif ti’n retourn Zerizalenm, bann Zwif ki ti’n reste Babilonn ti ankor pe anvoy zot kontribisyon Zerizalenm.—Zek. 6:10.

²⁰ Menm si nou pa kapab fer tou sa ki nou ti ava kontan dan servis Bondye, nou kapab asire ki Zeova i apresye zefor ki nou fer pour fer li plezir. Ki mannyer nou konn sa? Dan letan Zekarya, Zeova ti demann son profet pour fer en kouronn avek sa lor ek larzan ki bann Zwif ki ti reste Babilonn ti’n anvoy pour bann Zwif ki reste Zerizalenm. (Zek. 6:11) Sa “zoli kouronn” ti pou ganny servi pour fer bann Zwif “rapel” sa kontribisyon zenere ki bann Zwif ki reste Babilonn ti’n fer. (Zek. 6:​14, not.) Nou kapab asire ki Zeova pa pou zanmen oubliy bann zefor ki nou kontinyen fer pour servi li dan bann moman difisil.—Ebr. 6:10.

21. Kwa ki pou ed nou pour kontinyen annan konfyans dan Zeova nenport sityasyon nou pas ladan dan lavenir?

²¹ Dan sa bann dernyen zour, nou pou kontinyen fer fas avek problenm e keksoz i kapab vin pli pir dan lavenir. (2 Tim. 3:​1, 13) Me sa pa devret fer nou tro enkyet. Rapel sa ki Zeova ti dir son pep dan letan Agay. I ti dir: “Mon avek zot . . . Pa bezwen per.” (Aga. 2:​4, 5) Nou osi, nou kapab asire ki Zeova pou avek nou tan ki nou fer nou mye pour fer son lavolonte. Ler nou aplik bann leson ki nou’n aprann dan profesi Agay ek Zekarya e nou swiv legzanp Ezra, nou pou kontinyen annan konfyans dan Zeova malgre nenport sityasyon nou fer fas avek dan lavenir.