Zeova ti annan pasyans avek Zonas

Bann dimoun Asiri dan lavil Niniv ti vreman move. Zeova ti anvoy son profet Zonas pour al Niniv e averti zot ki zot devret sanz zot fason viv. Me Zonas ti sove e al en lot landrwa. I ti anbark lo en bato ki ti pe al Tarsis.

Ler bato ti dan milye kannal, i ti annan en gro tanpet e bann maren ti per. Zot ti priy zot bann bondye e demande: ‘Akoz sa pe arive?’ Finalman Zonas ti dir zot: ‘I mon lafot. Mon pe sove akoz mon pa’n fer sa ki Zeova in demann mwan pour fer. Zet mwan dan lanmer e lanmer pou kalmi.’ Bann maren pa ti oule zet Zonas dan lanmer me i ti ensiste. Ler zot ti fer li, sa tanpet ti arete.

Zonas ti krwar ki i ti pe al mor. Anmezir ki i ti pe koule dan fon lanmer, Zonas ti priy Zeova. Zeova ti anvoy en gro pwason. I ti anval Zonas me i pa ti touy li. Ler i ti dan vant pwason, Zonas ti priye: ‘Mon promet pour toultan obeir ou.’ Zeova ti fer Zonas reste dan vant sa pwason pour trwa zour e apre i ti fer sa pwason vomi li lo lans.

Vi ki Zeova ti’n sov Zonas, eski i ti pou bezwen al Niniv? Wi. Zeova ti demann Zonas pour al laba. Safwasi Zonas ti obeir. I ti al laba e i ti dir sa bann move dimoun: ‘Dan 40 zour, Niniv pou ganny detrir.’ Apre sa, en keksoz ki i pa ti pe ekspekte ti arive. Bann dimoun Niniv ti ekoute e zot ti sanz zot fason viv. Lerwa Niniv ti dir son pep: ‘Priy Bondye e repantir. Petet i pa pou detrir nou.’ Ler Zeova ti vwar ki bann dimoun ti’n repantir, i pa ti detrir Niniv.

Zonas ti ankoler akoz sa lavil pa ti’n ganny detrir. Zis mazinen: Zeova ti’n demontre pasyans ek pitye pour Zonas, me Zonas pa ti pran pitye pour bann dimoun Niniv. Zonas ti plito asiz an deor lavil dan lonbraz en pye kalbas e i ti boude. Apre, sa pye kalbas ti mor e Zonas ti ankoler. Alor Zeova ti dir li: ‘Ou pli enterese avek sa pye kalbas ki avek bann dimoun Niniv. Mon’n pran pitye pour zot e zot pa’n mor.’ Ki Zeova ti pe sey montre li? Bann dimoun Niniv ti pli enportan ki okenn plant.