SAPIT 12
Reziste Bann Lafors Spirityel Mesan
1. Ki mannyer Zezi ti reakte ler i ti rankontre bann lespri mesan?
ZIS apre son batenm, Zezi Kri ti al dan dezer Zida pour priye e medite. Laba, Satan Dyab ti esey fer li kas lalwa Bondye. Me Zezi ti rezet labwet Satan e i pa ti tonm dan son pyez. Zezi ti rankontre bann lezot lespri mesan diran son minister lo later. Pourtan, plizyer fwa, i ti reprimann e reziste zot.—Lik 4:1-13; 8:26-34; 9:37-43.
2. Ki bann kestyon ki nou pou egzaminen?
2 Bann resi biblik ki koz lo bann tel rankont, i devret konvenk nou ki bann lafors spirityel mesan i vreman egziste. Sa bann lespri mesan i sey tronp bann dimoun. Toudmenm, nou kapab reziste zot. Me kote sa bann lespri mesan i sorti? Akoz zot sey tronp bann imen? Ki bann mwayen zot servi pour atenn zot lobzektif? Larepons pour sa bann kestyon, pou ed ou pour reziste bann lafors spirityel mesan.
BANN LESPRI MESAN—ZOT LORIZIN EK ZOT LOBZEKTIF
3. Konman Satan Dyab ti vin an egzistans?
3 Byen lontan avan ki i ti kree bann imen, Zeova Bondye ti kree en kantite kreatir spirityel. (Zob 38:4, 7) Parey dan SAPIT 6 i eksplike, enn parmi sa bann lanz ti kiltiv en dezir pour ganny sa ladorasyon ki imen ti donn Zeova. An pourswivan sa lobzektif, sa lanz mesan ti opoz e kalonmni Zeova. I ti menm al ziska pour sizer avek sa premye fanm, ki Bondye i en manter. I byen apropriye alor, ki sa kreatir spirityel rebel, in ganny apele Satan (opozan) Dyab (kalonmnyen).—Zenez 3:1-5; Zob 1:6.
4. Ki pese serten lanz ti komet dan lepok Noe?
4 Plitar, bann lezot lanz ti vin dan kote Satan Dyab. Dan lepok Noe, ki ti en zonm zis, serten sa bann lanz ti abandonn zot servis dan lesyel e pran bann lekor fizik, pour satisfer zot dezir seksyel avek bann fanm lo later. San dout, Satan ti enfliyans sa bann lanz pour adopte sa kondwit rebel. Konsekans se ki zot ti vin papa bann kreatir ibrid, apele Nefilim, ki ti vin bann diktater vyolan. Kan Zeova ti koz sa gran Deliz, sa ti detrir bann imen koronpi ensi ki desandans kont natir, sa bann lanz dezobeisan. Sa bann lanz rebel ti sov sa destriksyon an abandonn zot lekor fizik e retourn dan domenn spirityel. Me Bondye in limit aktivite sa bann demon ler zot ti ganny anfermen dan teneb spirityel. (Zenez 6:1-7, 17; Zid 6) Satan, “sef demon,” ek son bann lanz mesan in toudmenm persiste dan zot rebelyon. (Lik 11:15) Avek ki lobzektif?
5. Ki lobzektif Satan ek son bann demon, e ki zot servi pour fer dimoun tonm dan zot pyez?
5 Satan ek son bann demon i annan en move lobzektif: detourn bann imen kont Zeova Bondye. Se pour sa ki diran tou listwar, zot in tronp bann dimoun, efrey zot e atak zot. (Revelasyon 12:9) Dan nou lepok, bann fe i demontre ki bann latak satanik i pli vyolan ki zanmen. Pour fer bann dimoun tonm dan zot pyez, bann demon i souvan servi spiritizm dan tou son laspe. Ki mannyer sa bann demon i servi sa latrap e konman ou kapab defann ou lekor kont sa?
KI MANNYER BANN LESPRI MESAN I ESEY TRONP OU
6. Kisisa spiritizm? Nonm bann diferan form spiritizm ki egziste?
6 Kisisa spiritizm? Se kominikasyon ou korperasyon avek bann demon oubyen lespri mesan, swa direkteman oubyen atraver en lot dimoun. Spiritizm i annan menm fonksyon avek en labwet servi par bann peser: i atir en viktim. E zis parey en peser pou servi tou sort kalite labwet pour sey atir en pwason dan son lanmson, bann lespri mesan osi i ankouraz diferan form spiritizm pour enfliyans bann dimoun. (Vwar Psonm 119:110.) Serten form spiritizm i devinen, mazik, enterpretasyon bann siny, sorsye, posed en dimoun anba pouvwar demonyak, konsilte bonnonm dibwa, e kominikasyon avek bann mor.
