Pa les fot lezot fer ou tonbe

1, 2. Ki mannyer Labib ti predir logmantasyon pep Zeova?

LO LATER antye, i annan en lorganizasyon ki son dimoun i kontan e anvi servi Zeova. Sa bann dimoun i Temwen Zeova. Menm si zot annan defo e fer fot, Zeova i gid son pep avek son lespri sen. Annou vwar bann fason ki i’n beni zot.

² An 1914, ti napa bokou dimoun ki ti ador Zeova. Me Zeova in beni sa travay predikasyon. Sa in fer ki plizyer milyon dimoun in aprann laverite sorti dan Labib e vin Temwen Zeova. Zeova in dekrir sa gran logmantasyon ler i ti dir: “Parmi zot, sa ki pli pti, pou vin en milye; sa ki pli feb, pou vin en nasyon pwisan. Mwan [Zeova] mon pa pou tarde pour realiz tousala dan son letan.” (Izai 60:22) Ozordi nou kapab vwar klerman ki sa profesi in ganny akonplir. Pep Zeova i parey en gran nasyon. Anfet, i annan plizyer nasyon dan lemonn ki son popilasyon i mwens ki pep Zeova.

3. Ki mannyer bann serviter Bondye in demontre lanmour?

³ Pandan sa bann dernyen zour, Zeova in ed son pep ranforsi zot lanmour pour kanmarad. Anfet, “Bondye i lanmour” e zot imit li. (1 Zan 4:8) Zezi ti donn lord son bann disip pour “kontan kanmarad.” I ti osi dir zot: “Si zot kontan kanmarad, dimoun ava war ki zot mon bann disip.” (Zan 13:34, 35) Pa tro lontan, bann serviter Zeova in demontre sa lanmour pour kanmarad menm ler bann nasyon ti pe lager avek kanmarad. Par egzanp, dan dezyenm lager mondyal, apepre 55 milyon dimoun ti ganny touye. Me pep Zeova pa ti touy personn dan sa lager. (Lir Mika 4:1, 3.) Sa in ed zot pour “pa responsab” pour versman disan personn.​—Akt 20:26.

4. Akoz i remarkab ki pep Bondye i kontinyen ogmante?

⁴ Pep Bondye i kontinyen ogmante menm si zot lennmi Satan i vreman pwisan. I “bondye sa lemonn.” (2 Korentyen 4:4) Satan i servi lorganizasyon politik ek medya pour esey aret sa travay predikasyon. Me i pa kapab aret sa travay. Par kont, Satan i konnen ki i reste li zis en pti pe letan, alor i kontinyen esey anpes nou ador Zeova.​—Revelasyon 12:12.

ESKI OU POU RESTE FIDEL LER LEZOT I FER FOT?

5. Akoz par ler lezot i kapab ofans nou? (Vwar portre lo paz 21.)

⁵ Bann serviter Bondye in aprann ki i vreman enportan pour kontan Bondye ek lezot dimoun. Zezi ti dir: “Kontan [Zeova] ou Bondye avek tou ou leker, avek tou ou et antye, e avek tou ou lespri. Sa i premye e pli gran komannman. Dezyenm komannman i parey: Kontan ou prosen parey ou kontan ou prop lekor.” (Matye 22:35-39) Par kont, Labib i montre ki tou imen i enparfe akoz pese Adan. (Lir Romen 5:12, 19.) Alor, par ler serten dan kongregasyon i kapab dir oubyen fer en keksoz ki kapab ofans nou. Ler sa i arive, ki nou pou fer? Eski nou lanmour pour Zeova pou reste for? Eski nou pou reste fidel avek li ek son pep? Labib i koz lo serten serviter Bondye ki ti fer e dir bann keksoz ki ti ofans lezot. Annou vwar ki leson nou kapab aprann avek sa ki ti arive avek zot.

6. Dan ki sans ki Eli pa ti reisi disiplin son bann garson?

⁶ Par egzanp, Eli ti gran pret Izrael, me son de garson ti dezobei lalwa Zeova. Labib i dir: “Bann garson Eli ti bann zonm san okenn moral: zot ti napa respe pour [Zeova].” (1 Samyel 2:12) Eli ti konnen ki son bann garson ti pe fer sa ki ti vreman mal. Kantmenm sa, i pa ti disiplin zot ase. Avek letan, Zeova ti pini Eli ek son de garson. Pli tar, i pa ti permet ki desandans Eli i servi konman granpret. (1 Samyel 3:10-14) Si ou ti pe viv dan letan Eli e ou ti’n konnen ki i ti’n les son bann garson fer bann move keksoz, eski sa ti pou’n fer ou tonbe? Eski sa sityasyon ti pou’n afeblir ou lafwa dan Zeova e fer ou aret servi li?

