Zakob ti al an Arann

ESKI ou konnen lekel sa bann zonm ki Zakob pe koz avek? Apre ki i ti’n vwayaz pour plizyer zour, Zakob ti rankontre zot kot en pwi. Zot ti pe pran swen avek zot bann mouton. Zakob ti demann zot: ‘Kote zot sorti?’

Zot ti reponn: ‘An Arann.’

‘Zot konn Labann?’ Zakob ti demande.

‘Wi,’ zot ti reponn. ‘Zisteman, la son fiy Rasel pe vini avek son troupo mouton.’ Eski ou vwar Rasel pe vini dan lwen?

Kan Zakob ti vwar Rasel avek bann mouton son tonton Labann, i ti ale e roul sa ros ki ti lo sa pwi afen ki bann mouton i kapab bwar delo. Apre Zakob ti anbras Rasel e i ti dir li lekel li. Rasel ti vreman eksite, i ti al kot li e rakont son papa Labann.

Labann ti byen kontan pour Zakob reste avek li. Kan Zakob ti demande pour marye avek Rasel, Labann ti kontan. Me i ti demann Zakob pour travay pour li set an pour ganny Rasel. Akoz i ti telman kontan Rasel, Zakob ti travay. Eski ou konnen ki ti arive kan ti’n ariv ler pour zot marye?

Labann ti donn li son premye fiy Lea olye Rasel. Kan Zakob ti dakor pour travay ankor set an pour li, Labann ti donn li Rasel osi konman son madanm. Dan sa letan Bondye ti permet bann msye pour annan plis ki en madanm. Me aprezan, parey Labib i montre en msye i devret annan en sel madanm.