Yeosafat ti met konfyans dan Zeova

ESKI ou konnen lekel sa bann zonm e ki zot pe fer? Zot pe al lager, e sa bann ki la devan zot pe sante. Petet ou kapab demande: ‘Akoz sa bann ki pe sante napa sab ek lans pour lager avek?’ Annou vwar.

Yeosafat ti lerwa 2 tribi Izrael. I ti viv dan menm letan ki lerwa Aab ek larenn Zezabel ti diriz sa 10 tribi dan nor. Me Yeosafat ti en bon lerwa, e son papa Aza ti osi en bon lerwa. Alor pour en kantite lannen bann dimoun dan sa 2 tribi dan sid ti pe viv dan lape ek trankilite.

Me apre sa, ti annan en keksoz ki ti arive ki ti fer bann dimoun per. Bann mesaze ti vin raport avek Yeosafat: ‘En gran larme ki sorti dan pei Moab, Amonn ek Montanny Seir pe vin atak ou.’ En kantite Izraelit ti rasanble an Zerizalenm pour resers led Zeova. Zot ti al kot tanp, e laba Yeosafat ti priye: ‘O Zeova nou Bondye, nou pa konnen ki pour fer. Nou san defans kont sa gran larme. Nou pe resers ou led.’

Zeova ti ekoute, e i ti fer enn son serviter dir avek bann dimoun: ‘Pa zot ki pou lager, me Bondye. Zis gete, e vwar konman Zeova pou sov zot.’

Alor lannmen bomaten, Yeosafat ti dir avek bann dimoun: ‘Annan konfyans dan Zeova!’ Apre sa i ti met bann santer par devan son bann solda, e anmezir ki zot ti marse zot ti sant bann sanson louanz pour Zeova. Eski ou konnen ki ti arive kan zot ti ariv sa landrwa kot ti pou annan lager? Zeova ti fer zot bann lennmi lager antre zot. Kan bann Izraelit ti arive, tou zot bann lennmi ti’n mor!

Eski Yeosafat pa ti’n byen fer pour met konfyans dan Zeova? I pou byen si nou osi nou met konfyans dan Zeova.