Swiv legzanp bann lanz fidel

1-2. (a) Dan ki fason nou diferan avek bann lanz? (b) Dan ki fason nou parey avek bann lanz?

LER Zeova ti atir ou ver laverite, i ti envit ou pour form parti son bann serviter ki kontan kanmarad e ki parey en fanmir. Sa i enkli nou bann frer ek ser partou dan lemonn e osi sa plizyer milyon lanz fidel. (Dan. 7:9, 10) Souvandfwa ler nou mazin bann lanz, nou mazin lefet ki zot vreman diferan avek nou. Par egzanp, bann lanz ti ganny kree bokou plis letan avan ki bann imen ti ganny kree. (Zob 38:4, 7) Zot pli pwisan, pli sen e pli drwat ki nou parski nou bann imen enparfe.—Lik 9:26.

² Menm si i annan sa bann diferans ant nou ek bann lanz, i annan en kantite lezot fason ki nou parey avek zot. Par egzanp, bann imen ek bann lanz i kapab demontre bann zoli kalite ki Zeova i annan. Parey bann lanz, nou annan sa liberte pour swazir. Bann lanz i annan zot prop non ek personnalite, zot annan diferan responsabilite dan servis Zeova e nou osi nou parey. Osi parey bann lanz nou vreman anvi ador nou Kreater.—1 Pyer 1:12.

3. Ki nou kapab aprann avek legzanp bann lanz fidel?

³ Vi ki nou parey bann lanz dan en kantite fason, zot bon legzanp i kapab ankouraz nou e ansenny nou en kantite leson enportan. Dan sa lartik, nou pou vwar ki mannyer nou kapab swiv legzanp bann lanz fidel par demontre limilite, kontan bann dimoun, andire e par fer zefor pour gard kongregasyon prop.

BANN LANZ I ANNAN LIMILITE

4. (a) Ki mannyer bann lanz i demontre limilite? (b) Akoz bann lanz i annan limilite? (Psonm 89:7)

⁴ Bann lanz fidel i annan limilite. Menm si zot annan leksperyans, zot pwisan e zot saz, zot obeir bann lenstriksyon Zeova. (Ps. 103:20) Ler zot desarz zot bann responsabilite, zot pa zanmen fer vantar konsernan bann keksoz ki zot fer oubyen servi zot pouvwar pour atir latansyon lo zot. Zot kontan pour fer tou sa ki Zeova i demann zot pour fer menm si zot non pa ganny mansyonnen.a (Zen. 32:24, 29; 2 Rwa. 19:35) Zot refize aksepte loner ki devret al pour Zeova. Akoz bann lanz i annan limilite? Parski zot kontan Zeova e zot annan bokou respe pour li.—Lir Psonm 89:7.

5. Ki mannyer en lanz ti demontre limilite ler i ti konsey zapot Zan? (Vwar portre.)

⁵ Annou vwar en resi dan Labib ki montre ki bann lanz i annan limilite. Apepre lannen 96, en lanz ki nou pa konn son non, ti montre zapot Zan bann keksoz merveye. (Rev. 1:1) Ki Zan ti fer ler i ti vwar sa bann keksoz? I ti esey ador sa lanz me sa lanz fidel ti aret li deswit e dir li: “Atansyon! Pa fer sa! Mon zis en lesklav parey ou menm ek ou bann frer . . . Ador Bondye!” (Rev. 19:10) Sa lanz ti annan limilite e i pa ti anvi ganny loner. Deswit i ti dir avek Zan ki i devret ador Zeova. Sa lanz pa ti santi ki i pli enportan ki Zan. Menm si sa lanz ti’n servi Zeova pour bokou plis letan e i ti bokou pli pwisan ki Zan, i ti demontre limilite e i ti dir ki i zis en lesklav parey Zan. Menm si sa lanz ti bezwen donn Zan konsey, i pa ti fer li dan en fason brit. O kontrer i ti koz dan en fason zantiy. I tre probab ki i ti konpran ki Zan ti azenou devan li parski i ti enpresyonnen avek bann keksoz ki i ti vwar.

6. Ki mannyer nou kapab demontre limilite parey bann lanz?

⁶ Ki mannyer nou kapab demontre limilite parey bann lanz? Parey bann lanz, nou osi nou anvi travay dir dan servis Zeova san fer vantar konsernan bann keksoz ki nou fer oubyen san azir konmsi nou annan bann abilite spesyal. (1 Kor. 4:7) Osi, nou pa devret santi ki nou pli siperyer ki lezot zis akoz nou’n servi Zeova pli lontan oubyen akoz nou annan serten responsabilite ki lezot napa. Anfet, pli nou annan responsabilite pli nou devret konsider lezot konman pli enportan ki nou. (Lik 9:48) Parey bann lanz, nou anvi travay pour ed lezot. Nou pa esey fer lezot krwar ki nou pli enportan ki zot.

