Ki Labib i dir lo termin lavi en dimoun ki pe soufer?

Sa ki Labib i dir

Labib pa koz spesifikman lo Euthanasiaa oubyen lo sa prosedir medikal pour termin lavi en dimoun ki pe soufer. Par kont, sa ki Labib i dir lo lavi ek lanmor i ed nou pour kapab annan en pwennvi balanse. I mal pour touy en dimoun, me de lot kote, i pa neseser pour fer bann keksoz ekstrenm pour prolonz lavi en dimoun ki pe mor.

Labib i dir ki Bondye i nou Kreater e i “sours lavi.” (Psonm 36:9; Akt 17:28) Lavi i vreman presye pour Bondye. I pour sa rezon ki Bondye i defann pour pran lavi en lot dimoun oubyen pour swisid. (Egzod 20:13; 1 Zan 3:15) Deplis, Labib i dir ki nou bezwen pran serten prekosyon rezonnab pour protez nou lavi ek lavi lezot. (Deterononm 22:8) I kler ki Bondye i anvi ki nou konsider lavi konman en kado presye.

Me si en dimoun i pros pour mor akoz en maladi grav?

Labib i defann pran lavi en lot dimoun menm si sa dimoun pe al mor oubyen i pros pour mor. Legzanp Sail, en Lerwa Izrael i montre sa. Pandan en lager, Sail ti ganny blese e i ti pros pour mor. I ti demann enn son bann serviter pour ed li mor pli vit. (1 Samyel 31:3, 4) Serviter Sail ti refize. Par kont, pli tar en lot zonm ti fer krwar ki i ti’n ed Sail pour mor. Me David ti annan menm pwennvi avek Bondye lo sa size. I ti akiz sa zonm konmkwa i ti’n komet en mert.​—2 Samyel 1:6-16.

Eski nou devret gard sa dimoun vivan a tou pri?

Labib pa demann nou pour prolonz lavi en dimoun ki pe mor. O kontrer, Labib i ed nou pour annan en pwennvi balanse. Lanmor i nou lennmi e nou mor akoz nou fer pese. (Romen 5:12; 1 Korentyen 15:26) Nou pa swete ki nou mor, me an menm tan, nou pa per lanmor akoz Bondye in promet pour resisit bann ki’n mor. (Zan 6:39, 40) En dimoun ki konsider lavi konman sakre pou rod sa pli bon swen medikal ki annan. Me selman, i pa neseser pour swazir bann tretman medikal ki zis prolonz lavi en dimoun ki pe mor.

Eski en dimoun ki’n swiside i kapab ganny pardonnen?

Wi, akoz swisid pa form parti bann pese ki napa pardon dan Labib. I en pese grav pour en dimoun pran son prop lavi.b Me Bondye i kapab konpran bann sityasyon ki kapab fer en dimoun anvi komet swisid par egzanp, akoz en maladi mantal oubyen zenetik ek bann stres ekstrenm. (Psonm 103:13, 14) Bondye i rekonfort bann ki dan lapenn atraver Labib. Deplis, Labib i dir ki “dimoun bon konman move pou resisite.” (Akt 24:15) Sa i montre ki i posib ki bann ki’n fer bann pese grav parey komet swisid pou resisite.