Yona ek sa gro pwason

GET sa zonm dan delo. Pa i dan en gran maler? Sa pwason pe al anval li! Eski ou konnen lekel sa zonm? I apel Yona. Annou vwar akoz ki i’n ganny sa maler.

Yona ti en profet Zeova. En pe letan apre ki Elisa ti’n mor, Zeova ti donn Yona sa lord: ‘Al kot sa gran lavil Niniv. Bann dimoun laba pe fer en kantite move keksoz. Mon oule ki ou koz avek zot.’

Me Yona pa ti oule ale. Alor, i ti mont lo en bato ki ti pe al dan en lot direksyon avek Niniv. Zeova pa ti kontan ditou ki Yona ti pe sove. Alor, i ti fer en gro tanpet. Divan ti soufle telman for ki sa bato ti pros pour koule. Bann maren ti vreman per, e zot ti kriy zot bann bondye pour ed zot.

Finalman, Yona ti dir zot: ‘Mon ador Zeova, sa Bondye ki’n kree lesyel ek later. Mon pe sove, akoz mon pa oule fer sa ki Bondye in demann mwan pour fer.’ Alor bann maren ti demande: ‘Ki nou pou fer avek ou pour ki sa tanpet i arete?’

‘Anvoy mwan dan lanmer, e lanmer pou kalme,’ Yona ti dir. Bann maren pa ti oule fer sa, me lefe ki sa tanpet ti pe vin pli pir zot ti finalman anvoy Yona dan lanmer. Toudswit sa tanpet ti arete, e lanmer ti revin kalm ankor.

Kan Yona ti koule, sa gro pwason ti anval li. Me i pa ti mor. Pour trwa zour e trwa lannwit i ti dan vant sa pwason. Yona ti regrete ki i pa ti’n obei Zeova e al Niniv. Eski ou konnen ki i ti fer?

Yona ti priy Zeova e demann li pour ed li. Apre sa Zeova ti fer sa pwason vomi Yona lo later sek. Apre sa Yona ti al Niniv. Eski sa pa i montre nou konman ki i enportan pour fer nenport keksoz ki Zeova i demande?