7. Ki mannyer nou kapab demontre limilite ler nou pe donn konsey en dimoun?

⁷ Nou osi kapab demontre limilite si nou bezwen donn konsey en dimoun, par egzanp en frer oubyen en ser ouswa nou zanfan. Ler nou pe donn konsey parfwa nou pou bezwen ferm. Me parey sa lanz ti konsey Zan dan en fason zantiy, nou osi nou kapab ferm ler nou pe donn konsey e an menm tan nou fer li dan en fason ki pa dekouraz sa dimoun. Si nou pa krwar ki nou pli siperyer ki lezot, sa pou ed nou pour demontre respe ek lanmour ler nou pe donn konsey ki sorti dan Labib.—Kol. 4:6.

BANN LANZ I KONTAN DIMOUN

8. (a) Dapre Lik 15:10, ki mannyer bann lanz i montre ki zot kontan bann dimoun? (b) Ki mannyer bann lanz i ed nou dan sa travay predikasyon? (Vwar portre.)

⁸ Bann lanz pa krwar ki bann imen pa enportan oubyen zot pa inyor sa ki arive avek bann imen. O kontrer zot kontan ler en dimoun ki’n komet en pese grav i repantir oubyen ler en dimoun ki’n aret servi Zeova i retourn kot li. Zot osi kontan ler en dimoun i aprann konsernan Zeova e i swazir pour fer bann sanzman dan son lavi pour li kapab servi Zeova. (Lir Lik 15:10.) Bann lanz i osi ed nou dan sa travay predikasyon. (Rev. 14:6) Menm si zot pa anons sa bon nouvel avek dimoun, zot kapab gid en proklanmater kot en dimoun ki anvi aprann konsernan Zeova. Byensir nou pa kapab dir ki bann lanz ki’n gid nou kot en dimoun spesifik. Apre tou, Zeova i kapab servi lezot fason pour ed en dimoun ki anvi aprann konsernan li oubyen pour gid son bann serviter kot sa dimoun. Par egzanp i kapab servi son lespri sen. (Akt 16:6, 7) Kantmenm sa, Zeova i servi son bann lanz en kantite pour ed nou dan sa travay predikasyon. Alor ler nou pe anons sa bon nouvel nou kapab asire ki bann lanz pou la pour ed nou.—Vwar bwat “Zot lapriyer ti ganny reponn.”b

9. Ki mannyer nou kapab montre ki nou kontan bann dimoun parey bann lanz?

⁹ Ki mannyer nou kapab montre ki nou kontan bann dimoun parey bann lanz? Ler i annan en lanons ki en dimoun in revin en Temwen Zeova, nou devret rezouir parey bann lanz. Nou kapab fer zefor pour akeyir sa dimoun e montre li ki nou kontan li e nou kontan ki i pe servi Zeova ankor. (Lik 15:4-7; 2 Kor. 2:6-8) Nou osi kapab swiv legzanp bann lanz par fer tou sa ki nou kapab dan sa travay predikasyon. (Ekle. 11:6) Zis parey bann lanz i siport nou ler nou pe anons sa bon nouvel, nou kapab rod fason pour siport nou bann frer ek ser dan predikasyon. Par egzanp, ou kapab fer laranzman pour fer predikasyon avek en proklanmater ki napa bokou leksperyans. Oubyen ou kapab ed bann frer ek ser aze ouswa bann ki annan problenm lasante pour partisip dan predikasyon.

10. Ki nou kapab aprann avek leksperyans Sara?

¹⁰ Me ki nou pou fer si nou sirkonstans pa permet nou fer tou sa ki nou ti ava kontan dan servis Zeova? Nou kapab rod fason pour travay avek bann lanz dan predikasyon. Annou vwar leksperyans en ser ki apel Sarac ki reste Lenn. Apre ki Sara ti’n fer pionye pour apepre 20 an, i ti tonm malad e i ti nepli kapab marse oubyen sorti lo son lili. Nou kapab konpran akoz ki Sara ti vreman dekouraze. Me Sara ti ganny led bann frer ek ser dan son kongregasyon e i ti kontinyen lir Labib regilyerman e sa ti ed li pour reganny son lazwa. Byensir i ti bezwen rod lezot fason pour fer son travay predikasyon. Vi ki i pa ti ni menm kapab asize pour ekri let, i ti bezwen fer predikasyon zis par telefonn. I ti telefonn son bann vizit e zot ti dir li konsernan lezot dimoun ki petet ti pou kontan etidye Labib. Ki ti arive apre? Dan zis detrwa mwan, Sara ti annan 70 letid Labib. I pa ti kapab fer letid tou sa bann dimoun alor i ti fer laranzman pour lezot dan kongregasyon fer letid avek serten sa bann dimoun. Aprezan en kantite sa bann etidyan i asiste renyon. I bezwen ki bann lanz i vreman kontan pour travay ansanm avek bann frer ek ser parey Sara, ki fer tou sa ki zot kapab dan predikasyon.