7. Ki fot grav David ti fer e ki Bondye ti fer?

⁷ David ti annan bann zoli kalite e sanmenm sa ki Zeova ti kontan li en kantite. (1 Samyel 13:13, 14; Akt 13:22) Menm David ti fer en fot grav. Ler Ouriya ti’n al lager, David ti annan relasyon seksyel avek Bat-Seba madanm Ouriya e Bat-Seba ti tonm ansent. David pa ti oule personn konn sa ki i ti’n fer. Alor i ti donn lord Ouriya pour vin vwar li e apre esey konvenk Ouriya pour al se li. David ti ekspekte ki Ouriya ti pou annan relasyon seksyel avek Bat-Seba pour ki dimoun i krwar ki sa piti i pour Ouriya. Me Ouriya pa ti oule al kot li. Alor David ti fer sir ki Ouriya i ganny touye dan lager. Parski David ti fer sa gro pese, li ek son fanmir ti soufer. (2 Samyel 12:9-12) Kantmenm sa, Zeova ti pran pitye pour li e pardonn li. I ti konnen ki David ti anvi fer sa ki byen. (1 Lerwa 9:4) Si ou ti viv pandan sa letan, ki mannyer ou ti pou santi anver sa ki David ti’n fer? Eski ou ti pou aret servi Zeova?

8. (a) Ki mannyer zapot Pyer pa ti arive gard son parol? (b) Akoz Zeova ti kontinyen servi Pyer apre ki Pyer ti’n fer sa fot?

⁸ Zapot Pyer i en lot legzanp dan Labib. Zezi ti swazir li pour vin en zapot. Kantmenm sa, par ler Pyer ti dir oubyen fer bann keksoz ki pa ti byen. Par egzanp, Pyer ti dir ki i pa ti pou zanmen abandonn Zezi menm si tou lezot ti pou abandonn li. (Mark 14:27-31, 50) Me apre ki Zezi ti ganny arete, tou zapot, enkli Pyer ti abandonn li. Apre sa, trwa fwa Pyer ti dir ki i pa konn Zezi. (Mark 14:53, 54, 66-72) Par kont, Pyer ti vreman sagren pour sa ki i ti’n fer. Alor, Zeova ti pardonn li e i ti kontinyen servi li. Si ou ti en disip sa letan e ou ti konn sa ki Pyer ti’n fer, eski ou ti pou kontinyen met konfyans dan Zeova?

9. Akoz ou annan konfyans ki Bondye i toultan zis?

⁹ Dan sa bann legzanp, nou vwar ki serten serviter Zeova ti fer bann keksoz vreman move ki ti ofans lezot. Ler sa i arive ozordi, ki ou pou fer? Eski ou pou aret al renyon e menm abandonn Zeova ek son pep konpletman? Oubyen, ou pou realize ki Zeova i pran pitye e i kapab ki i pe esper en dimoun repantir? Me i kapab arive par ler ki en dimoun i fer en pese grav e i pa regret sa ki i’n fer. Eski ou pou annan konfyans ki Zeova i konn sa e ki i pou fer en keksoz dan son letan apropriye? I kapab menm tir sa dimoun dan kongregasyon si i neseser. Eski ou krwar ki Zeova pour toultan fer sa ki byen e zis?

RESTE FIDEL

10. Ki Zezi ti konpran konsernan fot ki Zida Iskaryot ek Pyer ti fer?

¹⁰ Dan Labib, nou lir bokou legzanp bann dimoun ki ti reste fidel avek Zeova ek son pep menm si lezot otour zot ti fer bann fot grav. Zezi i sa pli bon legzanp. Avan swazir sa 12 zapot, Zezi ti pas en lannwit antye pe priye pour son Papa ed li. Me pli tar, Zida Iskaryot ki ti enn parmi sa bann zapot, ti trai li. An plis, zapot Pyer ti dir ki i pa ti konn Zezi. (Lik 6:12-16; 22:2-6, 31, 32) Zezi pa ti blanm Zeova ni lezot disip ler serten parmi zot ti dezapwent li. O kontrer, Zezi ti reste pros avek son Papa e kontinyen servi li fidelman. Sa ti fer ki Zeova ti rekonpans li par resisit li e pli tar fer li vin Lerwa sa Rwayonm dan lesyel.​—Matye 28:7, 18-20.

11. Ki Labib ti predir lo bann serviter Zeova dan nou letan?

¹¹ Legzanp Zezi i montre nou ki nou devret reste fidel avek Zeova ek son pep e nou annan bon rezon pour fer sa. Nou kapab vwar ki Zeova pe gid son bann serviter dan sa bann letan lafen. I pe ed zot pour pres laverite partou dan lemonn e zis zot ki pe fer sa travay. Zot osi vreman ini e zwaye akoz tou sa ki Zeova pe ansenny zot. Zeova ti dekrir sa ler i ti dir: “Mon bann serviter pou sante avek lazwa dan zot leker.”​—Izai 65:14.