7. Eski spiritizm i komen e akoz i annan gran sikse menm dan bann pei ki dir zot Kretyen?
7 Sa labwet i efikas parski spiritizm i atrakte dimoun partou dan lemonn. Sa ki reste dan vilaz i al kot bann bonnonm dibwa e sa ki travay dan biro i konsilte bann astrolog. Spiritizm i an abondans menm dan bann pei ki dir zot Kretyen. Resers i endike ki Letazini selman, apepre 30 magazin avek en total 10,000,000 kopi, i ganny dedye lo diferan form spiritizm. Tou le-z-an, bann Brezilyen i depans plis ki 500 milyon dolar lo bann lobze spiritizm. Pourtan, 80 poursan bann ki pratik spiritizm dan sa pei, i bann Katolik batize ki al Lanmes. Etan donnen ki serten pret i pratik spiritizm, bokou krwayan i panse ki sa pratik i akseptab dan lizye Bondye. Me eski sa i vreman leka?
AKOZ LABIB I KONDANN SPIRITIZM
8. Ki Lekritir i dir lo spiritizm?
8 Si ou’n ganny ansennyen ki serten form spiritizm i permet ou antre an kontak avek bann bon lespri, petet ou pou etonnen pour aprann ki Labib i dir lo sa size. Pep Zeova ti ganny averti: “Pa tourn ver bann medyonm e pa konsilte bann ki predir levennman konman en metye, pour ou vin enpir avek zot.” (Levitik 19:31; 20:6, 27) Dan Labib, liv Revelasyon i averti nou ki “bann sorsye” pou fini dan “lak ki bril avek dife ek souf. Sa se dezyenm lanmor [lanmor eternel].” (Revelasyon 21:8; 22:15) Zeova Bondye i kondann tou form spiritizm. (Deterononm 18:10-12) Akoz sa i leka?
9. Akoz nou kapab konklir ki bann mesaz ozordi ki ganny transmet par bann lespri pa sorti kot Zeova?
9 Zeova ti anvoy bann bon lespri oubyen bann lanz zis, pour kominik avek serten imen avan ki Labib ti ganny konplete. Depi ki i’n ganny konplete, Parol Bondye in fourni sa gidans ki bann imen i bezwen pour servi Zeova dan fason ki akseptab pour Li. (2 Timote 3:16, 17; Ebre 1:1, 2) Bondye pa negliz son Parol sen pour transmet mesaz avek okenn dimoun. Dan nou lepok, tou mesaz ki ganny transmet par bann lespri i sorti kot bann lespri mesan. Kan kelken i pratik spiritizm, i riske ganny tourmante avek demon oubyen menm ganny posede par bann lespri mesan. Alors, avek lanmour, Bondye i met nou an gard kont spiritizm dan tou son laspe. (Deterononm 18:14; Galat 5:19-21) Deplis, si nou kontinyen pratik spiritizm apre ki nou’n konn pwenn-vi Zeova lo la, nou pou pe pran kote avek bann lespri mesan e rebel, e nou pou vin lennmi Bondye.—1 Samyel 15:23; 1 Kronik 10:13, 14; Psonm 5:4.
10. Kisisa devinen, e akoz nou pa devret pratik li?
10 En form spiritizm ki tre popiler se devinen—lesey pour dekouver lavenir oubyen en keksoz kasyet, avek led bann lespri. Astrolozi, get dan boul kristal, enterpretasyon bann rev, lir dan lanmen e bat kart, i bann diferan form devinen. Bokou dimoun i konsider devinen konman en plezir ki pa koz okenn danze, me Labib i montre ki bann deviner ek bann lespri mesan i mars ansanm. Par egzanp dan Akt 16:16-19, i mansyonn “en lespri devinen” ki ti permet en serten fiy fer “bann prediksyon.” Me i ti perdi son pouvwar pour devinen kan sa demon ti ganny tire dan li. I kler ki devinen i en labwet ki bann demon i servi pour atir dimoun dan zot pyez.
11. Ki mannyer bann lesey pour kominik avek bann mor i vin en pyez?
11 Si ou dan en latristes profon akoz ou’n perdi en manm ou fanmiy oubyen en zanmi pros, ou kapab fasilman ganny atire dan en lot latrap. En sorsye i kapab donn ou en ransennyman spesyal oubyen i kapab koz avek ou, an imitan lavwa sa dimoun ki’n mor. Fer atansyon! Okenn lesey pour kominik avek bann mor, i kapab fer ou tonm dan en pyez. Akoz? Akoz bann mor pa kapab koze. Petet ou a rapel ki Parol Bondye i dir klerman ki dan lanmor en dimoun “i retourn dan son sirfas later, sanmenm sa zour son bann panse i disparet.” Bann mor “pa konn nanryen ditou.” (Psonm 146:4; Eklezyast 9:5, 10) Deplis, i sanble ki bann demon i konn imit lavwa bann mor e pas serten lenformasyon lo zot avek bann sorsye. (1 Samyel 28:3-19) Alors, “nenport ki, ki konsilte bann mor” pe tonm dan pyez bann lespri mesan e pe azir kont lavolonte Zeova Bondye.—Deterononm 18:11, 12; Izai 8:19.
