Gran fanmiy Zakob

GET sa gran fanmiy. Sa i sa 12 garson Zakob, e i annan bann fiy osi. Eski ou konn non enn sa bann zanfan? Annou aprann en pe lo serten parmi zot.

Lea ti ganny kat garson, zot ti apel Ribenn, Simeon, Levi ek Zida. Kan Rasel ti vwar ki i ti napa okenn zanfan i ti vreman tris. Alor i ti donn Zakob son servant Bila, e Bila ti ganny de garson ki ti apel Dann ek Naftali. Apre sa Lea osi ti donn Zakob son servant Zilpa, e Zilpa ti ganny de garson Gad ek Aser. Finalman Lea ti ganny ankor de garson ki ti apel Isakar ek Zeboulonn.

Anfen Rasel ti kapab ganny en zanfan. I ti apel li Zozef. Plitar nou pou aprann en kantite keksoz lo Zozef, akoz i ti vin en dimoun tre enportan. Sa ti sa 11 garson ki Zakob ti gannyen kan i ti pe viv avek Labann papa Rasel.

Zakob ti annan bann fiy osi, me Labib i mansyonn non zis enn. Son non ti Dina.

En zour Zakob ti deside pour kit Labann e retourn an Kanaan. Alor i ti rasanble ansanm son gran fanmiy ek tou son bann zannimo, troupo mouton ek bef, e i ti konmans en gran vwayaz.

En pe letan, apre ki Zakob ek son fanmiy ti’n retourn an Kanaan, Rasel ti ganny en lot garson. Sa ti arive kan zot ti pe vwayaze. I ti rankontre difikilte, e finalman i ti mor pandan ki i ti pe ganny son pti baba. Me son pti baba ti byen. Zakob ti apel li Benzamen.

Rapel byen non sa 12 garson Zakob akoz nasyon Izrael antye ti vin atraver zot. Annefe, sa 12 tribi Izrael ti ganny nonmen dapre 10 garson Zakob ek de garson Zozef. Izaak ti viv pour plizyer lannen apre ki sa bann garson ti’n ne, e i ti byen kontan pour annan sa kantite pti zanfan. Me annou vwar ki ti arive avek enn son pti zanfan, Dina.