12. Ki mannyer nou devret vwar bann fot ki lezot i fer?

¹² Nou vreman ere parski Zeova i gid nou e ed nou pour fer bokou bon keksoz. Par kont, dimoun dan lemonn Satan pa ere e zot napa en lespwar pour lavenir. I pa ti pou zis oubyen saz pour kit Zeova ek son pep zis akoz en dimoun dan kongregasyon i fer oubyen dir en keksoz mal! O kontrer, nou devret reste fidel avek Zeova e swiv son direksyon. Nou osi bezwen aprann ki mannyer pour vwar e reazir anver bann fot ki lezot i fer.

KI MANNYER OU DEVRET REAZIR?

13, 14. (a) Akoz nou devret annan pasyans ek kanmarad? (b) Ki promes nou anvi mazin lo la?

¹³ Ki ou devret fer si enn ou frer i dir oubyen fer en keksoz ki ofans ou? Labib i donn sa konsey: “Pa pran lakoler tro vit akoz bann sot ki gard rankin.” (Eklezyast 7:9) Nou tou nou enparfe e fer bann fot. Alor nou pa kapab ekspekte ki nou bann frer ek ser pou toultan dir oubyen fer sa ki byen. An plis ki sa, i pa pou byen pour nou kontinyen mazin zot fot. Si nou fer sa, nou kapab perdi nou lazwa dan servis Zeova. Pli pir ankor, nou lafwa dan li i kapab afeblir e nou kapab kit lorganizasyon Zeova. Apre, nou pou nepli kapab servi Zeova oubyen annan sa lespwar pour viv dan sa nouvo lemonn.

¹⁴ Alor, kwa ki kapab ed ou reste ere dan ou servis pour Zeova ler lezot i fer keksoz ki fatig ou? Toultan mazin son promes rekonfortan: “Mon pou kree en nouvo lesyel ek en nouvo later. Dimoun pou oubliy letan pase. Zot souvenir pa pou zanmen retourn dan lespri.” (Izai 65:17; 2 Pyer 3:13) Zeova pou donn ou sa bann benediksyon si ou reste fidel ek li.

15. Ki Zezi ti dir nou devret fer ler lezot i fer fot?

¹⁵ I vre ki nou pa ankor ariv dan nouvo lemonn. Alor si en dimoun i ofans nou, nou bezwen medit lo sa ki Zeova i anvi nou fer. Par egzanp, Zezi ti dir: “Si zot pardonn bann dimoun ki’n fer zot ditor, zot Papa ki dan lesyel ava osi pardonn zot. Me si zot pa pardonn lezot dimoun, zot Papa osi pa pou pardonn zot, lemal ki zot in fer.” Ler Pyer ti demann Zezi si nou devret pardonn “ziska set fwa?” Zezi ti reponn: “Mon dir ou, pa zis set fwa, me 77 fwa.” Zezi ti ansenny nou ki nou devret toultan pare pour pardonn lezot.​—Matye 6:14, 15; 18:21, 22, NW.

16. Ki bon legzanp Zozef in kite?

¹⁶ Legzanp Zozef i montre nou ki mannyer pour reazir ler lezot i dezapwent nou. Zozef ek son pti frer ti sa sel de garson Zakob ek Rasel. Zakob ti annan dis lezot garson, me i ti pli kontan Zozef ki tou lezot. Sa ti fer lezot zalou Zozef. An fet, zot ti telman ay li ki zot ti vann li konman en lesklav e i ti ganny anmennen Lezip. Plizyer lannen apre, lerwa Lezip ti fer Zozef vin sa dezyenm dimoun pli o dan sa pei akoz i ti enpresyonnen avek bon travay ki Zozef ti’n fer. Pli tar, bann frer Zozef ti vin Lezip pour aste manze akoz ti annan lafamin. Ler zot ti vwar Zozef, zot pa ti rekonnet li, me li i ti konnen lekel zot. Menm si zot pa ti’n tret li byen, i pa ti pini zot me o kontrer i ti teste zot pour vwar si zot ti’n vreman sanze. Ler Zozef ti realize ki zot ti’n sanze, i ti fer zot konnen ki i zot frer. Pli tar, i ti rekonfort zot e dir: “Pa bezwen per aprezan. Mon pou nouri zot ek zot bann zanfan.”​—Zenez 50:21.

17. Ki ou anvi fer ler lezot i fer fot?

¹⁷ Pa bliye ki tou dimoun i annan defo, alor ou osi ou kapab ofans lezot. Si ou realize ki ou’n ofans en dimoun, swiv konsey Labib. Demann sa dimoun pour pardonn ou e esey fer lape avek li. (Lir Matye 5:23, 24.) Nou kontan ler lezot i pardonn nou. Alor nou devret fer parey pour lezot. Kolosyen 3:13 i dir: “Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot. Parey Zeova in volonterman pardonn zot, zot osi zot devret fer parey.” Si nou vreman kontan nou bann frer ek ser, nou pa pou kontinyen ankoler avek zot pour fot ki zot in fer dan lepase. (1 Korentyen 13:5, NW) Si nou pardonn lezot, Zeova pou pardonn nou osi. Alor kan lezot i fer fot, annou pran pitye pour zot, zis parey nou Papa, Zeova i pran pitye pour nou.​—Lir Psonm 103:12-14.