APRE ATIRE, ZOT ATAKE
12, 13. Ki bann fe ki prouve ki bann demon pe kontinyen tant e tourmant bann dimoun?
12 Kan ou swiv konsey ki Parol Bondye i donnen konsernan spiritizm, ou pe refize tonm dan latrap bann demon. (Vwar Psonm 141:9, 10; Romen 12:9.) Eski sa i vedir ki bann lespri mesan pou aret sey atak ou? Definitivman non! Apre ki i ti’n tant Zezi trwa fwa, Satan “ti kit li ziska en pli bon lokazyon.” (Lik 4:13) Pareyman, bann demon i persiste, pa zis pour atir dimoun me osi pour atak zot.
13 Mazin sa resi ki nou ti vwar pli boner kot Satan ti atak serviter Bondye, Zob. Dyab ti fer li perdi tou son bann zannimo ensi ki laplipar son bann serviter. Satan ti menm touy bann zanfan Zob. Answit i ti frap Zob li menm, avek en maladi penib. Me Zob ti gard son lentegrite anver Bondye e i ti ganny bann gran benediksyon. (Zob 1:7-19; 2:7, 8; 42:12) Depi sa, bann demon in fer serten dimoun vin aveg oubyen koz pa, e zot in kontinyen pran plezir dan soufrans bann imen. (Matye 9:32, 33; 12:22; Mark 5:2-5) Ozordi, rapor i montre ki bann demon i provok serten dimoun seksyelman e i fer lezot vin fou. Zot osi ensit lezot pour touye oubyen swiside, bann aksyon ki ganny konsidere konman pese kont Bondye. (Deterononm 5:17; 1 Zan 3:15) Toudmenm, plizyer milye dimoun ki’n deza anba pouvwar bann lespri mesan in kapab sape. Ki mannyer sa in posib pour zot? Zot in pran bann pa esansyel.
KONMAN POUR REZISTE BANN LESPRI MESAN
14. An akor avek legzanp bann Kretyen an Efez, konman ou kapab reziste bann lespri mesan?
14 Ki mannyer ou pou kapab reziste bann lespri mesan e protez ou fanmiy kont zot pyez? Bann Kretyen premye syek an Efez, ki ti pratik spiritizm avan vin krwayan, ti pran bann mezir pozitif. Nou lir dan Labib ki “en kantite ki ti pratik bann aktivite mazik ti anmenn zot bann liv e brile devan tou dimoun.” (Akt 19:19) Menm si ou pa’n zanmen pratik li, debaras ou avek tou bann keksoz ki annan pour fer avek spiritizm. I kapab bann liv, magazin, video kaset, poster, lanrezistreman mizikal, ek bann lobze ki servi pour pratik spiritizm. I osi enkli bann zidol, portboner ek lezot lobze pour proteksyon, ensi ki bann kado ofer par bann ki pratik spiritizm. (Deterononm 7:25, 26; 1 Korentyen 10:21) Konsider legzanp en koup Taylande ki ti ganny tourmante par bann demon pour en bon pe letan. Zot ti debaras zot avek tou bann lobze ki ti annan rapor avek spiritizm. Avek ki rezilta? Zot ti ganny delivre dan bann latak demonyak e answit zot ti fer bann vre progre spirityel.
15. Lekel sa lot mezir neseser pour reziste bann lafors spirityel mesan?
15 Pour reziste bann lespri mesan, i osi endispansab pour port sa lekipman batay spirityel konplet ki sorti kot Bondye, parey lapot Pol i konsey nou. (Efezyen 6:11-17) Bann Kretyen i devret ranforsi zot defans kont bann lespri mesan. Ki sa mezir i enplike? “Touzour pran lafwa konman en proteksyon ki en boukliye i donnen. Avek sa zot a kapab tenny dife tou bann dart alimen ki Dyab i anvoye,” Pol i deklare. Byensir, pli ou lafwa i solid, ou pou pli kapab reziste bann lafors spirityel mesan.—Matye 17:14-20.