BANN LANZ I ANDIRE

11. Ki mannyer bann lanz in montre ki zot annan landirans?

¹¹ Bann lanz i annan landirans e sa i en bon legzanp pour nou. Pour plizyer milye lannen, bann lanz in fer fas avek lenzistis ek bann move keksoz. Zot in vwar Satan ek en kantite lezot lanz ki ti servi Zeova ansanm avek zot, rebel kont Zeova. (Zen. 3:1; 6:1, 2; Zid 6) Labib i koz lo en lanz ki ti bezwen lalit avek en demon pwisan. (Dan. 10:13) Osi depi letan Adan ek Ev, bann lanz in vwar zis en ptigin dimoun ki swazir pour servi Zeova. Malgre tousala, bann lanz fidel i kontinyen servi Zeova dan lazwa e avek devouman. Zot konnen ki dan sa bon moman Bondye pou retir tou lenzistis.

12. Kwa ki kapab ed nou pour andire?

¹² Ki mannyer nou kapab annan landirans parey bann lanz? Parey bann lanz, nou osi nou kapab fer fas avek lenzistis oubyen lopozisyon. Me parey bann lanz, nou asire ki dan sa moman ki Bondye in swazir, Bondye pou tir tou bann move keksoz. Alor parey bann lanz fidel, nou “pa aret fer sa ki byen.” (Gal. 6:9) Osi, Bondye in promet ki i pou ed nou andire. (1 Kor. 10:13) Nou kapab demann Zeova pour donn nou son lespri sen parski sa pou ed nou annan pasyans ek lazwa. (Gal. 5:22; Kol. 1:11) Ki ou pou fer si dimoun i opoz ou? Annan konfyans dan Zeova e pa bezwen per. Zeova pou toultan ed ou e i pou donn ou lafors.—Ebr. 13:6.

BANN LANZ I EDE GARD KONGREGASYON PROP

13. Ki responsabilite spesyal bann lanz in ganny donnen dan sa bann dernyen zour? (Matye 13:47-49)

¹³ Dan sa bann dernyen zour, Zeova in donn bann lanz en travay spesyal pour fer. (Lir Matye 13:47-49.) Sa travay predikasyon pe atir plizyer milyon dimoun partou dan lemonn. Serten dimoun i fer bann sanzman dan zot lavi pour viv dapre bann standar Zeova e servi Zeova dan sa fason ki Zeova i anvi zot fer li. Tandis ki lezot pa fer sa. Bann lanz in ganny donnen sa responsabilite pour “separ bann move dimoun ek bann ki fer sa ki byen.” Sa i vedir ki bann lanz in ganny sa responsabilite pour gard kongregasyon prop. Me sa pa vedir ki tou dimoun ki aret asosye avek nou pour en rezon oubyen en lot, pa pou zanmen kapab retournen e i pa vedir ki i pou napa problenm dan kongregasyon. Kantmenm sa nou kapab asire ki bann lanz pe travay dir pour ede gard kongregasyon prop.

14-15. Ki mannyer nou kapab swiv legzanp bann lanz e montre ki nou anvi gard kongregasyon prop? (Vwar portre.)

¹⁴ Ki mannyer nou kapab swiv legzanp bann lanz e montre ki nou anvi gard kongregasyon prop? Par fer nou par pour gard kongregasyon prop moralman e spirityelman e par fer zefor pour protez nou prop lanmitye avek Zeova. Nou fer sa par swazir bann zanmi ki kontan Zeova e par refize fer okenn keksoz ki kapab gat nou lanmitye avek Zeova. (Ps. 101:3) Nou kapab osi ed nou bann frer ek ser pour reste fidel avek Zeova. Par egzanp, ki nou devret fer si nou aprann ki en frer oubyen en ser in fer en pese grav? Vi ki nou kontan sa dimoun, nou pou ankouraz li pour koz avek bann ansyen. Si i pa fer sa, nou pou bezwen al koz avek bann ansyen lo sa ki’n arive. Nou anvi ki nou frer oubyen ser ki’n gat son lanmitye avek Zeova, i ganny led o pli vit posib.—Zak 5:14, 15.

¹⁵ Malerezman serten ki’n fer bann pese grav i bezwen ganny tire dan kongregasyon. Ler sa i arive, nou “aret frekant” zot.d (1 Kor. 5:9-13) Sa laranzman i ede pour gard kongregasyon prop. Osi ler nou swazir pour pa frekant bann dimoun ki’n ganny tire dan kongregasyon, nou pe demontre labonte anver zot. Ler nou fer sa, sa i kapab ed zot pour realize ki zot bezwen retourn kot Zeova. Si zot retourn kot Zeova, zot pou dan lazwa ansanm avek Zeova ek son bann lanz.—Lik 15:7.

16. Dan ki fason ou pou fer zefor pour swiv legzanp bann lanz?

¹⁶ Zeova in donn nou en gran privilez. I permet nou pour aprann konsernan bann lanz e pour travay ansanm avek zot. Annou demontre bann zoli kalite parey bann lanz par demontre limilite, kontan dimoun, andire e montre ki nou anvi gard kongregasyon prop. Si nou swiv legzanp bann lanz, nou osi nou pou kapab form parti fanmir Zeova pour touzour.