16. Ki mannyer ou kapab fortifye ou lafwa?
16 Konman ou kapab fortifye ou lafwa? Si ou kontinyen etidye Labib e aplik son bann konsey dan ou lavi, sa i ava ed ou. Pour ou lafwa vin solid, sa pou depan bokou lo ki degre ferm son fondman, setadir konnesans Bondye, i ete. Eski ou a dakor ki sa konnesans egzakt ki ou’n resevwar e pran aker, gras a ou letid Labib, in batir ou lafwa? (Romen 10:10, 17) Alors, si ou kontinyen etidye e pran labitid pour asiste renyon bann Temwen Zeova, sirman ou lafwa pou fortifye plis ankor. (Romen 1:11, 12; Kolosyen 2:6, 7) Sa pou en gran miray proteksyon kont latak bann demon.—1 Zan 5:5.
17. Ki bann lezot mezir ki ti a neseser pour reziste bann lafors spirityel mesan?
17 Ki lezot mezir en dimoun ki determinen pour reziste bann lafors spirityel mesan, i kapab pran? Bann Kretyen an Efez ti bezwen protez zot akoz bann pratik demonyak ti’n enfeste lavil. Alor, Pol ti dir zot: “Priye dan tou sirkonstans.” (Efezyen 6:18) Vi ki nou pe reste dan en monn anvai par demon, lapriyer entans pour ganny proteksyon Bondye, i esansyel pour reziste bann lespri mesan. (Matye 6:13) Nou osi kapab benefisye avek led spirityel ek lapriyer bann ansyen dan kongregasyon Kretyen.—Zak 5:13-15.
KONTINYEN LIT KONT BANN LESPRI MESAN
18, 19. Ki en dimoun i kapab fer si bann demon i rekonmans tourmant li?
18 Menm apre ki zot ti pran sa bann mezir esansyel, serten in kontinyen ganny tourmante par bann lespri mesan. Par egzanp, en zonm an Kot-Divwar ki ti etidye Labib avek bann Temwen Zeova, ti detrir tou son bann portboner. I ti apre fer bon progre, dedye son lavi pour Zeova e batize. Me en semenn apre son batenm, bann demon ti konmans trouble li ankor e bann lavwa ti demann li pour abandonn son nouvo lafwa. Si sa in ariv avek ou, eski sa i vedir ki ou’n perdi proteksyon Zeova? Pa neseserman.
19 Zezi ti en zonm parfe e ti annan proteksyon divin, me pourtan i ti antann lavwa Satan Dyab, sa kreatir spirityel mesan. Zezi ti montre ki fodre fer dan en tel sirkonstans. I ti dir avek Dyab: “Sorti la ale Satan!” (Matye 4:3-10) Pareyman, ou devret refize ekout bann lavwa ki sorti dan lemonn spirityel. Opoz bann lespri mesan an apelan Zeova pour led. Wi, priy for an servan non Bondye. Proverb 18:10 i dir nou ki: “Non Zeova i en tour for. Bann zis i tay ladan e zot ganny proteksyon.” Sa zonm an Kot-Divwar ti fer sanmenm e bann lespri mesan ti aret trouble li.—Psonm 124:8; 145:18.
20. An rezimen, ki ou kapab fer pour reziste bann lespri mesan?
20 Zeova in permet bann lespri mesan pour egziste me i montre son pwisans, partikilyerman an faver son bann serviter, e son non pe ganny proklanmen partou lo later. (Egzod 9:16) Si ou reste pros avek Bondye, ou pa devret per bann lespri mesan. (Nonm 23:21, 23; Zak 4:7, 8; 2 Pyer 2:9) Zot pouvwar i limite. Zot ti ganny pini dan lepok Noe, resaman zot in ganny rezete dan lesyel, e aprezan zot pe esper zot zizman final. (Zid 6; Revelasyon 12:9; 20:1-3, 7-10, 14) Annefe, zot per sa destriksyon ki pe esper zot. (Zak 2:19) Alors, kantmenm bann lespri mesan i esey atir ou dan serten latrap oubyen atak ou dan nenport ki fason, ou kapab reziste zot. (2 Korentyen 2:11) Rezet tou form spiritizm, aplik konsey Parol Bondye e resers laprouvasyon Zeova. Fer tousala san tarde, vi ki ou lavi i depan lo ou rezistans anver bann lafors spirityel mesan!
ESTE OU KONNESANS
Ki mannyer bann lespri mesan i esey tronp bann dimoun?
Akoz Labib i kondann spiritizm?
Ki mannyer en dimoun i kapab debaras li avek bann lafors spirityel mesan?
Akoz ou devret kontinyen opoz bann lespri mesan?
[Portre lo paz 110]
Konman ou konsider diferan form spiritizm?